Gimnaziyanın 50 illiyi qeyd olundu

Dekabrın 5-də Respublika İncəsənət Gimnaziyasında əsl bayram əhval-ruhiyyəsi vardı. Həmin gün gimnaziyanın yaranmasının 50 ili tamam olurdu. Bu münasibətlə təhsil ocağının akt zalında böyük tədbir keçirildi. Tədbirdə Təhsil Nazirliyinin şöbə müdüri Arif Muradov, nazirliyin baş məsləhətçisi Məhərrəm Səfərov, Misir Ərəb Respublikasının Azərbaycandakı fövqəladə səfiri, doktor Sabor Mənsur, Misir Mədəniyyət Mərkəzinin direktoru Adel Dərviş, veteran müəllimlər, məzunlar və digər qonaqlar iştirak edirdilər.

Tədbiri giriş sözü ilə açan gimnaziyanın direktoru Maya Şabanbəyova qonaqları, məzunları və vetaran müəllimləri salamlayaraq gimnaziya haqqında geniş məlumat verdi. Bildirdi ki, təhsil ocağı ilk vaxtlar internat məktəbi kimi fəaliyyət göstərib. Həmin illərdə respublikanın rayonlarından istedadlı uşaqlar doqquzuncu sinifdən bu məktəbə gələrək təhsil ocağında tədrisi davam etdirirdilər. İndi gimnaziya kimi fəaliiyət göstərən bu təhsil ocağı cəmiyyətə istedadlı və savadlı gənclər verir. Bu gün gimnaziyanın bəzi məzunları dünyanın qabaqcıl universitetlərində təhsillərini davam etdirirlər.

Sonra məktəbin fəaliyyəti haqqında film nümayiş olundu. Təhsil müəssisəsinin məzunları və şagirdləri bir-birindən maraqlı teatr səhnəciklərilə, musiqi nömrələrilə qonaqlara unudulmaz anlar yaşatdılar. Tədbirə gələnlər gimnaziyanın 50 illik yubileyi münasibətilə təhsil ocağının pedaqoji kollektivini təbrik etdi, şagirdlərə və məzunlara təhsil aldıqları gimnaziyanın adına layiq olmağı və həmişə onun adını uca tutmağı arzu etdilər.

Tədbirin sonunda qonaqlara gimnaziyanın teatr şöbəsinin müdiri Hicran Sadıqovanın bu təhsil ocağının 50 illiyinə həsr etdiyi "Əsrə bərabər ömür yolu" kitabı təqdim olundu.

Azərbaycan müəllimi.-2009.-11 dekabr.-S.6.