Ali məktəb tələbələri arasında informatika üzrə respublika olimpiadasının I seçmə mərhələsi keçirilib

Heydər Əliyev Fondu, Rabitə və İnformasiya Texnologiyaları və Təhsil nazirlikləri, AMEA-nın İnformasiya Texnologiyaları İnstitutunun birgə təşkilatçılığı ilə ali məktəb tələbələri arasında Dünya Telekommunikasiya və İnformasiya Cəmiyyəti Gününə həsr olunan informatika üzrə ümumrespublika olimpiadası keçirilir.

"Xüsusi istedada malik olan uşaqların yaradıcılıq potensialının inkişafı üzrə Dövlət Proqramı (2006-2010-cu illər)"na müvafiq olaraq təşkil edilən bu tədbir gənclərin İKT biliklərinin daha da təkmilləşdirilməsi, informatika və proqramlaşdırma sahəsində istedadlı tələbə və məktəblilərin aşkara çıxarılması və onlara dəstək məqsədləri daşıyır.

Aprelin 5-də Qafqaz Universitetində olimpiadanın I seçmə mərhələsi olmuşdur.

Olimpiadada 7 ali təhsil müəssisəsinin tələbələrindən və müsabiqədənkənar Azərbaycan Türk özəl və Bakı özəl Türk liseyləri məktəblilərindən ibarət 31 komanda iştirak etmişdir.

Tədbirdə çıxış edən Rabitə və İnformasiya Texnologiyaları Nazirliyinin İnformasiya cəmiyyətinin inkişafı şöbəsinin müdiri R.Gülməmmədov, Qafqaz universitetinin mühəndislik fakültəsinin dekanı H.Orucov və b. İKT-nin bütün fəaliyyət sahələri ilə yanaşı, təhsil sistemində də tətbiqi istiqamətində aparılan işləri yüksək qiymətləndirmiş, olimpiadanın gənclərin informatika və proqramlaşdırma sahəsində hazırlıq səviyyəsini aşkara çıxarmaq, bu sahədə biliklərini daha da artırmaq və s. baxımından mühüm əhəmiyyət kəsb etdiyini söyləmişlər. İnformatika və proqramlaşdırma sahəsində xüsusi istedadları olan gənclərin sayının ölkəmizdə ildən-ilə artdığı, qlobal informasiya cəmiyyətinin formalaşdığı şəraitdə bunun müsbət hal olduğu, bu kimi tədbirlərin keçirilməsinə böyük ehtiyac duyulduğu bildirilmişdir. çıxışçılar olimpiadada iştirak etmək istəyənlərin sayının əvvəlki illərlə müqayisədə bu il üstünlük təşkil etdiyini qeyd edərək, yarış iştirakçılarına uğurlar diləmişlər.

Olimpiadanın əsasnaməsinə uyğun olaraq I seçmə mərhələsində balların 30 faizini toplamış 17 komanda (Bakı Dövlət Universitetinin 4 - "Overflo", BSU 1, "Oscar" və ENG 1, Azərbaycan Dövlət Neft Akademiyasının 3 - ADNA 1, "Leker" və "Alfa", Azərbaycan Texniki Universitetinin "Tornado", Qafqaz Universitetinin 5 - "Qafqaz şahinləri", "Qafqaz U2", "Qafqaz U7", "Qafqaz U4" və "Qafqaz U3", Naxçıvan Dövlət Universitetinin NDU 2, Azərbaycan-Türk özəl Liseyinin 2 - "Olischool" və ATOL, Bakı özəl Türk Liseyinin "Chipmunks" komandası) final mərhələsinə vəsiqə qazanmışdır. Olimpiadanın final mərhələsi mayın 3-də AMEA-nın İnformasiya Texnologiyaları İnstitutunda keçiriləcəkdir.

Y.ƏLİYEV

Azərbaycan qəzeti.-2009.-10 aprel.-S.1.