Təhsil naziri üç Asiya ölkəsində səfərdə olub

Səfər zamanı Malayziya, Sinqapur və Yaponiya ilə təhsil sahəsində əməkdaşlıq perspektivləri müzakirə olunub

Azərbaycan Respublikasının təhsil naziri, professor Misir Mərdanovun rəhbərliyi ilə Təhsil Nazirliyinin nümayəndə heyəti bu il mayın 20-dən iyunun 1-dək Malayziya, Sinqapur və Yaponiyada rəsmi səfərdə olub. Nümayəndə heyətinin tərkibinə təhsil nazirinin müavini E.Qasımov, nazirliyin şöbə müdiri və Beynəlxalq əlaqələr şöbəsinin bir əməkdaşı daxil idi. Səfər Malayziyanın ali təhsil nazirinin dəvəti və Azərbaycanın Yaponiyadakı səfirliyinin bu ölkənin Təhsil, Mədəniyyət və İdman Nazirliyi ilə razılaşdırılmış proqramı çərçivəsində həyata keçirilmişdir.

Səfərin məqsədi göstərilən ölkələrin təhsil sistemi ilə yaxından tanış olmaq, ali təhsil müəssisələrinin rektorları və bu ölkələrdə təhsil alan azərbaycanlı tələbələrlə görüşmək, xüsusilə də "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" çərçivəsində həmin ölkələrin ali məktəblərində həyata keçiriləcək tədbirləri və əməkdaşlıq perspektivlərini müəyyənləşdirmək idi.

Nümayəndə heyətimiz öncə Malayziyada olub. Yeri gəlmişkən deyək ki, Malayziya ən sürətlə inkişaf etməkdə olan müsəlman ölkəsidir. Burada 27 milyon əhali yaşayır. Nümayəndə heyətimiz bu ölkədə olduğu üç gün ərzində - 21-24 may tarixlərində bir sıra işçi görüşlər keçirmişdir. Məlumat üçün bildirək ki, Azərbaycan və Malayziya arasında təhsil sahəsində əlaqələr 6-8 oktyabr 2008-ci il tarixlərində İSESKO və Azərbaycan Respublikası Təhsil Nazirliyinin təşkilatçılığı ilə Bakıda keçirilmiş İslam ölkələrinin Ali və Elmi-Tədqiqat nazirlərinin IV konfransı zamanı Bakıda səfərdə olan Malayziyanın ali təhsil naziri Məhəmməd Xalid Bin Nordinlə keçirilmiş görüşdən sonra yeni mərhələyə qədəm qoymuşdur. 2008-ci ilin noyabrında Malayziya Ali Təhsil Nazirliyinin və Bakı Təhsil Məlumat Mərkəzinin təşəbbüsü ilə Bakıda Malayziya təhsil yarmarkası keçirilmişdir. Yarmarkanın məqsədi bütün maraq göstərən şəxsləri bir yerə toplayaraq onları Malayziya universitetlərində təhsil almaq imkanları barədə lazımi məlumatla təmin etmək idi. Onu da qeyd edək ki, Malayziyanın beş ali təhsil müəssisəsi yuxarıda göstərilən Dövlət Proqramı çərçivəsində Azərbaycan Respublikası Nazirlər Kabineti tərəfindən təsdiq olunmuş "Azərbaycan gənclərinin xaricdə təhsil almaları məqsədi ilə seçilmiş ali təhsil müəssisələrinin siyahısı"na daxil edilmişdir.

21 may 2009-cu il tarixində təhsil naziri Misir Mərdanov Malayziyanın ali təhsil naziri ilə görüş keçirmişdir. Görüşdə Ali Təhsil Nazirliyinin müvafiq qurumlarının rəhbərləri ilə yanaşı, bu ölkənin qabaqcıl ali təhsil müəssisələrinin rektorları da iştirak etmişlər. Danışıqların əsas mövzusu Malayziya tərəfindən təqdim olunmuş "Azərbaycan Respublikası hökuməti və Malayziya hökuməti arasında ali təhsil sahəsində əməkdaşlıq haqqında Anlaşma Memorandumu" layihəsinin və Azərbaycan gənclərinin Malayziya ali təhsil müəssisələrində təhsil almaq imkanlarının müzakirəsi olmuşdur. Görüş zamanı cənab Misir Mərdanov Malayziyanın ali təhsil nazirinin diqqətinə çatdırıb ki, hazırda qeyd olunan Anlaşma Memorandumu razılaşdırılma məqsədi ilə Azərbaycanın müvafiq dövlət qurumlarına göndərilmişdir. Görüşdə Malayziyanın ali təhsil nazirinin müavini və bir sıra universitetlərin rektorları tərəfindən bu ölkənin ali təhsil sistemi, eləcə də xarici tələbələrin Malayziyada təhsil alması ilə bağlı mövcud olan şərait və şərtlər barəsində nümayəndə heyətinə ətraflı məlumat verilib.

Cənab Bin Nordin Azərbaycan gənclərinin Malayziya universitetlərində təhsil alması təklifini dəstəkləyərək qeyd etmişdir ki, Malayziya tərəfi bu təklifin həyata keçirilməsi üçün lazımi tədbirləri görməyə hazırdır.

Yeri gəlmişkən qeyd edək ki, Malayziyada ali təhsil çox inkişaf edib. ölkənin bir neçə universitetinin adı dünyanın ən yaxşı universitetləri sırasına daxildir.

Həmin gün nümayəndə heyəti Kuala-Lumpurun Politexnik Kollecində olmuşdur. Kollecin direktoru və rəhbərliyi ilə aparılan müzakirələr zamanı bu ölkənin orta ixtisas təhsili haqqında ətraflı məlumat verilmiş və Azərbaycanın orta ixtisas təhsili müəssisələri ilə Malayziya kollecləri arasında birbaşa əlaqələrin yaradılması imkanları nəzərdən keçirilmişdir.

Malayziyaya səfər zamanı nümayəndə heyətimiz bu ölkənin ali məktəblərində təhsil alan iki azərbaycanlı gənclə də görüşüb. Onların biri Bakı Avropa Liseyinin məzunu Rəşad Məmmədov Malayziya Universitetinin magistraturasını bitirib. Hazırda doktorantura təhsilini başa vurmaqdadır. Hələ təhsilini başa vurmamış buradakı məşhur şirkətlərin birində çalışır. Səfər zamanı nümayəndə heyətimizə məlumat verilib ki, Cavad xanın kötücələrindən biri Malayziyada məşhur cərrahdır.

Sonra təhsil naziri üç gün ərzində Sinqapurda olub. Səfər zamanı nümayəndə heyəti bu ölkənin ali təhsil müəssisələrində təhsil alan səkkiz azərbaycanlı tələbə ilə görüşüb. Onlar 2005-2006-cı illərdə keçirilmiş beynəlxalq olimpiadaların qalibləridir. Hazırda Sinqapur Universitetində Sinqapur dövlətinin hesabına təhsil alan həmin tələbələrin Dövlət Proqramı çərçivəsində təhsillərini davam etdirmələri məsələsi görüş zamanı ətraflı müzakirə olunub.

27-31 may tarixlərində isə nümayəndə heyətimiz Yaponiyada olub. Səfər zamanı bu ölkənin Təhsil, Mədəniyyət, İdman, Elm və Texnologiya Nazirliyi, Tokio Milli Texnologiya Kolleci, Yaponiya Fondu və Tokio Universitetində işçi görüşləri keçirilib. Yaponiyanın təhsil, mədəniyyət, idman, elm və texnologiya naziri Ryu Şionoya ilə görüş zamanı Yaponiya ilə Azərbaycan arasında təhsil sahəsində əməkdaşlığın genişləndirilməsi, iki ölkə arasında təhsil sahəsində əməkdaşlıq haqqında sazişin imzalanması, eləcə də azərbaycanlı gənclərin Dövlət Proqramı çərçivəsində Yaponiyanın ali təhsil müəssisələrində təhsil alması və Yaponiya hökuməti tərəfindən azərbaycanlı gənclərin bu ölkədə təhsil alması məqsədi ilə qrantların ayrılması məsələləri müzakirə edilib. Təhsil naziri Misir Mərdanov görüş zamanı Azərbaycan Respublikası hökuməti adından ölkəmizin təhsil sisteminə Yaponiya tərəfindən göstərilən yardıma, azərbaycanlılar üçün müvafiq təqaüdlərin ayrılmasına, o cümlədən Azərbaycanın müxtəlif rayonlarında məktəb tikintisi və bərpası, orta məktəblərin lazımi avadanlıqlarla təmin olunması sahələrində, həmçinin Azərbaycanda İkinci Təhsil İslahatı Layihəsinin hazırlanmasına maliyyə yardımının edilməsi məqsədi ilə qrantın ayrılmasında göstərilən dəstəyə görə minnətdarlığını ifadə edib. Misir Mərdanov görüşdə Yaponiyanın təhsil, mədəniyyət, idman, elm və texnologiya naziri Ryu Şionoya Azərbaycan tərəfindən hazırlanmış və Yaponiya tərəfinə təqdim olunmuş təhsil sahəsində əməkdaşlıq haqqında sazişi imzalamaq üçün ölkəmizə dəvət edib.

Təhsil müəssisələrində növbəti görüşlərdən biri Tokio Universitetində olub. Bu universitetin rektoru ilə aparılan qarşılıqlı fikir mübadiləsi zamanı ali təhsil müəssisələrinin maliyyələşdirilməsi, təhsilin məzmunu, ali məktəblərin idarəolunması və tələbə qəbulu, tələbələrin biliklərinin qiymətləndirilməsi və universitetlərin reytinqinin müəyyənləşdirilməsi sistemi ilə bağlı məsələlər müzakirə olunub. Eyni zamanda azərbaycanlı gənclərin Dövlət Proqramı çərçivəsində Tokio Universitetində təhsil alması, yapon gənclərinin ölkəmizin ali təhsil müəssisələrində Azərbaycanşünaslıq üzrə təhsil proqramlarında iştirakı, müəllim və tədqiqatçı mübadiləsi, eləcə də İKT sahəsində Azərbaycan universitetləri ilə birbaşa əməkdaşlığın həyata keçirilməsi imkanları nəzərdən keçirilib.

Təhsil naziri Tokio Universitetində olarkən burada təhsilini davam etdirən Kərimova soyadlı azərbaycanlı tələbə ilə də görüşüb. Xəzər Universitetinin məzunu olan həmyerlimiz Asiya İnkişaf Bankının elan etdiyi proqramı udaraq Tokio Universitetində təhsilini davam etdirmək imkanını qazanıb. İndi o, bu universitetdə Azərbaycan üçün çox vacib olan ekologiya ixtisası üzrə magistraturada təhsil alır.

Yaponiyada olarkən nümayəndə heyətimiz bir peşə təhsili müəssisəsinə baş çəkib, Yaponiyanın ölkəmizdəki keçmiş səfiri Toşiyuki Fucivara ilə görüşüb.

Səfər çərçivəsində sonuncu görüş isə Yapon Fondunda keçirilib. Fondun prezidenti cənab Kazuo Oqoura onun fəaliyyəti haqqında nümayəndə heyətimizə ətraflı məlumat verib və Azərbaycanla Yapon Fondu arasında gələcək əməkdaşlığın qurulması ilə bağlı bir sıra təkliflər irəli sürüb. 1972-ci ildə Yaponiyanın Xarici İşlər Nazirliyi nəzdində yaradılmış və 2003-cü ildən müstəqil fəaliyyətə başlamış Yapon Fondu dünyada beynəlxalq mədəni mübadilə sahəsində müxtəlif layihələrin hazırlanması və həyata keçirilməsi istiqamətində geniş fəaliyyət göstərən ictimai təşkilatdır. Təşkilat Yaponiya dövləti tərəfindən maliyyələşdirilir və onun illik büdcəsi 1.130.000.000 ABŞ dolları həcmindədir. Yapon dilinin, mədəniyyətinin və iqtisadiyyatının öyrənilməsi ilə bağlı beynəlxalq layihələrin maliyyələşdirilməsi və həyata keçirilməsi Fondun əsas fəaliyyət istiqamətini təşkil edir.

Görüş zamanı Təhsil Nazirliyi ilə Yapon Fondu arasında Fondun dəstəyi ilə Azərbaycan-Yaponiya qardaşlaşmış məktəblər şəbəkəsinin yaradılması və Azərbaycan məktəblərində yapon dilinin tədrisinin təşkilində ekspert yardımının edilməsi, Yaponiyanın mədəniyyəti və iqtisadiyyatının öyrənilməsi məqsədi ilə bu ölkə tərəfindən təqaüdlərin ayrılması, eləcə də Fondun nəzdində fəaliyyət göstərən təlim mərkəzlərində azərbaycanlı müəllimlərin ixtisasartırma kurslarında iştirak etməsi barədə razılıq əldə olunub.

Bütövlükdə maraqlı keçən səfər Azərbaycanla qeyd olunan ölkələr arasında təhsil sahəsində əməkdaşlıq üçün geniş perspektivlərin olduğunu göstərib.

Y.ƏLİYEV

Azərbaycan müəllimi.-2009.-5 iyun.-S.2.