Bakı Şəhəri üzrə Təhsil İdarəsinə, Gəncə Şəhər Təhsil İdarəsinə, rayon (şəhər) təhsil şöbələrinə, nazirlik nəzdindəki ümumi təhsil müəssisələrinin direktorlarına

Azərbaycan Respublikası Prezidentinin 17 aprel 2006-cı il tarixli, 1414 nömrəli sərəncamı ilə təsdiq edilmiş "Xüsusi istedada malik uşaqların (gənclərin) yaradıcılıq potensialının inkişafı üzrə Dövlət Proqramı"na əsasən, ötən il olduğu kimi, 2009-cu ildə də riyaziyyat, fizika, kimya, biologiya fənlərindən xüsusi istedadı ilə fərqlənən şagirdlərin müəyyən edilməsi ilə bağlı müvafiq tədbirlər nəzərdə tutulur.

Bununla əlaqədar hər bir rayon və şəhərdə göstərilən fənlər üzrə istedadlı IX-XI sinif şagirdlərinin iştirakı ilə seçim turları keçirilməli, hər fəndən ən yaxşı nəticə göstərən 2-3 nəfərin adlı siyahısı (SAA, rayon (şəhər), məktəbin adı, fənn, sinif, təlim dili, müəllimin SAA) elektron variantı ilə birlikdə aprelin 20-dək nazirliyə göndərilməlidir.

Yekun seçim turu may ayında Bakı şəhərində təşkil olunacaqdır. Seçim turunda IX sinif şagirdləri ayrılıqda, X-XI sinif şagirdləri isə eyni qrupda komplektləşdiriləcəkdir. Bu və ya digər fənn üzrə istedadlı VIII sinif şagirdləri də seçim turunda IX sinif şagirdləri ilə birlikdə iştirak edə bilərlər. Tədbirin dəqiq keçirilmə vaxtı barədə sizə əlavə məlumat veriləcəkdir.

MƏRDANOV, Misir

Azərbaycan Respublikasının təhsil naziri

Azərbaycan müəllimi.-2009.-6 mart.-S.4.