"Azərbaycan məktəbi" jurnalının 85 illiyinə həsr olunmuş tədbir

Dekabrın 29-da Təhsil Nazirliyində "Azərbaycan məktəbi" jurnalının 85 illik yubileyi ilə əlaqədar tədbir keçirildi. Tədbirdə nazirliyin bütün aparat işçiləri ,Azərbaycanın tanınmız ziyalıları və KİV nümayəndələri iştirak edirdilər.

Tədbiri giriş sözü ilə təhsil naziri Misir Mərdanov açaraq bildirdi ki, bu gün buraya bir əsrə yaxın şərəfli ömür sürmüş, Azərbaycanın maarif, təhsil, pedaqoji fikir və milli mətbuat səhifələrində öz dəst- xətti ilə seçilən "Azərbaycan məktəbi" jurnalının 85 illik yubileyinin keçirilməsi üçün toplaşmışıq.Hesab edirəm ki, "Azərbaycan məktəbi"nin yubileyi təhsilimizin tarixində əhəmiyyətli hadisədir, həm də təhsilimizin mühüm, mürəkkəb bir dövrünü xatırladan şərəfli səhifələrdən biridir.

Azərbaycan təhsil sisteminin, Azərbaycan maarifçiliyi və pedaqoji fikrinin daşıyıcısı olan pedaqoji mətbuatımızın ön sıralarında gedən " Azərbaycan məktəbi"nin əvəzsiz xidmətləri təhsilimizin tarixinin ayrılmaz tərkib hissəsidir, deyən təhsil naziri Misir Mərdanov on il bundan əvvəl jurnalın 75 illik yubileyinin təntənəli şəkildə keçirildiyini vurğuladı. İki yubileyi ayıran onillik zaman kəsiyində müstəqil Azərbaycan dövləti sürətlə inkişaf etmiş, dünya ölkələri sırasında özünəməxsus layiqli yer tutmuşdur.Əsası ümummilli liderimiz Heydər Əliyev tərəfindən qoyulan və bu gün Prezident İlham Əliyev tərəfindən uğurla həyata keçirilən siyasət nəticəsində ölkəmizdə siyasi sabitlik və iqtisadiyyatın dinamik inkişafı bərqərar olmuş, respublikada aparılan əsaslı, düşünülmüş islahatlar öz bəhrəsini vermiş və bütün sahələrdə olduğu kimi, təhsil sahəsində də ciddi dəyişikliklər əmələ gəlmişdir.

Təhsil naziri Misir Mərdanov onu da qeyd etdi ki, 85 il sərasər Azərbaycan maarifinin, təhsilinin problemlərini öz üzərinə götürən, böyük pedaqoq alimlərin, qabaqcıl maarif fədailərinin köməyilə elm, maarif ziyasını Azərbaycan pedaqoji ictimaiyyəti arasında yaymaq kimi şərəfli yol keçən "Azərbaycan məktəbi" jurnalı bu günə kimi həmişə öz stabil mövqeyi ilə gənc mətbuat orqanlarımız üçün örnək olmuşdur.

Təhsil naziri Misir Mərdanov bu yubiley münasibətilə "Azərbaycan məktəbi" jurnalının əməkdaşlarını təbrik etdi və redaksiya heyətinin qarşısında durun vəzifələrdən söz açdı.

Sonra "Azərbaycan məktəbi" jurnalının baş redaktoru, filologiya elmləri namizədi, əməkdar müəllim Nəcəf Nəcəfov çıxışında dedi ki, "Azərbaycan məktəbi" jurnalı ölkənin ən mürəkkəb zamanlarında təhsilimizə dayaq olmuş, pedaqogikamızın, məktəbimizin keşiyində duraraq onu yad təsirlərdən qoruyub saxlamaq əzmindən geri çəkilməmişdir.

Bildirməliyəm ki, indiyədək "Azərbaycan məktəbi" jurnalına Rüstəm Hüseynov, Əkbər Mirzəyev, Əjdər Ağayev və Zəhra Əliyeva kimi respublikanın tanınmış ziyalıları başçılıq etmişlər.

Bu gün də "Azərbaycan məktəbi" jurnalı yüzlərlə müəllimin dostu, həmkarı olmaqla, həm də yeni fikirlərin, qabaqcıl təcrübənin, innovasiyalar və texnologiyaların təbliğatçısı və tədqiqatçısı kimi fəaliyyət göstərir.

Tədbirdə iştirak edən pedaqoji elmlər doktoru, professor Ə.Ağayev, pedaqoji elmlər doktoru, professor Y.Kərimov, akademik H.Əhmədov və başqaları da "Azərbaycan məktəbi" jurnalının 85 illik yubileyi münasibətilə öz ürək sözlərini dedilər və jurnalın bütün əməkdaşlarını yubiley münasibətilə təbrik etdilər.

Sonda təhsil naziri Misir Mərdanov yubiley münasibətilə "Azərbaycan məktəbi" jurnalının baş redaktoru Nəcəf Nəcəfova, baş redaktorun müavini Nəsrəddin Musayevə respublikanın "Qabaqcıl təhsil işçisi" döş nişanını və bir qrup əməkdaşa isə Fəxri fərmanlar təqdim etdi.

Şakir CƏFƏROV

Azərbaycan müəllimi.-2009.- 31 dekabr.-S.3.