Dünyanın lider universitetləri

Sorğuda 138 ölkədən 10 mindən artıq alim iştirak edib

Məlumdur ki, qloballaşma dövründə hər hansı ölkənin dünyadakı yeri artıq ənənəvi meyarlarla - ümumdaxili məhsulun ölçüsü, hərbi üstünlüyü və ya maliyyə resursları ilə deyil, məhz insan kapitalının keyfiyyəti ilə təyin olunur. İnsan kapitalının ən əhəmiyyətli meyarlarından biri isə təhsilin keyfiyyəti ilə bağlıdır. Bu isə aparıcı milli universitetlərin beynəlxalq səviyyədə liderlik mövqeyini müəyyən edir.

Böyük Britaniyanın dünyada təhsil xidmətləri sahəsində ixtisaslaşmış “Times Higher Education” (THE) jurnalının növbəti tədqiqatı isə dünyanın lider universitetlərinin reytinqinə həsr olunub. “Times Higher Education”un 2018-ci il üzrə dünyanın 100 ən nüfuzlu universitetinin növbəti reytinq cədvəlinə 8 ildir ki, ardıcıl olaraq ABŞ-ın Harvard Universiteti başçılıq edir. Cədvəldə ilk 10 yerdən 8-də Amerika universitetləri yer alıb. Bütövlükdə reytinqdə 21 ölkədən 100 universitet yer alıb ki, onlardan da 43-ü Birləşmiş Ştatların payına düşür. ABŞ-ın Kaliforniya Universiteti Los-Anceles Çikaqo Universiteti ilə birlikdə 2014-cü ildən sonra ilk dəfə ilk 10-luqda yer ala bilib. Ötən il adıçəkilən reytinqdə 10 universitetlə təmsil olunan Böyük Britaniya builki sıralamada 9 ali məktəblə qərarlaşıb. Kembric və Oksford universitetləri ilk 10-luqda müvafiq olaraq 4-cü və 5-ci yerləri tutublar. Rusiya reytinqdə M.V.Lomonosov adına Moskva Dövlət Universiteti (33-cü yer) və Moskva Fizika-Texnik İnstitutu (91-100) ilə təmsil olunub. Beləliklə də MDU ən yaxşı 50 universitet arasında yer ala bilib. M.V.Lomonosov adına Moskva Dövlət Universitetinin rektoru, akademik V.A.Sadovniçi reytinqin nəticələrini şərh edərək qeyd edib ki, “biz öz elmi nailiyyətlərimizi bütün dünyada fəal surətdə yaymaqdayıq. Universitetin beynəlxalq təhsil, elm, texnologiyalar məkanında öz iştirakını genişləndirmək üçün çoxsaylı planları var. Məhz bu amil MDU-nun bütün dünyada daha artıq dərəcədə tanınmasına və nəticə olaraq beynəlxalq reytinqlərdə mövqelərinin güclənməsinə aparır”.

Qeyd edək ki, “Times Higher Education” dərgisinin hazırladığı dünya universitetlərinin illik reytinq cədvəli hazırda ən nüfuzlu sənəd hesab edilir. İllik reytinq akademik cəmiyyətin yanvar-mart aylarında keçirilmiş açıq sorğusu əsasında tərtib edilib. Builki sorğuda dünyanın 138 ölkəsindən 10 mindən artıq nüfuzlu alim iştirak edib. Tədqiqat gedişində nüfuzlu alimlərdən 10162 cavab əldə olunub. Sorğu THE-nin sifarişi ilə “Elsevier” kompaniyası tərəfindən aparılıb. Reytinqlə daha ətraflı www.timeshighereducation.com/world-university-rankings/2018/reputation-ranking səhifəsindən tanış olmaq olar.

Oruc MUSTAFAYEV

Azərbaycan müəllimi.- 2018.- 8 iyun.- S.9.