"Dünya sənin, dünya mənim, bizlər isə bu Vətənin"

Dekabrın 5-də 201 nömrəli orta məktəbdə "Uşaq ili"nə həsr olunmuş "Dünya sənin, dünya mənim, bizlər isə bu Vətənin" adlı tədbir keçirilmişdir.

Mərasimdə Nizami Rayon İcra Hakimiyyətinin başçısı Tahir Budaqov, təhsil nazirinin müavini Elmar Qasımov, Bakı şəhər İcra Hakimiyyəti başçısının müavini Fidumə Hüseynova, Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova, Valideyn-Müəllim Assosiasiyasının prezidenti Təranə Şərifova, YAP Nizami Rayon Təşkilatının sədri Sədaqət Vəliyeva, H.Əliyev adına Neft Emalı Zavodunun direktoru Elman İsmayılov, Bakı Şəhəri üzrə Təhsil İdarəsinin müdir müavini Məhəbbət Qarabağlı, Azərbaycan Respublikası Ombudsman aparatının, qeyri-hökumət təşkilatlarının nümayəndələri, məktəb direktorları, müəllimlər, valideyn və şagirdlər iştirak edirdilər.

Məktəbin direktoru Süsən Salmanova iştirakçıları salamlayıb ölkəmizdə uşaqlara göstərilən diqqət və qayğıdan, onların təhsil alması üçün yaradılan şəraitdən danışdı.

Sonra söz şagirdlərə verildi. Onlar üzərlərinə düşən vəzifələrin Vətən qarşısında borclarından, müasir gəncliyə yiyələnməsi vacib olan keyfiyyətlərdən danışdılar. Onların ifasında maraqlı bədii proqram təqdim olundu. Şagirdlərdən Aysel Məmmədovanın, Aliyə Mürsəlovanın, Ləman Rəcəbovanın, Sevinc Quliyevanın, Kamran Tağızadənin, Faiq Xıdırovun, Səmayə Piriyevanın söylədikləri şeirlər, bayatılar, göstərdikləri tamaşalar, səhnəciklər tədbir iştirakçılarında xoş ovqat yaratdı.

Dil-ədəbiyyat müəllimi Simuzər Əhmədova "Uşaqlarımızı problemli dünyadan necə uzaqlaşdıraq, problemsiz dünya yoxdur, güvənc yerimiz Vətəndir" mövzusunda çıxış etdi.

Tədbirdə ümummilli lider Heydər Əliyevin, ölkə Prezidenti İlham Əliyevin, eləcə də Heydər Əliyev Fondunun prezidenti Mehriban xanım Əliyevanın və təhsil naziri Misir Mərdanovun müxtəlif vaxtlarda uşaqlarla görüşlərindən lentə alınmış bəzi məqamlar nümayiş olundu.

Ecazkar uşaq aləminin sehrinə düşən qonaqlar belə gözəl tədbirə görə məktəbin kollektivinə öz təşəkkürlərini bildirdilər.

Sonda şagirdlərə hədiyyələr verildi.

Sifai Səfərova

Azərbaycan müəllimi.-2009.-11 dekabr.-S.4.