“Mən Qarabağı çəkirəm”

İsmət Mirzəli: “Rəsmlərimdə milli üsluba üstünlük verirəm”

Oxucularımıza təqdim etdiyim növbəti həmsöhbətim İsmət Mirzəli də başqa həmyaşıdları kimi istedad və bacarığı ilə diqqəti cəlb edən, məşğul olduğu rəsm dərnəyində, təhsil aldığı məktəbin seçilən nümunəvi bir şagirddir. Çoxlu sayda respublika və beynəlxalq müsabiqələrin birincilik sevincini yaşayan yeniyetmə rəssamın yaratdığı canlı tablolara baxanda qürur hissi keçirməmək mümkün deyil. Bəli, estafeti bu gün yaradıcı yeniyetmə və gənclər həvəslə davam etdirir. Klassik rəssamlıq sənətinin sirlərini öz fırçalarında yaşadan istedad sahiblərindən biri olan İsmətlə növbəti məşğələdən sonra elə dərnəyin qarşısındaca görüşüb söhbətləşdik. Dilli-dilavər qız danışdıqca sanki əsl sənət adamı ilə həmsöhbət olduğumu zənn edirdim.

5 yaşımda artıq rəsm dərnəyinin üzvü idim

2004-cü ildə Bakıda anadan olmuşam. Rəsm çəkməyə həvəs məndə 4 yaşımda yaranıb. Atam mənə çoxlu rəngli karandaşlar alırdı. Mən də onlardan məharətlə istifadə edərək qeyri-adi rəsmlər çəkirdim. Uşaq bağçasında çəkdiyim “Qız”, “Ana”, “Meşə”, “Təbiət mənzərələri” rəsmlərim tərbiyəçi müəllimlərimin xoşuna gəlirdi. Valideynlərim bu marağımı görüb məni 6 yaşımdan 3 nömrəli Uşaq-Gənclər İnkişaf Mərkəzinin rəsm dərnəyinə yazdırdılar və elə o gündən də həmin dərnəkdə məşğul oluram. Bu sənətin sirlərini, dərin fəlsəfəsini isə sonradan rəsm müəllimim Nərmin Abdullayeva mənə mənimsədib. Hazırda müxtəlif mövzularda çəkdiyim 150-dən artıq rəsm əsərim var. 2017 -ci ildə yağlı boya ilə işlədiyim “Hind qızı” rəsmim isə parlaq yaradıcılıq nümunəm sayıla bilər.

Qızıl medal qazandım

Təvazökarlıqdan uzaq olsa da deyəcəyəm ki, həmin rəsmdən özüm də zövq aldım. Müəllimim Nərmin xanım da onu çox bəyənmişdi. Biz yanılmamışdıq, çünki məhz həmin rəsm əsərim Hindistanda keçirilən beynəlxalq gənclər və uşaqların rəsm sərgisində I yeri qazandı və qızıl medala layiq görüldüm. Elə sevinirdim ki! Bu, mənim ilk mükafatım idi. Özü də qızıl medal, I yer. Əlbəttə ki, bu uğurum məni daha da yaxşı çalışmağa , daha məsuliyyətli olmağa ruhlandırdı. Qeyd edim ki, uğurlarıma müəllimimlə bərabər anam da sevinir. Çünki həvəskar rəssam olan anamın da üzərimdə zəhməti az olmamışdı və bu gün də var. O, həmişə evdə işləyərkən rəngləri seçməkdə mənə dəstək olur. Deyir ki, qızım, mənim arzularımı sən gerçəkləşdirirsən. Sən mənim xoş xəyallarımın gerçək bir nümunəsisən.

Sevincimdən özümə yer tapa bilmirdim

2017-ci il yanvarın 29-da 3 nömrəli Uşaq-Gənclər İnkişaf Mərkəzinin yetirmələrinin mükafatlandırma mərasimi keçirilirdi. Mən də həmin tədbirdə iştirak edirdim. Mərkəzimizin direktoru Lalə Qəti yetirmələrinin beynəlxalq yarışlarda qazandığı uğurlardan bəhs etdi. Bildirdi ki, mərkəzin yetirmələri beynəlxalq müsabiqələrdə birincilik qazanaraq qızıl medala, diplomlara layiq görülüblər. Adımı direktorun dilindən eşitcək, həyəcanlandım. Doğrusu, sevincimdən özümə yer tapa bilmirdim. Həmin gün mükafatlandırma mərasimi olduqca maraqlı keçdi, unudulmaz anlar yaşadım. Qaliblərə medal, diplom və hədiyyələr təqdim etdilər. Mərkəzin “Azəri inciləri” rəqs qrupunun ifasında milli və dünya rəqslərindən ibarət musiqi nömrələri təqdim olundu.

“Mənim Azərbaycanım” rəsm müsabiqəsinin qalibi oldum

Məndə fantaziya güclüdür. Bir əsəri işləyərkən xeyli düşünürəm. Təbii olaraq çalışıram ki, çəkdiyim hər bir rəsm bəyənilsin, onları seyr edən tamaşaçı xəyallara dalsın, düşünüb-daşınsın, mənim xəyal dünyamın qanadlarında nağıl dünyalarına qovuşsun. Müxtəlif illərdə keçirilən rəsm sərgilərinə qatılmışam və uğurlar qazanmışam. “Mənim Azərbaycanım” adlı rəsm müsabiqəsində rəsmlərim bəyənildi və fəxri fərman qazandım. Bu rəsmimdə rəngli boyalardan daha çox istifadə etmişdim. Rəfiqələrim Mələk, Əzəmət də mənimlə idilər. Onlar da tez-tez beynəlxalq rəsm müsabiqələrinə qatılırlar.

Məktəbimin adını ucaltmışam

Eşidəndə ki, ölkəmizdə “Dostluğun sehri” adlı II beynəlxalq uşaq rəsm müsabiqəsi keçiriləcək, sevindim. “Ölkəmizin adət və ənənələri” rəsmimi təqdim etdim, III yeri tutdum və diplomla mükafatlandırıldım. Müəllimlərim, dostlarım, hər kəs məni təbrik etdi. Çiçək dəstələri, bukletlər, hədiyyələr təqdim etdilər. Qürur duyuram ki, təhsil aldığım məktəbin adını ucaltmışam və sevimli Nərmin müəllimimin etimadını doğrultmuşam. O da zəhmətinin hədər getmədiyinə, qazandığım uğurlara mənim qədər sevinir, bütün istedadlı şagirdləri ilə fəxr edir.

“Gələcəyi necə görürəm?”

Belarusda keçirilən “Gələcəyi necə görürəm?” adlı sərgidə də nümayiş olunan rəsmlərim sərgiyə baxmağa gələnlərin, münsiflər heyətinin diqqətini daha çox cəlb etdi və I yerə layiq görüldü. Bu əsərdə rənglərdən məharətlə istifadə etmişdim. “IV İslam Həmrəyliyi Oyunlarına dəstək olaq” adlı tədbirdə də iştirak edərək diplomla mükafatlandırıldım. Rəssamlıq sənəti istedad tələb edən məsuliyyətli, incə, həssas bir sahədir. Rəsmlərimdə milli üsluba, qrafikaya daha çox üstünlük verirəm. Arzu və istəklərimi çəkdiyim rəsmlərdə ifadə etməyə çalışıram və müəyyən qədər nail də oluram.

“Belə bir şəhər var idi”

Fransada keçirilən “Azərbaycan nağılları” rəsm sərgisinə göndərdiyim “Tıq-tıq xanım” rəsmim də diploma layiq görüldü. Xocalı soyqırımının 25-ci ildönümünə həsr olunmuş “Mən Qarabağı çəkirəm” rəsm müsabiqəsində II yeri qazandım. Rəsmlərimdə vətənpərvərlik mövzusunu daha qabarıq şəkildə təsvir etmişdim. Nizami rayon ümumtəhsil məktəblərinin şagirdləri arasında keçirilən “Xocalı soyqırımını unutma” adlı rəsm müsabiqəsində “Belə bir şəhər var idi” ürəkdağlayan rəsmim tamaşaçıları heyrətləndirdi və II yeri qazanaraq diplomla mükafatlandırıldım.

Ən böyük arzum fərdi sərgimi görməkdir

Çalışacağam gələcəkdə beynəlxalq müsabiqələrə tez-tez qatılım. Hər bir rəssamın ən böyük arzusu əsərlərinin, yaradıcılıq nümunələrinin sərgisini keçirməkdir. Fərdi sərgimi nəzərdə tuturam. Onu necə arzuladığımı inanın ki, sözlə ifadə edə bilmirəm. Ancaq bunun üçün də öz üzərimdə səylə çalışıram. Yəni bu, sadəcə bir arzu deyil, zəhmətimin bəhrəsini görmək arzusudur.

Yeri gəlmişkən qeyd edim ki hazırda paytaxtdakı 229 nömrəli tam orta məktəbin IX sinfində təhsil alıram. Humanitar elmlərə daha çox maraq göstərirəm. Arzum orta məktəbi bitirdikdən sonra Dövlət Rəssamlıq Akademiyasına qəbul olunmaqdır.

Sifai SƏFƏROVA

Azərbaycan müəllimi.- 2019.- 15 mart.- S.13.