Bizim planet gələcəkdə

Noyabrın 25-də Laçın rayonu 6 nömrəli məktəbdə "Bizim planet gələcəkdə" adlı ekoloji tədbir keçirildi.

Tədbirin məqsədi məktəblilərdə ekoloji təlim-tərbiyənin gücləndirilməsinə, ekoloji maarifləndirmə və təbiətin qorunmasına yönəldilmişdir.

Məktəblilərin rəsm, tikmə və təbii materiallardan hazırlanmış əl işlərindən ibarət sərginin açılışından sonra Azərbaycan Dövlət himni səsləndi. Məktəbin direktoru Rahib Əzimov tədbir iştirakçılarını salamlayaraq tədbirin məqsəd və məramını bir daha diqqətə çatdırdı. Laçın rayonu 6 nömrəli məktəbin "Yaşıl Patrul" dəstəsinin hərbi salamı maraqla qarşılandı. Sonra məktəblilərin ekoloji çıxışlarına start verildi.

Məktəblilərdən Şahmur Muradov, Lalə Ağazadə və Ləman Əliyeva (VII "A" sinfi), Röya Muradova, Əfsanə Zülfüqarlı, Şükufə Məmmədova, İmran İsmayılov, Əli Əliyev, Aysel Aslanova və (VII "B" sinfi) Əlisahib Mehdixanlı "Erməni təcavüzü nəticəsində işğal altında qalan torpaqlarımızın bugünkü ekoloji durumu", "Nadir ağac və bitkilər", "Azərbaycanın fauna və florası ilə tanışlıq", "Təbiət tarixi kolleksiyaları", "Bizim planet gələcəkdə", "Həyata ekoloji baxış" və s. adlı ekoloji referatlar səsləndirdilər.

Daha sonra bacarıqlı şagirdlər "Ekoloji bədii gecə" səhnəcik və şeir nümunələri ilə çıxış etdilər.

Planetimizi ekoloji problemsiz və aydın səmalı görmək arzusu ilə məktəblilər səmaya azadlıq quşu olan ağ göyərçin uçurtdular.

Tədbirin sonunda "Biomüxtəlifliyin davamlı idarəolunması - Cənubi Qafqaz" layihəsinin rəhbəri, doktor Kristian Cönner, alman bio - ekoloqu doktor Hartmurt Müller, Təhsil Nazirliyinin şöbə müdiri Ağababa İbrahimov çıxış edərək "Bizim planet gələcəkdə" adlı ekoloji tədbirlə bağlı fikir və təkliflərini məktəblilərlə bölüşdülər.

Tədbirdə fəal iştirak edən bir qrup şagirdə diplom və hədiyyələr təqdim olundu.

Mətanət RZAYEVA

Azərbaycan müəllimi.-2009.-4 dekabr.-S.8.