Rəsulzadə Novxanıda möhtəşəm mitinqlə anıldı

Böyük öndərin abidəsi önündə onun ideyalarının tezliklə bərqərar olacağı elan edildi

Əli Kərimli: "Məhəmməd Əmin o qədər böyük şəxsiyyətdir ki, onun kölgəsini qılınclayanlar da yeri gələndə, onun kölgəsinə sığınırlar»

Azərbaycan Xalq Cümhuriyyətinin banisi Məhəmməd Əmin Rəsulzadənin doğum günü münasibətilə İctimai Palata və Demokratik Qüvvələrin Məşvərət Məclisinin təşkilatçılığı ilə dünən Novxanıda - böyük öndərin abidəsi qarşısında anım mərasimi keçirildi. Mərasim Novxanının əsas magistralının yanından Rəsulzadənin heykəli qarşısındakı parka qədər olan məsafədə yürüşlə başladı. Polislər maneçilik törətməsələr də, Çevik Polis Alayının xüsusi təyinatlı dəstələri Post-Patrul maşınları ilə qəsəbənin girişində və yaxınlıqdakı küçələrdə keşik çəkirdilər.

Anım mərasiminə qatılanların sayı əvvəlki illərdəkindən xeyli çox idi. Bu səbəbdən mərasim əzəmətli mitinqə çevrildi.

Dövlət himninin canlı ifasından sonra mitinqin aparıcısı, Müsavat Partiyası Mərkəzi İcra Aparatının rəhbəri Arif Hacılı hamını Rəsulzadənin doğum günü münasibətilə təbrik etdi. 31 yanvarın Azərbaycan xalqı üçün müqəddəs gün olduğunu deyən A.Hacılı həmçinin böyük öndərin gənc yaşlarından siyasi proseslərə necə qoşulmasından danışdı.

Rəsulzadə Azərbaycana təmənnasız xidmət

etmək nümunəsini yaradan şəxsiyyətdir!

Daha sonra söz AXCP sədri Əli Kərimliyə verildi. AXCP sədri Rəsulzadənin Azərbaycan xalqının taleyində və tarixində oynadığı böyük roldan danışdı, indiki iqtidarın bu tarixi şəxsiyyətə və ümumən Cümhuriyyət qurucularına biganə münasibətini, Cümhuriyyət ideyalarına hörmətsiz davranışını tənqid etdi:

“Bu gün biz dövlətimizin gerçək banilərindən biri, Azərbaycanın böyük oğlunu anmaq üçün bura gəlmişik.

Məhəmməd Əmin Rəsulzadə xalqa xidmətin nümunəsini yaratdı. O, çox gənc yaşlarından həm siyasi mübarizəyə, həm də ədəbi yaradıcılığa başlamış, çoxşaxəli fəaliyyəti olan böyük şəxsiyyətdir. Rəsulzadə həm jurnalist, həm yazar, həm ədəbiyyatşünas, əsasən isə böyük siyasətçi, ideoloq olaraq, bütün həyatını Azərbaycana, ölkənin haqq davasına həsr etmiş böyük bir şəxsiyyətdir.

Rəsulzadənin varlığıyla hamımız fəxr edirik. Təkcə bu şəxsiyyəti yetişdirdiyinə görə bu millətin haqqında heç kim aşağı fikirdə ola bilməz. Məhəmməd Əmin Rəsulzadə öz məsləkdaşları ilə elə bir həyat yolu keçib ki, bu gün də hamımız üçün qürur mənbəyidir. İqtidarlı-müxalifətli bütün beynəlxalq tribunalarada hamımız məhz XX əsrin əvvəlində bu böyük şəxsiyyətlərin gördükləri nəhəng işlərdən bəhs edirik, Rəsulzadə o qədər böyük şəxsiyyətdir ki, onun kölgəsini qılınclayanlar da, haqqında həmişə tənqidi danışanlar da yeri gələndə onun kölgəsinə sığınırlar. Bu gün ona haqq etdiyi dəyəri verməyən hazırkı iqtidarın təmsilçilərinin özləri lazım gələndə beynəlxalq auditoriyalar qarşısında məhz Rəsulzadənin xidmətlərilə, onun sayəsində xalqımızın 94 il bundan qabaq yaratdıqları ilə öyünürlər.

Rəsulzadə öz həyatı ilə simvollaşmış, Azərbaycana təmənnasız xidmət etmə nümunəsini yaradan şəxsiyyətdir. Çox sevinirəm ki, 70 il sovetlərin, ondan sonra da 20 ilə qədər müddətdə sülalə hakimiyyətinin respublikamızın banisinə qarşı apardığı əks təbliğata baxmayaraq, yenə də yüzminlər qəlbində Rəsulzadəni məhəbbətini yaşadır.

Bu gün Azərbaycan xalqı özünün azadlıq, demokratiya mübarizəsinin yeni bir mərhələsinə qədəm qoyur. Xalqımız respublika üsul-idarəsini yenidən bərpa etmək əzmindədir. Artıq xalq yaradılmış eybəcərliklərlə barışmayacağını nümayiş etdirir.

Azərbaycanın siyasi həyatına yeni, gənc nəsil gəlir və böyük ustadımızın dediyi, “mütləqa Azərbaycanda insan haqlarının, ədalətin yanında olanlar qalib gələcək” fikri yenidən təsdiqini tapacaq. O böyük ustad bizə ən çətin zamanlarda da millətimizə inanmağı, güvənməyi, sabaha inamla baxmağı öyrədib.

Bu gün biz əminliklə deyə bilərik ki, artıq o mərhələnin ayaq səsləri eşidilməkdədir. Yenidən Azərbaycanda respublika, demokratiya, azadlıq prinsipləri bərqərar olacaq. Rəsulzadənin qoyduğu yol Azərbaycan xalqının, millətimizin əsas yolu olaraq rəsmən dövlət səviyyəsində gediləcək. Sizlərin böyük Rəsulzadə sevginiz qarşısında, gəlin, biz də ənənəmizə sadiq olaraq, ona sevgimizi elə onun özünün sevimli misralarıyla ifadə edək:

Sən bizimsən, bizimsən, durduqca bədəndə can, Yaşa, yaşa, çox yaşa, ey şanlı Azərbaycan!”.

Rəsulzadə ömrünün coğrafiyası...

Rəsulzadə İrsini Araşdırma Fondunun rəhbəri, tarixçi alim Nəsiman Yaqublu çıxışında dahi öndərin fəaliyyətindəki bir sıra məqamlardan danışdı: “Məhəmməd Əmin Rəsulzadənin 71 illik ömrünün elə bir günü olmayıb ki, Azərbaycanın istiqlalına həsr edilməsin. Bu ömrün coğrafiyasına diqqət yetirdikdə görürük ki, 71 illik ömrünün cəmisi 22 ilini Azərbaycanda yaşayıb. Ömrünün digər məqamlarını İranda, Almaniyada, Polşada, Türkiyədə, Fransada yaşayıb və Azərbaycan istiqlalı uğrunda mübarizə aparıb.

Hesablamışıq ki, Rəsulzadənin Azərbaycanda nəşr edilən yazılarının sayı 1500-dən, Fransada nəşr edilən yazılarının sayı 50-dən, Polşada nəşr edilən yazılarının sayı 30-dan, Almaniyada 20-dən çoxdur. Bütün həyatını bu unsan Azərbaycanın müstəqilliyinə həsr edib. Özündən sonra böyük irs, sərvət qoyub gedib".

Rəsulzadə bizə dövlət verib, ona sahib çıxmalıyıq!

Klassik Xalq Cəbhəsi Partiyasının sədri Mirmahmud Mirəlioğlu da 31 yanvarı xalqımız üçün bayram günü adlandırdı: “Bu bayramı bizə Tanrı bəxş edib və bu gündə dünyaya gələn Rəsulzadəni Azərbaycan üçün çox önəmli şəxsiyyət kimi yetişdirib. Allahın qisməti ilə onun ən böyük əsəri Azərbaycan Xalq Cümhuriyyəti olub.

Bugünkü birliyin baş tutmasına görə də sizlərə təşəkkür edirəm. Biz bir yerdə olmağa məhkumuq. Əks təqdirdə bu anti-milli hakimiyyət Azərbaycanı fəlakətə aparacaq".

Açıq Cəmiyyət Partiyasının sədri Sülhəddin Əkbər Rəsulzadənin doğulduğu yeri “müqəddəs torpaq” adlandırdı. Sonra Rəsulzadənin Azərbaycan dövləti adlı böyük bir abidəni ucaltdığını bildirdi: “Rəsulzadə və silahdaşları bizə bayraq, dövlət verib. Biz bu bayraqla yanaşı, öz dövlətimizə, öz hakimiyyətimizə sahib çıxmalıyıq. Xalqımızın indiki çətin günüdə hamımız bir yerdə olmalıyıq. Uğura gedən yol bütün müxalifətin bax burada olduğu kimi birləşməsindən keçir”.

Tarixçi alim Yadigar Türkel isə çıxışında Rəsulzadənin “İran türkləri” kitabından danışdı. Alim 1912-ci ildə yazılmış kitabı indiki dövrün gənclərinin anlayacağı dildə çap etdiyi barədə məlumat verdi və kitabı nümayiş etdirdi. Kitabda despotik rejimlərlə xalqın savaşından bəhs edilir.

Azadlıq Partiyasının sədri Əhməd Oruc çıxışında 20-ci əsrin əvvəlində milli dövlət qurmaq pasportunu Azərbaycan xalqına Rəsulzadə və silahdaşlarının verdiyini bildirdi.

Rəsulzadə irsinin araşdırmaçısı, tanınmış qocaman şair Teyyub Qurban Məhəmməd Əmin Rəsulzadənin dünya demokratlarına simvol olan şəxsiyyət adlandırdı: “Mən inanıram ki, Rəsulzadənin 130 illiyi gələn il Azərbaycanda yeni hakimiyyət tərəfindən dövlət səviyyəsində qeyd olunacaq”.

VHP Siyasi Şurasının üzvü Samir Əsədli isə çıxışında dedi ki, 20 ildir Azərbaycanda hakimiyyətdəki rejim Rəsulzadə dəyərlərini tapdalamaqla məşğuldur: “Artıq belə bir hakimiyyətə get deməyin vaxtıdır. 2013-cü ildə demokratik düşərgə hakimiyyətə gələcək və Rəsulzadənin ənənələri yenidən qurulacaq”.

Rəsulzadə haqqında nə desək, azdır...

Müsavat Partiyasının başqanı İsa Qəmbər hər kəsi Rəsulzadənin doğum günü münasibətilə təbrik edərək, dünyaya belə bir şəxsiyyət bəxş etdiyinə görə Novxanı kəndinin onun qəlbində xüsusi yeri olduğunu bildirdi:

“Rəsulzadə haqqında nə desək azdır. Bu insan dünya ictimai-siyasi fikir xəzinəsinə elə böyük bir nəzəriyyə - müsavatçılıq bəxş edib ki, onun təsirini hələ bir çoxları indi-indi dərk eləməyə başlayıblar.

Rəsulzadənin vəsiyyətini, çağırışını Elçibəy başda olmaqla bizim nəsil 1980-ci illərin sonları, 1990-cı illərin əvvəllərində gerçəkləşdirdi, üçrəngli bayraq yenidən yüksəldildi. Biz məcbur etdik ki, keçmiş kommunistlər, bolşeviklər - yüz il ərzində Müsavat ideologiyasına qarşı mübarizə aparanlar o müqəddəs bayrağın qarşısında diz çökdülər, onu öpdülər. Doğrudur, öz xislətlərinə uyğun olaraq həmişə o bayrağın qırmızı hissəsini öpürlər. Amma dərk eləmirlər bu, onların qırmızısı deyil, bu, xalqımızın mübarizəsinin rəmzi olan qırmızıdır, müasirlik rəmzidir. Yeni nəsil hakimiyyətə elə qüvvələrin gəlməsini təmin edəcək ki, həmin qüvvələr üçün Rəsulzadə dəyərləri müqəddəs olacaq".

***

Yekunda mitinq iştirakçıları Azərbaycan dövlət himnini oxudular. Sonra isə Məhəmməd Əmin Rəsulzadənin atasının və oğlunun Novxanı qəbiristanlığındakı məzarları ziyarət edildi.

Etibar Seyidağa

Azadlıq.- 2013.- 1 fevral.- S.9.