Uşaqlar üçün xeyriyyə tədbiri

Noyabrın 28-də Respublika İncəsənət Gimnaziyasının müəllim və şagirdləri, valideynlər müqəddəs Qurban bayramı münasibətilə Türkan qəsəbəsində yerləşən E. Mirzəyev adına nitqi qüsurlu uşaqlar üçün Respublika xüsusi internat məktəbində olmuşlar.

Qeyd edək ki, gimnaziyanın xeyriyyə tədbirləri artıq ənənə halını alıb. Hər il təhsil müəssisəsinin kollektivi milli bayramlarda ayrı-ayrı internat məktəblərində olur, uşaqların vəziyyəti ilə maraqlanır, onlara ərzaq aparır, konsert proqramları ilə könüllərini oxşayırlar.

Bu dəfə də ənənəyə sadiq qalan Respublika İncəsənət Gimnaziyası bayram sovqatları və müxtəlif səhnəciklərlə uşaqların qarşısına çıxdı. Təhsil müəssisəsinin teatr şöbəsinin müdüri Hicran Sadıqzadə öz yetirmələri Mirböyükağa Abasov, Pərviz Abbasov, Mehdi Kərimovla birlikdə N. Vəzirovun "Dələduz" komediyasından bir parça nümayiş etdirdilər.

Teatr parçalarının quruluşcu rejissoru, teatr şöbəsinin müəllimi Yaqut Mehdiyeva şagirdləri Mirböyükağa Abasov və Günel Sadıqova ilə birlikdə Soltan Məcid Qənizadənin "Xor-xor" əsərindən bir parçanı məharətlə nümayiş etdirərək tədbir iştirakçılarının diqqətini qazandılar.

Xalq çalğı alətləri şöbəsinin şagirdi Urfan Cəfərov qarmon müəllimi Aydın Ağayev və nağara müəllimi Azər Nəzərovun müşayiəti ilə xalq və bəstəkar mahnılarını məharətlə ifa etdi.Ülviyyə Bəşirzadə və Nigar Bağırova milli rəqslərimizdən olan "Tərəkəmə", "Güllərim" və "Qaval" rəqslərini ifa edərək hamının diqqətini cəlb etdi.

Qeyd edək ki, tədbirin daha da rəngarəng və maraqlı keçməsində xeyriyyəçi valideyn Gülnar Məmmədovanın da böyük əməyi olmuşdur.

Rəşad ZİYADOV

Azərbaycan müəllimi.-2009.-4 dekabr.-S.5.