Futbol üzrə I respublika turnirinin final mərhələsinin açılış mərasimi keçirildi

Noyabrın 23-də "Vətən" Respublika İxtisaslaşdırılmış Olimpiya Ehtiyatları Uşaq-Gənclər Futbol Məktəbinin meydançasında Təhsil Nazirliyinin nəzdində fəaliyyət göstərən uşaq-gənclər idman məktəbləri arasında I respublika turnirinin final mərhələsinin açılış mərasimi keçirildi.

Açılış mərasimində çıxış edən Təhsil Nazirliyinin şöbə müdiri Ağababa İbrahimov öncə keçirilən turnirin əhəmiyyətindən danışdı. Qeyd etdi ki, əsas məqsəd uşaq və yeniyetmələr arasında futbol idman növünün daha da inkişaf etdirilməsi və dostluq əlaqələrini möhkəmləndirməkdir.

Futbolun inkişafına göstərilən xüsusi dövlət qayğısını önə çəkən şöbə müdiri bu populyar idman növündə də azərbaycanlı yeniyetmələrin beynəlxalq səviyyəli yarışlarda qalib gəlmələrinin vaxtı çatdığını vurğuladı. Beynəlxalq Futbol Federasiyasının qaydalarına əsasən, 2 mərhələdə keçirilən turnirdə 13-14 yaşlı oğlanlar öz güclərini sınayırlar. ölkənin bütün regionlarını təmsil edən komandaların tərkibi 16 idmançı, 1 məşqçi və 1 nümayəndədən ibarətdir. Noyabrın 9-dan 15-dək keçirilən yarışların zona mərhələsində 73 idman məktəbinin komandası iştirak etmiş, hər zonada 1 və 2-ci yerləri tutan komandalar final mərhələsində oynamaq hüququ qazanmışlar.

Noyabrın 23-dən 29-dək keçiriləcək final oyunlarında I, II və III yerləri tutan komandalar Təhsil Nazirliyinin diplom və hədiyyələri ilə mükafatlandırılacaq.

Açılış mərasimindən sonra yarışlara start verildi.

Fazil İDRİSOĞLU

Azərbaycan müəllimi.-2009.-27 noyabr.-S.4.