İSESKO-nun Baş direktoru akademik Zərifə Əliyeva adına məktəbdə olub

 

"Bakı - İslam mədəniyyətinin paytaxtı - 2009" Mədəniyyət ilinin açılışı ilə əlaqədar ölkəmizdə səfərdə olan İSESKO-nun Baş direktoru Əbdüləziz bin Osman əl-Tüveycri fevralın 20-də Bakıdakı akademik Zərifə Əliyeva adına orta məktəbə gəldi. Qonaq məktəbi gəzərək burada təhsil üçün yaradılmış şəraitlə tanış oldu. Təhsil naziri Misir Mərdanov hörmətli qonağa məlumat verərək bildirdi ki, ötən ildən fəaliyyət göstərən bu təhsil ocağı ancaq IX-XI sinifləri əhatə edir. Burada istedadlı şagirdlərə riyaziyyat-informatika, xarici dil təbiət fənləri təmayülü üzrə dərinləşdirilmiş təhsil verilir.

Qonaq öncə IX sinif şagirdlərinin məşğələ keçdikləri geniş sinif otağına baxdı. Onların təhsili ilə maraqlanan cənab Əbduləziz bin Osman əl-Tüveycri təhsilin bilik, elm, tərəqqi olduğunu vurğulayaraq hər bir dövlətin, xalqın öz təhsilini daha da təkmilləşdirməyə can atmasını zəruri saydığını bildirdi. O, Azərbaycanda təhsilə göstərilən böyük qayğını diqqəti yüksək qiymətləndirdi.

Sonra hörmətli qonaq onu müşayiət edən şəxslər məktəbin müasir avadanlıqlarla təchiz olunmuş kimya, fizika laboratoriyalarına, müəllimlər otağına baş çəkdilər. Məktəbin direktoru Məhəbbət Vəliyeva Təhsil Nazirliyinin tədris ocağına elektron lövhələr verdiyini qeyd edib, bunun təhsilin keyfiyyətli olmasına yardım göstərdiyini vurğuladı. Qonaq idman zalında uşaqların fiziki tərbiyə dərsini izlədi. Daha sonra pedaqoji heyətlə görüşən İSESKO-nun Baş direktoru məktəbə "Britiş council" təşkilatının xətti ilə İngiltərədən təcrübə mübadiləsinə gəlmiş 11 müəllimlə qısa söhbət etdi. Osman əl-Tüveycri bildirdi ki, bu mübadilə, ilk növbədə, bilik elm təcrübəsinin artmasna töhfə verəcək. İSESKO-nun Baş direktoru bu il paytaxt Bakının İslam mədəniyyətinin mərkəzi seçildiyini vurğuladı. Dedi ki, Bakıda keçirilən tədbir İslam ölkələrinin bir-birlərini daha yaxşı tanımaları üçün gözəl fürsətdir. O, konfransın dünya ölkələrinin dostcasına yaşamağa dəvət etmək üçün xüsusi vasitə olduğunu söylədi. Sonda məktəbdə gördüklərindən razılığını ifadə edən cənab Əbdüləziz bin Osman əl-Tüveycri xatirə kitabına ürək sözlərini yazdı.

 

Əliyev Y.

Azərbaycan müəllimi.-2009.-27 fevral.-S.2.