“Ən yaxsı ümumtəhsil məktəbi" və “Ən yaxşı müəllim" müsabiqələrinin ilk mərhələsi basa catdı

Təhsil Nazirliyindən aldığımız məlumata əsasən, "Ən yaxşı ümumtəhsil məktəbi" və "Ən yaxşı müəllim" müsabiqələrinin I mərhələsi artıq başa çatıb.

"Ən yaxşı müəllim" müsabiqəsində iştirak etmək üçün Təşkilat Komitəsinə 450 nəfər müraciət edib. Müsabiqənin keçirilməsi ilə bağlı təsdiq olunmuş "Qaydalar"a uyğun olaraq Təhsil Nazirliyində yaradılmış işçi qrupu onların sənədlərinin ekspertizasını aparıb və şərtlərə uyğun gəlmədiyi üçün 4 nəfərin (direktor müavini, psixoloq, pedaqoji iş stajı az olan, əsas iş yeri məktəb olmayan) adı siyahıdan çıxarılıb.

Sənədləri qəbul olunmuş müəllimlərin göstəriciləri müvafiq əmsallar tətbiq edilməklə 16 parametr üzrə qiymətləndirilib və müvafiq bal toplayan 217 nəfər növbəti mərhələyə buraxılıb. Həmin müəllimlər II mərhələdə sınaq dərsi deməlidirlər.

Müvafiq bal toplayan 217 nəfər arasında ibtidai sinif müəllimləri çoxluq təşkil edir. Onların sayı 46 nəfərdir. İştirakçılardan 44-ü ingilis dili, 27-si tarix, 18-i Azərbaycan dili və ədəbiyyat, 19-u riyaziyyat, 15-i biologiya, 10-u fizika, 8-i coğrafiya, 10-u kimya, 6-sı informatika, 4-ü rus dili müəllimidir. Alman dili, fransız dili, musiqi, fiziki tərbiyə və iqtisadiyyatın əsasları fənlərinin hər birini 2 müəllim təmsil edir. Bu dəfə də müsabiqədə ən çox müəllim Bakı şəhərindəndir. Onların sayı 86 nəfərdir. İddiaçılar arasında Təhsil Nazirliyinin tabeliyindəki məktəbləri 30, Sumqayıt məktəblərini 21, İsmayıllı rayonunu 6, Gəncə şəhəri, Abşeron, Bərdə və Zaqatala rayonlarının hər birini 5 müəllim təmsil edir.

Aprelin 20-dən etibarən "Ən yaxşı müəllim" müsabiqəsinin ikinci mərhələsində iştirak edən 217 müəllimin sınaq dərslərinin dinlənilməyə başlanılması nəzərdə tutulur.

"Ən yaxşı ümumtəhsil məktəbi" müsabiqəsində isə iştirak etmək üçün müraciət etmiş 139 məktəbin Təhsil Nazirliyində yaradılmış işçi qrupu tərəfindən göstəriciləri müəyyən edilmiş şərtlər daxilində müvafiq əmsallar tətbiq olunmaqla 17 parametr üzrə qiymətləndirilib. Təşkilat Komitəsinin qərarı ilə 139 məktəbdən 105-nin ikinci mərhələyə buraxılması məqsədəuyğun hesab edilib.

Kərimova Samirə

Azərbaycan müəllimi.-2009.-17 aprel.-S.1.