"Narkomanlığın acı nəticələri" mövzusunda seminar-disput

Noyabrın 10-da Azərbaycan Müəllimlər İnstitutunda "Narkomanlığın acı nəticələri" mövzusunda seminar-disput keçirildi. Tədbirdə çıxış edən institutun rektoru, professor A.Naxçıvanlı dünyada sosial problemlər kontekstində diqqət mərkəzində olan narkomaniyanın törətdiyi faciələrdən danışdı.

İnsan psixologiyasını korlayan, onu cəmiyyətdən təcrid edən narkomaniya probleminin çox təhlükəli olduğu, onun qarşısının xüsusən yeniyetmə və gənclər arasında alınmasında kompleks tədbirlərin davam etdirilməsinin çox vacib olduğu qeyd olundu.

Çıxışlardan sonra "Narkomaniyaya son" başlığı altında geniş təqdimat oldu. Tələbələr tərəfindən rəğbətlə qəbul olunan təqdimatda narkomanların düşdüyü acınacaqlı vəziyyət, narkotik maddələrin insanlarda yaratdığı psixoloji gərginlik, asılılıq, xüsusilə qadınların taleyində xoşagəlməz hallar, acı fəsadlarla nəticələnən sonluqlar nümayiş etdirildi.

Azərbaycan müəllimi.-2009.-13 noyabr.-S.3.