Xanəndə, həm də şair

Musiqi kolleci daha bir tanınmış məzununu tələbələri ilə görüşdürdü

Azərbaycan Milli Konservatoriyası nəzdində Musiqi Kollecində dekabrın 17-də ənənəvi “Məzunlarla görüş” layihəsi çərçivəsində növbəti tədbir təşkil olunub. Bu dəfə tanınmış xanəndə və şair, kollecin məzunu, Azərbaycan Milli Konservatoriyasının baş müəllimi, Əməkdar incəsənət xadimi Hacı Aqil Məlikov bu şöhrətli tədris ocağının müəllim və tələbələrinin qonağı olub.

Tədbiri kollecin direktoru, Əməkdar incəsənət xadimi, professor Nazim Kazımov açaraq görkəmli mədəniyyət və incəsənət xadimləri ilə mütəmadi olaraq keçirilən görüşlərin tələbələrin seçdikləri sənətin peşəkarı kimi yetişməsində, dünyagörüşlərinin genişləndirilməsində mühüm rol oynadığını bildirib və qonaqları təqdim edib. Aqil Məlikovu Azərbaycanda tanınmış xanəndə və qəzəl ustası, əruz vəzninin gözəl bilicisi kimi səciyyələndirən professor N.Kazımov onun yaradıcılığını yüksək qiymətləndirib, bu istedadlı sənətkarın keçdiyi həyat yolundan danışıb.

Sonra söz Aqil Məlikova verilib. Mahir ifaçı çıxışında kollecdə oxuduğu illəri xatırlayıb, tələbəlik dövrünün xoş təəssüratlarını bölüşüb. Öz ustadlarını minnətdarlıq hissi ilə yada salan xanındə, onların haqqında maraqlı faktlar açıqlayıb, ifaçılıq sənətinin sirrlərini müəllimi, respublikanın Xalq artisti, ustad xanəndə Hacıbaba Hüseynovdan öyrəndiyini qeyd edib. O, tələbələrə əruz vəzni haqqında məlumat verib, onun özəlliklərindən danışıb. Qəzəlləri düzgün öyrənib, əruz vəznini dərindən bilmək lazım olduğunu tələbələrə tövsiyə edən sənətkar daha sonra onların qarşısında qəzəllər söyləyib, mahnılar ifa edib. Öz mahir ifası ilə dinləyiciləri valeh edən A.Məlikov tələbə və müəllimlərin suallarını da cavablandıraraq onlarla maraqlı diskussiya aparıb. Tədbirdə xanəndənin oğlu Hüseyin Məlikov Segah muğamını məharətlə ifa edib. Onu kollecin məzunları Valeh Allahverdiyev tarda və Elnur Salahov kamançada müsayiət ediblər.

Görüşdə kollecin məzunu, respublikanın Xalq artisti Gülyaz Məmmədova da öz tələbəlik illərindən maraqlı epizodlar danışıb və tələbələr qarşısında “Bayatı Şiraz” təsnifini ifa edib.

Sonda professor N.Kazımov maraqlı görüşə görə qonaqlara minnətdarlıq edib, belə tədbirlərin tələbələrin hafizəsində həmişəlik həkk olunduğunu bildirib. Sonra o, Aqil Məlikova və digər qonaqlara Asəf Zeynallı, Səid Rüstəmov, Adil Gərayın həyat və yaradıcılığı haqqında yazdığı kitablarını hədiyyə edib.

Yusif ƏLİYEV

Azərbaycan müəllimi.- 2018.- 21 dekabr.- S.15.