Cəsur azərbaycanlı
balası İsmayıl...
Sovet İttifaqı
Qəhrəmanı İsmayıl Bayramov
İkinci
Dünya müharibəsi illərində faşizmə
qarşı döyüşlərdə böyük
şücaətlər göstərmiş azərbaycanlılardan
biri də İsmayıl Bayramov olub.
İsmayıl
Xəlil oğlu Bayramov 1910-cu ildə Stavropol vilayətinin
Dolinovka kəndində anadan olmuş və doğulduğu
Dolinovka kəndində kolxoz sədri işlədiyi zaman,
1941-ci ildə bu vəzifəsindən orduda xidmətə
çağırılmışdır. Bayramovun atası Xəlil
kişi Borçalının Sarvan kəndindən, anası
Tamam isə həmin nümayəndəliyin Görarxı kəndindən
idi.
Borçalıda
yaşayışın çətin olduğunu nəzərə
alan Xəlil kişi ailəsi ilə Şimali Qafqaza
köçmüş və Stavropol diyarının Georgiyevski
bölgəsində məskunlaşaraq orada çobanlıq
etməyə başlamışdır. İsmayıl da hələ
uşaqlıq illərindən atasının yanında çobanlıq
edib, təsərrüfatda bərkdən-boşdan
çıxırdı.
İsmayıl
hələ məktəb yaşlarında çox gözü
açıq, çevik, qorxmaz bir uşaq idi. Ailə vəziyyəti
yeniyetmə İsmayıla
yalnız 1922-ci ildə Georgevski şəhərində
oxumağa imkan yaratdı. Burada cəmi beş il oxudu. 1927-ci
ildə bu bölgədə məskunlaşan azərbaycanlılara
dövlət torpaq, mal-qara və başqa təsərrüfat
imtiyazları verdi. Elə həmin illərdə
burada Borçalı, Sarvan, Korarxı, Naxçıvan,
Kürdəmir və Dağıstandan gələn azərbaycanlılardan
ibarət xutor - yaşayış məntəqəsi
yaradıldı. 1929-cu ildə xutorda yaradılan kollektiv təsərrüfata
da Nəriman Nərimanovun adını verildi.
Xəlil
və Tamamın İsmayıldan
başqa Məhərrəm, İsrafil, Cəlil, Cəbrayıl
və Gülcahan adlı övladları da dünyaya gəlmişdi. Uşaqlıq dövrünü
arxada qoyan Ismayıl artıq evin böyük övladı kimi
kolxozda işləməyə başlamışdı.
İsmayıl
1933-cü ildə Məleykə adlı bir qızla ailə
qurur. İsmayılın
qabiliyyəti, insanpərvərliyi və
işgüzarlığı çalışdığı
kolxoz camaatının gözündən yayınmır, onu elə
cavan yaşlarında partiya sıralarına qəbul edərək təsərrüfata rəhbər
seçirlər. Gənc Ismayıl insanların ona göstərdiyi
etimadı doğruldur və onun rəhbərlik etdiyi kolxoz
vilayətdə qabaqcıl yerlərdən birini tutur
Qanlı savaş
yollarına doğru...
Böyük
Vətən müharibəsi başlananda Ismayıl da
müharibəyə getmək istədi. Lakin
hökumət onun arxa cəbhədə fəaliyyət
göstərməsini daha məqsədəuyğun hesab etdi. İsmayıl arxa
cəbhədə müharibə üçün ərzaq məhsullarının
hasilatı ilə məşğul oldu. 1943-cü il gəlib
çatdı. Qızğın döyüşlər
zamanı Stavropol vilayəti də
zəbt olunmuş, İsmayılın
qardaşı Məhərrəm
müharibədə vuruşurdu. Bir qardaşı İsrafil
isə kursant forması geyinirdi.
Həmin
dəhşətli günləri İsmayılın həyat
yoldaşı Məleykə xanım belə xatırlayır:
“Günlərin birində axşamüstü bizə bir nəfər
qaraçaylı gəldi. O, İsmayıl ilə təkbətək
gizli söhbətlər etdi. İsmayıl Telman adına
xutor məntəqəsinə yaxın qohumu Hüseynov Qəmbərin
yanına getdi. Sentyabr ayının başlanğıcı
idi. Bizə bir nəfər ayaqqabı təmirçisi sifətində
adam gəldi. Səhəri günü İsmayıl bütün
xutorun kommunistlərini yığıb onlara müharibənin
gedişi haqqında xəbər verdi. Camaatı düz yola
istiqamətləndirmək, bizim müharibəni uğurla
başa vurmağımız haqqında geniş söhbətlər
apardılar. Beləliklə, artıq 1943-cü il öz
uğurlu addımlarını bizim bu torpaqda da atmağa
başladı. Biri digərinin ardınca yanvarın 21-də
Stavropol, 26-da Armavir, Kubanın çölləri, neft şəhəri
olan Maykop və Krasnodar kimi şəhərlər azad edildi. Bu
vaxt Ismayıl müharibəyə getmək üçün sənədlərini
yerli hərbi komissarlığa təqdim etdi. Nəhayət,
1943-cü il iyunun 6-da bütün camaat onu müharibəyə
yola saldı. İsmayıl
Bayramov Qırmızı Bayraqlı atıcı
diviziyasında qulluq edirdi. O, bu diviziyada ölüm-dirim yolu
keçmişdi. Onun ən cəsur, igid, yenilməz
və cəngavər bir döyüşçü kimi Jitomir,
Novqorod, Volınska, Rovno, Zdolbunov, Polşa, Dnepr sahilləri və
başqa şəhər və ərazilərin düşməndən
azad edilməsində göstərdiyi qəhrəmanlıqlar
heç vaxt yaddan çıxmayacaqdır. Onun bu
döyüşlərdə rəhbərlikdən
aldığı yeni-yeni tapşırıqları Ismayıl
Bayramov ustalıq və məharətlə yerinə yetirirdi.
Onun dəfələrlə düşmən əhatəsindən
sağ-salamat çıxması bütün döyüş
yoldaşlarını, rəhbərliyi və eyni zamanda
düşməni belə mat-məəttəl qoymuşdu. Igid
Borçalı balası Koroğlu, Cöyrə oğlu Qara, Səməd
ağa kimi meydanda döyüşüb vuruşardı. Onun
yaddaqalan döyüşlərindən biri də əlbəyaxa
vuruşudur. 1944-cü ilin sonları idi. Torpaq və şəhərlərimizi
düşməndən azad edən zaman Ismayıl öz rota
yoldaşlarından ayrı düşüb alman
döyüşçülərinin əhatəsində
qalır. Belə yaxın əlbəyaxa döyüşdə
Ismayıl 40 nəfər alman əsgərini, 1945-ci ildə isə
yenə belə bir döyüşdə 80 nəfəri
öldürmüşdür” (“Vikipedia”).
İsmayılın
igidliyi və qəhrəmanlığı haqqında
diviziyanın komandiri A.S.Sarayev öz
çıxışlarının birində belə deyib: “Sovet
hərbi dairələri və onun döyüşən əsgərləri
çoxmillətli cəngavər millətin ən
yaxşıları ilə təşkil olunmuşdur.
Starşina İsmayıl
Bayramov kimi belə qəhrəman döyüşçülərlə
heç bir vaxt düşmənə tabe olmaq olmaz. Biz azərbaycanlı
balası İsmayılla
fəxr edirik!..”.
Qəhrəmanlığına
görə ən yüksək fəxri ad
İsmayıl
Bayramovun qəhrəmancasına həlak olması haqqında ən
dəqiq və ətraflı material onun döyüş
komandirlərindən Dmitri Sviridovun 9 may 1945-ci ildə göndərdiyi
məktub və sonra həmin məktubun əsasında (1945) Novoselitskidə
çıxan “Bolşevik tribunası” qəzetində dərc
edilmiş materialdır. Dmitri Sviridovun Ismayıl haqqında belə
yazmışdır: “İsmayıl
Bayramov yaxşıların yaxşısı, döyüş
komandiri olmaqla yanaşı, həm də çox gərəkli
və əla partiya rəhbəridir”.
Artıq
1945-ci ilin qışı idi və dəhşətli
döyüşlər Almaniya ərazisində
gedirdi. İsmayıl
Bayramovun rəhbərliyi ilə onun
döyüşçüləri Almaniyanın Neymarnt dəmir
yolu vağzalında döyüşürdülər. Kritik döyüşlərin birində yenə İsmayıl
vuruşa-vuruşa öz döyüşçülərindən
kənarda qalmış və yüngül zədə
almışdı. Hər tərəfdən alman əsgərləri
ilə əhatəyə alınan İsmayıl Bayramov
axırıncı gülləsini də düşmənə
boşaltmışdı. Sonda gənc azərbaycanlı düşmənə əsir
düşməkdənsə özünü öldürməyi üstün
tutur, üstündə olan üç qumbaranın ikisini arxadan
ona yaxınlaşıb “təslim ol, əsgər” deyən bir
qrup alman əsgərlərinin üstünə atıb
partlatmış, üçüncüsünü isə
üzbəüz gələn alman zabitlərini
özü ilə birlikdə partladır. Bu hadisə 1945-ci il
fevralın 10-da baş vermişdi. Sovet əsgərləri
bu dəmiryol vağzalını ələ keçirdikdən
sonra axtarış zamanı İsmayıl Bayramovun meyitini tapırlar. İsmayıl
Bayramov qəhrəmancasına həlak olmuşdu.
Ölümündən sonra cəsur azərbaycanlı İsmayıl
Bayramov Sovet İttifaqı
Qəhrəmanı adına layiq görülmüşdür.
Onun qəhrəmanlığı
barədə SSRI Ali Soveti tərəfindən qəhrəmanın
həyat yoldaşı Məleykə xanıma göndərdiyi
məktubda belə yazılmışdır: “Hörmətli Məleykə
İsa
qızı! SSRI Hərbi Komandanlığının verdiyi xəbərə
görə, sizin həyat yoldaşınız və bizim qəhrəman
döyüşçümüz İsmayıl Xəlil oğlu
Bayramov düşmənə qarşı döyüşdə
qəhrəmancasına həlak olmuşdur. SSRİ Ali
Sovetinin 10 aprel 1945-ci il tarixli qərarına əsasən ona
Sovet Ittifaqı Qəhrəmanı adı verilir”.
“Azadlıq”ın
Araşdırmaçı Jurnalistlər Qrupu KİV-ə
Dövlət Dəstəyi Fondunun maliyyə dəstəyilə
çap edilir
Azadlıq.-
2013.- 16 iyul.- S.14.