Kino və teatrın sonuncu mogikanlarından biri

Yaşar Nuri alqışlarla son mənzilə yola salındı

Azərbaycan xalq artisti, Akademik Milli Dram teatrının aktyoru Yaşar Nuri dünən səhər saatlarında vəfat edib. Xalq artisti uzun müddət idi ağır xəstəlikdən əziyyət çəkirdi. 2008-ci ilin mayında Yaşar Nuri İstanbul klinikasında qara ciyərindən əməliyyat olunmuşdu. Aktyor 2009-cu ilin sonu, 2010-cu ilin əvvəlində İstanbulun “Memorial” xəstəxanasında müalicə alıb. Ötən ilin noyabrında onun səhhəti yenidən pisləşib. Bu dövr ərzində iki dəfə İstanbuldakı Amerikan xəstəxanasına yerləşdirilib, Bakı Mərkəzi Gömrük Hospitalında müalicə alıb.

Xalq artistiylə vida mərasimi saat 13:00-da uzun illər unudulmaz rollarla səhnəsinə çıxdığı Akademik Milli Dram Teatrında baş tutdu. Vida mərasiminə aktyorun ailə üzvləri, dostları və ictimaiyyət nümayəndələri qatılmışdı.

Xalq artisti Habil Əliyev Yaşar Nurinin onu bu qədər sevən insanların gözünü yaşlı qoyduğunu deyir: “Yaşar gözəl sənətkarımız idi, həm də gözəl insan idi. Yaşarın getməsi mədəniyyətimizə çox ağır itkidir. Yaşar getməklə mənim ölüm növbəmi əlimdən aldı. Gərək Yaşar yaşayaydı. O, yaşamalı Yaşar idi. Şeyx Sədinin belə bir deyimi var ki, Allahın elə işlərini bilirəm ki, desəm qan düşər. Onun elə biri də budur. Yaşarın getməsi bütün xalqa təsir etdi. Çünki o, bütün xalqın sevimlisi idi”.

Xalq artisti Amaliya Pənahova Yaşar Nuri ilə bir çox tamaşalarda, filmlərlə tərəf-müqabil olublar. “Yaşar deyəndə gözümün önünə onun gözəl obrazları gəlir. İstər komik, istər dramatik obrazlar. Tərəf-müqabil kimi həmişə ondan razı qalmışam. O, səhnədə nə qədər gülüşə yol verirdisə, tamaşaçıları bu gülüşlə öz dərdlərindən yayındıra bilirdisə, həyatda bir o qədər də ciddi idi. Amma onun özünün qəlbi problemlərlə dolu idi. Həyatdır, o bu dünyadan köçsə də, onun sənəti daim yaşayacaq. Nəsillər dəyişsə də, hər zaman onu yada salacaqlar. Allah rəhmət eləsin”.

Mərhumun ən yaxın dostlarından olan Firəngiz Mütəllimova onun qarşısında baş əydiyini dedi: “O çox gözəl sənətkar idi. Mən onun qarşısında baş əyirəm. Onu heç kim, heç vaxt əvəz edə bilməz”.

Firəngiz Mütəllibova Yaşar Nuri ilə bağlı danışarkən göz yaşlarını saxlaya bilmədi. Xalq artisti Rafiq Əzimov çıxışında Yaşar Nurinin Azərbaycan kino və teatrının sonuncu mogikanlarından biri olduğunu söylədi.

Vida mərasimində xalq artistinin qızı Ülviyyə Nuriyeva toplaşanlara ailəsi adından təşəkkür etdi: “Mən bu səhnəyə birinci dəfə deyil ki, çıxıram. Uşaqlığım bu teatrda, bu səhnədə keçib. Atamla bura tez-tez gələrdim. Atamı itirmək, onun yoxluğu bizim üçün çox ağırdır”.

Vida mərasimindən sonra Yaşar Nuri alqışlarla son mənzilə yola salındı.

Ömrünün son gününə qədər fəaliyyət göstərdiyi Akademik Milli Dram Teatrına onunla vidalaşmağa axışan yüzlərlə pərəstişkarı cənazə küçəyə çıxarılanda sevgilərini alqışları ilə nümayiş etdirdilər.

Xalq artisti II Fəxri xiyabanda dəfn olundu.

Yaşar Nuri 1951-ci il sentyabrın 3-də Bakıda anadan olub. Yaşar Məmmədsadıq oğlu Nuriyev Azərbaycan Dövlət İncəsənət İnstitutunun dram və kino aktyorluğu fakültəsində təhsil alıb.

Kurs rəhbərləri, tanınmış səhnə xadimləri Rza Təhmasib və Əliheydər Ələkbərovdan aktyorluq sənətinin incəliklərini öyrənib.

1974-cü ildə Akademik Milli Dram Teatrının baş rejissoru Tofiq Kazımovun dəvətilə bu kollektivin aktyor truppasına qəbul olunub. O, Milli Dram Teatrında işlədiyi illərdə repertuardan düşməyən 20-dən çox tamaşada yaddaqalan obrazlar yaradıb.

Bunların sırasında Sərsəm Salman (“Dəli yığıncağı”), Məşədi Oruc (“Ölülər”, C.Məmmədquluzadə), Əbdüləli bəy, (“Sevil”, C.Cabbarlı), Ağamusa Nağıyev (“Mesenat”, Ə.Əmirli), Kürən (“Xəcalət”, H.Mirələmov) Rəhman (“Fəryad”, B.Vahabzadə), İsgəndərzadə (“Ah, Paris... Paris!..”, Elçin), Xandəmir (“Afət”, Hüseyn Cavid) və s. xüsusi yer tutur.

Teatr aktyoru kimi görkəmli sənətkar olan Yaşar Nuriyev həm də mahir kino ustasıdır. Onun böyük populyarlıq qazandığı çoxlu ekran obrazları var. Vaqif Mustafayevin çəkdiyi “Yaramaz” bədii filmindəki Maşallah roluna görə Azərbaycan Respublikasının Dövlət mükafatı laureatı adına layiq görülüb. Azərbaycan Dövlət Televiziyasında hazırlanmış yüzdən çox tamaşada, bədii kompozisiyada, satirik səhnəciklərdə iştirak edib.

İstedadlı aktyor teatr sənətində böyük uğurlara görə Azərbaycan Respublikasının Lenin Komsomolu (1984), “Qızıl dərviş” (1992 və 1996) mükafatları laureatıdır. Səhnədə və ekranda yaratdığı parlaq obrazlara görə 1981-ci ildə Azərbaycan Respublikasının Əməkdar artisti, 1989-cu ildə Xalq artisti fəxri adlarına layiq görülüb. Bir neçə gün əvvəl isə “Şöhrət” ordeni ilə təltif edilmişdi.

Ramin DEKO

Azadlıq.- 2012.- 23 noyabr.- S.13.