Orta ümumtəhsil məktəblərində buraxılış imtahanları başlandı

İyunun 3-də Şəki, Ağdaş, Ağsu, Balakən, Göyçay, İsmayıllı, Oğuz, Qax, Qəbələ, Quba, Qusar, Xaçmaz, Dəvəçi, Siyəzən, Xızı, Şamaxı, Ucar, Zaqatala, Saatlı, Sabirabad və Qobustan rayonlarının orta ümumtəhsil məktəblərinin XI siniflərində mərkəzləşdirilmiş qaydada buraxılış imtahanları keçirilib.

23 minədək şagirdin iştirak etdiyi imtahanlarda davamiyyət 90 faiz təşkil edib. Həmin rayonlar üzrə keçirilən imtahanda ötən dərs ilində qeyri-kafi qiymət almış şagirdlər də iştirak ediblər.

İyunun 8-də Gəncə, Mingəçevir və Naftalan şəhərləri, Ağdam, Ağstafa, Bərdə, Daşkəsən, Füzuli, Gədəbəy, Goranboy, Göygöl, Qazax, Samux, Şəmkir, Tərtər, Tovuz və Yevlax rayonlarında mərkəzləşdirilmiş qaydada buraxılış imtahanları keçiriləcək.

Bütün bölgələr üzrə keçirilən imtahanlar başa çatdıqdan sonra nəticələr və yekun attestat qiymətləri Təhsil Nazirliyinin rəsmi saytında yerləşdiriləcək.

Yusif ƏLİYEV

Azərbaycan müəllimi.-2009.-5 iyun.-S.1.