Xalça Muzeyində 20 Yanvar faciəsinin ildönümünə həsr olunmuş tədbir keçirilib

Respublikamızda hər il 20 Yanvar faciəsi ümumxalq matəm günü kimi qeyd olunur. Həmin gün Şəhidlər Xiyabanını ziyarət etmək üçün milyonların axını baş verir.

Bu münasibətlə yanvarın 17-də Xalça Muzeyində keçirilən tədbirdə Nərimanov rayonu "Aytam" Uşaqların Maarifləndirilməsi İctimai Birliyindən, 200 və 36 saylı məktəblərdən və Nərimanov rayonu Baxça-məktəb-lisey kompleksindən olan şagirdlər iştirak ediblər. Baxça-məktəb-lisey kompleksindən məktəbin direktor müavini Xədicə Əliyeva, Əminə Abbasbəyli (tarix müəllimi) və Höküməxanım Bağıyeva uşaqların ədəbi-bədii kompozisiyasını hazırlayıblar. "Aytam" İctimai Birliyindən isə Aygün Zamanlının rəhbərliyi altında şagirdlər Vətənə sadiqlik, vətənpərvərlik ruhunda şeirlər söyləyiblər.

Şəhidlər bir dəqiqəlik sükutla yad edildikdən sonra tədbiri Xalça Muzeyinin şöbə müdiri Aygün Abbasova açaraq müəllim və iştirakçılara 20 Yanvar faciəsindən ətraflı məlumat verib. O qeyd edib ki, "1988-ci ildən başlanan milli azadlıq hərəkatı getdikcə geniş vüsət alırdı. Xalqımız bir nəfər kimi ayağa qalxaraq Sovet rejiminin əleyhinə çıxışlar edir və onu bir daha tanımaq istəmirdi. Əziz uşaqlar, sizə məlum olsun ki, 1990-cı ilin yanvar ayının 19-da axşam saatlarında rus qarnizonunun əsgərləri Bakıda Azərbaycan televiziyasının enerji blokunu partladaraq respublikaya televiziya verilişlərini dayardırdılar. Bu acı xəbər yalnız xalqa yanvarın 20-də səhər saat 7:00-da respublika radiosu ilə çatdırıldı.

Yanvarın 19-dan 20-nə keçən gecə 100-dən artıq vətəndaşımız öldürüldü. Şəhərdə tanklar, BTR-lər qarşılarına çıxan hər şeyi əzir, hər yeri qəddarcasına atəşə tuturdular. Küçədə olanlar, sərnişin avtobuslarında gedən, öz mənzillərində bu dəhşətli faciəni izləyən insanlar güllələrə tuş gəldilər. Hətta yaralılara kömək etmək üçün gələn təcili yardım maşınları və tibb işçiləri amansız atəşə tutulurdu. Həmin ərəfədə 137 nəfər öldürüldü, 700-dən çox adam yaralanaraq şikəst oldu, 800 günahsız vətəndaşımız həbs olundu. Yalnız yanvarın 20-də artıq bütün dünya Bakıda törədilmiş qanlı faciədən xəbər tutdu. Bu qanlı faciə Azərbaycan xalqına qarşı vəhşicəsinə həyata keçirilən terror aktı, insanlığa qarşı törədilən ən ağır cinayət kimi bəşər tarixində qara səhifə olaraq qalacaq".

Sonra şagirdlərə söz verilib. Baxça-məktəb-lisey kompleksindən gələn şagirdlər əllərində qırmızı qərənfillər, şəhidlərimizə, Vətənə, torpağa, igidliyə, qəhrəmanlığa həsr edilmiş şeirlərlə çıxış etdilər və tədbir iştirakçılarını kövrəldiblər.

Sonra direktor müavini Xədicə Əliyevaya söz verilib. O, öz çıxışında xüsusi olaraq qeyd edib ki, hər il məktəbimizdə belə tədbirə həsr olunmuş yığıncaqlar keçiririk və şagirdlərimizi Vətəni sevməyə, şəhidlərimizin göstərdikləri şücaəti, qəhrəmanlığı öyrənməyə, yaxşı oxumağa, Vətənə sadiq olmağa çalışırıq. O, xatırladıb ki, 1990-cı il 20 Yanvar qırğını nə qədər faciəli olsa da, Azərbaycan xalqının iradəsini, milli azadlıq uğrunda mübarizə əzmini qıra bilmədi. Bu qanlı faciəyə 1994-cü ildə xalqımızın ümummilli lideri Heydər Əliyevin ciddi səy və təşübbüsü sayəsində siyasi qiymət verildi və bu faciənin günahkarlarının adları açıq şəkildə bəyan edildi. Nərimanov rayonu "Aytam" Uşaqların Mədəni Maarifləndirilməsi İctimai Birliyindən olan şagirdlər öz çıxışları ilə hamının diqqətini cəlb edib. Qara yaylıq bağlayan qızlar və qara formada olan şagirdlər çox həyəcanlı və kövrələrək çıxış ediblər. Göz yaşlarını saxlaya bilməyən iştirakçılar və şagirdlər and içiblər ki, şəhidlərimiz kimi onlar da Vətəni sevəcək, torpaqlarımızı göz bəbəyitək qoruyacaqlar. Həmin birliyin üzvlərindən biri olan Aygün Zamanlı çıxış edərək qeyd edib ki, bu faciə heç vaxt xalqımızın yaddaşından silinməyəcək və tarixə qızıl hərflərlə yazılacaq. Aygün müəllimə çox təsirli çıxış edib və bu faciəni törədənləri lənətləyərək onların nə vaxtsa öz cəzalarına çatacaqlarını bildirib.

Tədbirdə Azərbaycan Respublikası Mədəniyyət və Turizm Nazirliyinin nümayəndəsi Əli müəllim iştirak edib. O, tədbir iştirakçılarına, tədbirə gələnlərə təşəkkürünü bildirib və deyib: "Bu qanlı faciə təkcə azərbaycanlılara qarşı deyil, həm də insanlığa qarşı cinayətdir. Hələ 1905-1907,1918-1921,1937-1948-1953-1988-ci illərdə baş verən faciələrdə günahsız insanlar gülləbaran edilib. Belə faciələr Şamaxıda, Qubada, Şəkidə, Naxçıvanda, Zəngibasarda və Gəncədə də təkrarlanıb. Ümidvarıq ki, prezident İlham Əliyevin yürütdüyü məqsədyönlü siyasət nəticəsində bu hadisələr beynəlxalq təşkilatlar tərəfindən qanlı terror aktı kimi qiymətləndiriləcək.

Hacı Tofiq

Azad Azərbaycan.- 2009.- 20 yanvar.- S. 7.