Azərbaycan məktəbliləri beynəlxalq

olimpiadada 3 medal qazanıblar

"İstək" liseyinin şagirdləri bu uğura imza atıblar

Azərbaycanı müxtəlif beynəlxalq bilik yarışlarında təmsil edən məktəblilərimizin hər dəfə medallarla Vətənə dönmələri sevindirici haldır.

Azərbaycan təhsilinin yetirmələrinin sədası bu dəfə Qazaxıstandan gəldi. Məktəblilərimiz Qazaxıstanın Almatı şəhərində riyaziyyat, fizika və informatika fənləri üzrə istedadlı şagirdlər arasında keçirilən XI Beynəlxalq Jautıkov Olimpiadasında yüksək nəticələr əldə ediblər. Qazaxıstanın Elm və Təhsil Nazirliyi, Almatı fizika-riyaziyyat təmayüllü "İstedadlar" liseyi, istedadlı uşaqlar üçün "Darın" Elm Mərkəzi tərəfindən təşkil olunan olimpiadada 15 ölkədən 58 komanda iştirak edib. Görkəmli qazax riyaziyyatçı alimi, akademik Orımbek Jautıkovun xatirəsinə həsr olunmuş olimpiadada Azərbaycan 19 nəfərdən ibarət 3 komanda ilə təmsil olunub. Avropa, Asiya və postsovet məkanı ölkələrindən 400-dək şagirdin iştirak etdiyi bilik yarışında milli komandalar riyaziyyat, fizika və informatika fənləri üzrə yarışıblar.

Azərbaycan məktəbliləri riyaziyyat və fizika fənləri üzrə uğurlu nəticələr göstəriblər. Riyaziyyat fənni üzrə keçirilən olimpiadada Bakı "İstək" liseyinin X sinif şagirdi Məhəmməd Şirinov II yeri tutaraq gümüş, Quba "İstək" liseyinin X sinif şagirdi Tahir Nadirov III yeri tutaraq bürünc, fizika fənni üzrə olimpiadada Quba "İstək" liseyinin IX sinif şagirdi Səbuhi Mikayılov III yerə çıxaraq bürünc medala layiq görülüblər. Gəlin, medalçılarla yaxından tanış olaq.

"İki imtahanın nəticəsinə görə

gümüş medala layiq görüldüm"

Məhəmməd Şirinov,

Bakıdakı "İstək" liseyinin

X sinif şagirdi

1999-cu ildə Bakıda anadan olub. I-IV sinifləri 286 nömrəli tam orta məktəbdə, V-VI sinifləri Bakı Dövlət Universitetinin nəzdindəki "Gənc istedadlar" liseyində oxuyub. Hazırda Bakıdakı "İstək" liseyinin X sinfində təhsil alır. Ölkəmizi dünyada keçirilən bilik yarışlarında layiqincə təmsil edən M.Şirinov istedadlı və perspektivli şagirdlərimizdəndir. 2013-cü ilin iyun ayında 17-ci Balkan Riyaziyyat Olimpiadasında gümüş medal qazanıb. 2014-cü ildə Respublika Riyaziyyat Olimpiadasında 1-ci yeri tutub. 2014-cü ilin yanvarında Qazaxıstanda və mayda Bolqarıstanda beynəlxalq olimpiadalarda iştirak edib. Yeniyetmələr arasında 18-ci Balkan Riyaziyyat Olimpiadasından isə Vətənə qızıl medalla qayıdıb. M.Şirinov bizimlə söhbətində Qazaxıstanda keçirilən son yarış barədə təəssüratlarını bölüşdü:

- Yarış yanvarın 11-19-da keçirildi. Azərbaycan komandası 19 nəfərdən ibarət idi. 4 müəllim və 15 şagirddən ibarət komandamız fizika, riyaziyyat və informatika fənlərindən bilik yarışmasına ciddi hazırlaşmışdı. Bizi olimpiadada müəllimlərimiz Anar Fərmanov, Elvin Məmmədov, Rəşadət Qədməliyev, Yusuf Çetin müşayiət edirdi. Əsasən IX və X sinif şagirdlərindən ibarət komandanın tərkibi bir ay əvvəl keçirilmiş imtahan nəticəsində müəyyən olunmuşdu. Olimpiadada 15 ölkədən 60-a yaxın komanda və 400-ə yaxın məktəbli iştirak edirdi. Yarışma iki gün keçirildi və riyaziyyat fənnində hər gün 3 sual üçün 4.5 saat vaxt verilmişdi. Riyaziyyat fənnindən komandada 6 nəfər idik. İlk imtahandan sonra hamımızın əhvalı yaxşı idi, çünki hamı 3 sualdan 2-ni həll etmişdi. İkinci gün imtahan sualları nisbətən çətin olduğundan uşaqların çoxu bal ala bilmədi. İki imtahandan sonra nəticələr artıq təxmini bilinirdi. İki imtahanın nəticəsinə görə 42 mümkün baldan 16-nı toplayaraq gümüş medala layiq görüldüm. Yarışlardan sonra digər ölkələrdən olan yaşıdlarımla ünsiyyət qurduq, maraqlı görüşlər keçirdik. Olimpiada ilə bağlı təəssüratlarımı ailəm və dostlarımla bölüşmək üçün evə qayıtmağı səbirsizliklə gözləyirdim.

"Növbəti olimpiadalarda da

Azərbaycanı layiqincə təmsil edəcəyəm"

Səbuhi Mikayılov,

Quba "İstək" liseyinin IX sinif şagirdi

Səbuhi Vasif oglu Mikayilov 1999-cu il oktyabrın 25-də Kürdəmir rayonu Şiximli kəndində anadan olub. 2006-cı ildə Bakı şəhərindəki 37 nömrəli tam orta məktəbin I sinfinə daxil olub. 2012-ci ildən təhsilini Quba "İstək" liseyində davam etdirir.

- Orta məktəbdə fizika və riyaziyyata daha çox maraq göstərmişəm. Artıq VII sinfin 2-ci yarısından fizika olimpiadasına hazırlaşmağa başladım. IX sinifdə Jautıkov olimpiada seçimlərinə qatılaraq Azərbaycan komandasına üzv oldum. Artıq Qazaxıstanda keçirilən ilk bilik yarışında III yeri qazanaraq bürünc medala layiq görüldüm. İnanıram ki, növbəti olimpiadalarda da Azərbaycanı layiqincə təmsil edəcəyəm.

Medalçılarımıza növbəti bilik yarışlarında daha yüksək zirvələr fəth etməyi arzulayırıq.

"İlk olimpiadada medal

aldığıma görə çox sevindim"

Tahir Nadirov,

Quba "İstək" liseyinin X sinif şagirdi

Tahir Müşfiq oğlu Nadirov 1998-ci il yanvarın 3-də Qusar rayonu Həsənqala kəndində anadan olub. 2004-cü ildə Həsənqala kənd tam orta məktəbinin 1-ci sinfinə daxil olub. 2011-ci ildə Quba "İstək" liseyinə qəbul imtahanında 4-cü yeri tutaraq bu təhsil ocağına daxil olub.

- VII sinfin ikinci yarısında valideynlərimin məsləhəti ilə riyaziyyat olimpiadasına hazırlaşmağa başladım. Olimpiada seçmə imtahanlarında müvəffəqiyyət qazandığıma görə IX sinifdə Bakı "İstək" liseyinin olimpiada hazırlıq mərkəzinə çağırıldım. Bir il yarım ərzində olimpiadaya hazırlaşmağa davam etdim. X sinifdə Jautıkov olimpiada seçimlərinə qatılaraq komandaya qəbul olundum. İlk yarışda bürünc medalla təltif olundum. İstirak etdiyim ilk olimpiadadan medal aldığıma görə çox sevindim. İnanıram ki, növbəti olimpiadalarda da uğurlar qazanacaq və Azərbaycanı layiqincə təmsil edəcəyəm.

Oruc MUSTAFAYEV

Azərbaycan müəllimi.- 2015.- 31 yanvar.- S.1; 5.