Repressiya olunan maarifçi
Cabbar bəy Baharlı
Böyük nəslin böyük siması
Azərbaycanı qara qasırğa kimi ağzına alan 37-ci illərdə
repressiya olunan görkəmli ziyalılardan
bir də Qarabağın məşhur
soyadlarından birinin daşıyıcısı Cabbar
bəy Vəlibəyov
Baharlıdır. Baharlılar Qarabağda
böyük bir nəslin soyadının davamçılarıdır. Cabbar bəyin XV əsrdə yaşamış ulu babası Əlişəkər
bəy Baharlı uzun illər Həmədan hakimi olmuşdur. O dövrdə
Əlişəkər bəyin
yaxın qohumu Qaraqoyunlu hökmdarı Cahanşah Həqiqi hakimiyyətdə idi.
Cabbar bəy Vəlibəyovun ulu babası Bayram xan da Qarabağ
xanlığının ictimai-mədəni
həyatında yaxından
iştirak etmiş bir şəxs olub. Bayram xanın oğlu Mirzə Vəli bəy Qarabağ xanı İbrahimxəlil xanın vəziri idi və o, xanlığın ictimai-siyasi
həyatında, daxili
və xarici siyasətində aparıcı
rol oynamışdır.
Mirzə
Vəli bəy İbrahimxəlil xanın
inandığı, arxalandığı,
təcrübəli dövlət
adamlarından hesab olunurdu. Xanlığın bütün məsələlərinin
həllində onun verdiyi ağıllı məsləhətlər də
əsas rol oynayırdı. Elə bu
istedadına, etibarına
görə də o, Qarabağ xanlığının
vəziri rütbəsinə
qədər yüksəlmişdir.
İbrahimxəlil xanın vəziri
kimi o, bir sıra diplomatik danışıqlarda Qarabağ
xanlığını layiqincə
təmsil etmişdir.
Bəzi mənbələrə görə,
Molla Pənah Vaqifi Mirzə Vəli bəy Baharlının təklifi
ilə saraya dəvət etmişdilər.
Mirzə
Vəli bəyin gözəl şeir yazmağı da vardı. Onun faciəli ölümündən
sonra davamçı nəsli babalarının adını yaşatmaq üçün Vəlibəyov,
Vəliyev, Vəlizadə,
Vəlili soyadlarını
daşımışlar.
Baharlılar nəslinin araşdırıcısı Orxan
Zakiroğlunun yazdıqlarından
məlum olur ki, Mirzə Vəli bəy Baharlının Mirzə Haşım bəy Zərrinqələm, İbrahim
Baharlı, İmamverdi
bəy, Hacı Həsənəli bəy adlı dörd oğlu olmuşdur. İbrahim bəy Baharlının da Rzaqulu bəy,
Mirzə İsmayıl
bəy, Məmmədqulu
bəy adlı üç oğlu olmuşdur.
Mirzə İsmayıl bəy Vəliyevin (Baharlı) də altı oğlu olmuşdur ki, Adıgözəl bəy onun beşinci oğludur. Adıgözəl bəyin Nəcəfqulu
bəy, İsmayıl
bəy, Salatın, Səlbi adlı övladları olmuşdur.
Cabbar bəy Vəlibəyov (Baharlı) Mirzə İsmayıl bəyin nəticəsi, Adıgözəl
bəyin nəvəsi,
İsmayıl bəyin
oğludur.
Bu məşhur və bir çox şəxsiyyətlər yetirmiş
tayfanın tanınmış
nümayəndəsi Cabbar
bəy İsmayıl bəy oğlu Vəlibəyov 1893-cü ildə
Şuşa qəzasının I Baharlı
kəndində (indiki Ağdamın I Baharlı kəndi) anadan olmuşdur. Atası İsmayıl bəy
Adıgözəl bəy
oğlu Vəlibəyov,
anası Xanım Qasım qızıdır.
Öz evində məktəb
İlk təhsilini ruhani məktəbində alan, ərəb,
fars dillərini, şəriət elmlərini
öyrənən Cabbar
bəy sonralar Şuşaya gedərək,
orada dörd illik “Realnı” məktəbini bitirmişdir.
Bu məsələdə ona zəmanəsinin açıq fikirli adamlarından biri olan dayısı Məşədi Məhəmməd
dəstək vermişdir.
Bolşevik işğalından əvvəl Cabbar bəy Vəlibəyov Baharlı kəndində böyük torpaq sahibi idi. 1913-cü ildə
təhsilini başa vurub doğma kəndinə qayıdan ziyalı öz evində məktəb açaraq, müəllimlik
fəaliyyətinə başlamışdır.
O, şagirdlərə ərəb
və rus dilləri, tarix, riyaziyyat, Azərbaycan ədəbiyyatı ilə
bağlı dərs deyirdi. Vəlibəyov yoxsul uşaqların
dərsə marağını
artırmaq məqsədilə
özü onları məktəb ləvazimatı
ilə təmin etmişdir. Maarifçi ziyalı bununla
da, Baharlı kəndində yeni tipli məktəbin əsasını qoymuşdur.
Onun əsasını qoyduğu
bu məktəbdə
ilk addımlarını atan
gənclərdən sonralar
Azərbaycanın müxtəlif
sahələrində fəaliyyət
göstərən gözəl
mütəxəssislər yetişmişdir.
Yaşadığı bölgədə məşhur bir maarifçi kimi tanınan Vəlibəyov əhalinin savadsızlıq
içində olduğu
bir dövrdə böyük işlər görmüşdür. O, gənclərin təhsil alması, dünyagörüşünün inkişafı və irəli getməsi üçün əlindən
gələni etməyə
çalışmışdır. Ömrü boyunca müəllimlik peşəsi ilə məşğul olan Cabbar bəy Vəlibəyov pedaqoji fəaliyyətini Ağdamın
Baharlı, Qiyaslı,
Güllücə və
b. kəndlərində davam
etdirmişdir. Bu illərdə o, onlarla gəncin gələcəyi
üçün işıqlı
qapı açmış,
onlara elm yolunu göstərmişdir. Onun çox
gözəl rəssamlıq
qabiliyyəti də olmuşdur. Rus işğalından sonra, Azərbaycanın müstəqilliyinə son qoyulduğuna
görə, kollektivləşmə
adı altında Vəlibəyovun varidatı,
torpaqları, mal-qarası
müsadirə edilmişdir.
Tufanlı 37-ci illərdə minlərlə ziyalılarımız
kimi, Cabbar bəy də hədəfdən yayına
bilməmişdir. 12 oktyabr
1937-ci ildə Vəlibəyovun
evində axtarış
aparılarkən, onun
zəngin kitabxanası
müsadirə olunmuş,
özü isə 19 oktyabr 1937-ci ildə xalq düşməni kimi həbsə alınaraq Sibirə sürgün edilmişdir.
Görkəmli ziyalı 19 noyabr
1941-ci ildə Sibirdə
vəfat etmişdir.
Sürgündə bitən ömür
Cabbar bəy repressiyaya məruz qaldığına görə,
ailənin ağırlığını
xanımı Hüsnü
Murtuza bəy qızı Məmmədbəyli
çəkmişdir. Qeyd edildiyi kimi,
Vəlibəyov Sibirə
sürgün edilərkən
evindəki bütün
sənədlər və
kitablar müsadirə
olunduğundan, oğlu
Zakirin şəhadətnaməsi
itmişdir. Bu ailə faciəsi onunla nəticələnmişdir
ki, evin övladına sonralar kənd soveti tərəfindən 1939-cu ildə
doğulması haqqında
şəhadətnamə verilmiş
və o, anasının
soyadına keçirilmişdir.
Baharlı nəslinin böyük siması Cabbar bəy Vəlibəyov 29 noyabr
1957-ci ildə bəraət
almışdır.
Bir zamanlar doğulub boya-başa çatdığı I Baharlı
kənd məktəbi
Cabbar bəy Vəlibəyovun adını
daşıyır. Görkəmli şəxsin anadan
olmasının 100, yaratdığı
məktəbin 80 illiyi
müxtəlif tədbirlərlə
qeyd edilmişdir.
Cabbar bəy Vəlibəyovun Baharlıdakı
məktəbini bitirən
şəxslər sırasında
bir çox görkəmli simalar var. Onun şagirdlərindən
biri də mərhum şərqşünas
alim Sulduz Rüstəmov idi. Tanınmış alim hər zaman öz müəlliminin
xatirəsini əziz və qiymətli tutmuş, ilk müəllimini
hər yerdə hörmətlə xatırlamışdır.
Ömrü və arzuları
yarımçıq qalan
Cabbar bəyin işıqlı yolunu təkcə şagirdləri
deyil, öz övladı da layiqincə davam etdirmişdir. AMEA-nın
müxbir üzvü,
fəlsəfə elmləri
doktoru, mərhum
professor Zakir Məmmədov
Cabbar bəy Vəlibəyovun oğludur.
Böyük alim Z.Məmmədov
Şihabəddin Yəhya
Sührəvərdinin fəlsəfi
irsinin yeganə tədqiqatçısı olmuş
və filosofun bir çox əsərlərini Azərbaycan
dilinə tərcümə
etmişdir. O, filosofun
“İşıq heykəlləri”
kitabını Azərbaycan
dilinə tərcümə
etmiş və şəxsi vəsaiti hesabına ilk dəfə
1989-cu ildə, ikinci dəfə 1999-cu ildə nəşr etdirmişdir.
“Azadlıq”ın Araşdırmaçı Jurnalistlər
Qrupu KİV-ə Dövlət
Dəstəyi Fondunun maliyyə dəstəyilə
çap edilir
Azadlıq.- 2013.- 15 fevral.- S.14.