Bakı
buruqlarının məşhur “fontanmeysteri”
Məmmədhəsən
Adıgözəlov
Məlum olduğu kimi, Azərbaycan
tarixinin önəmli bir dövrü neftin
çıxarılması və onun ətrafında baş verən
hadisələrlə bağlıdır. Bu dövrdə neftin
hasilatı sahəsində yaranan əsas çətinliklərdən
biri də yüksək ixtisaslı mütəxəssislərin
çatışmazlığı idi. Həmin tarixdə bu
sahənin azsaylı peşəkarları arasında
tanınmış buruq ustası Məmmədhəsən
Adıgözəlovun da adı keçir.
Azərbaycanın
yüksək ixtisaslı ilk neft buruq ustalarından biri olan
M.Adıgözəlov 1906-cı ildən “Hümmət”
Sosial-demokrat partiyasının üzvü, Neft Həmkarlar İttifaqının
yaradıcılarından olub.
Məmmədhəsən
Adıgözəlov 23 iyun 1861-ci ildə Bakı qəzasının
Xırdalan kəndində anadan olub. Demək olar ki, o,
bütün ömrünü neft sənayesinə həsr edib.
Hələ çox gənc yaşlarından peşəkar buruq ustası kimi
tanınan Məmmədhəsən kimi mütəxəssisləri
həmin dövrdə barmaqla saymaq olardı. Neft mədənlərinin
ən məşhur sahibləri onu öz mədənlərində
işləmək üçün dəvət edirdilər.
Məmmədhəsən
Adıgözəlovun özünəməxsus üsulla
qazılan buruğa düşüb qalan aləti
çıxarmaq bacarığı vardı. İndi
dünyada ən müasir texnoloji üsulla həll edilən bu
problemin sirrini iki əsr bundan öncə tapan usta bununla qazma
işlərinin dayanmasının qarşısını
alırdı. Həmin dövrdə belə mütəxəssisləri
tutucu usta adlandırırdılar. Neft ilə zəngin olan
torpaqda yüksək təzyiqli neft qatlarını təyin etməyi
bacaran ustaları hörmətlə “fontanmeyster”
adlandırırdılar. Belə ki, bir uğurlu
qazılmış neft fontanı vuran neft quyusu bir saat ərzində
həmin quyunun sahibini milyonçu edirdi. Öz
milyonlarını neft üzərində quran milli burjuaziya
nümayəndələri bunları çox yaxşı
bilirdilər. Onlar Musa Nağıyev, Hacı Zeynalabdin
Tağıyev, Murtuza Muxtarov, Aşurbəyov qardaşları,
Şəmsi Əsədullayev, Zəfər və Qurban Babayev
qardaşları, Qasım bəy Səlimbəyov və digərləri
idi. Belə neft
milyonçularından olan Ağa Musa Nağıyev bir gün
öz faytonu ilə Nikolayvsk küçəsindən keçərkən
usta Məmmədhəsini görür və onu öz mədənində
işləməyə dəvət edir, bunun əvəzində
ona İçərişəhərdə
hər kərpiçi qızıldan olan iki mərtəbəli
imarət tikdirəcəyini vəd edir.
İlk
“mazut konstitusiyası” sazişinin iştirakçısı
Təbii
ki, bu dövrdə neft mədənlərinə
çoxsaylı işçi qüvvəsinin axını var
idi. Mədənlərdə sadə təhlükəsizlik
normalarının gözlənilmədiyi, bayram və istirahət
günləri olmadan 12-14 saat iş gününün
olması, şiddətli xəzri küləyi altında
işləyən fəhlələrin bir çoxunun xəstələnməsinə,
ömürlük şikəst qalmasına, hətta
ölümlə nəticələnməsinə səbəb
olurdu. Buna görə də hər bir mədəndə qəbiristanlıq
mövcud idi. Belə bir vaxtda mədənlərdə normal
iş şəraitinin yaradılmasına cəhdlər edilir,
lakin bu ilk cəhdlər mədən sahibləri və
çar hökuməti tərəfindən müqavimətlə
qarşılanırdı. Neft mədənlərində ədaləti
bərpa etməyi çalışan hər bir kəsi polis
idarələri izləyərək məsuliyyətə cəlb
edirdi. “Vikipedia”nın yazdığına görə,
1904-cü ildə mədən sahibləri və fəhlələr
arasında ilk kollektiv saziş imzalandı və bu saziş
dünyada ilk “mazut konstitusiyası” adlandırıldı. Həmin
danışıqlarda və sazişin imzalanmasında Məmmədhəsən
Adigözəlov da fəal iştirak etmişdir. Bu, fəhlələrin
ilk hüquqi rəsmiləşdirilmiş qələbəsi
idi. Məmmədhəsən Adıgözəlov 1904-cü ildə
Bibiheybət mədənlərində Stalinlə
görüşmüş, Stalinin göstərişi ilə
partiya sıralarına qəbul edilmişdir. 1906-cı ildə
Balaxanıda Neft Sənayesinin Həmkarlar İttifaqı
yaradılmış və Məmmədhəsən
Adıgözəlov bu ittifaqın idarə heyətinin
üzvü, 1907-ci ilin yanvarında isə daimi xəzinədarı
seçilmişdir. Bu, ən böyük Həmkarlar İttifaqı
idi. İttifaq
neftçıxarma, neft emalı və nəqliyyat strukturunu
özündə cəmləşdirirdi. 1906-cı ildə Məmmədhəsən
Adıgözəlov “Hümmət” sosial-demokrat partiyasına qəbul
olur və müsəlman əhalisinin partiyaya cəlb edilməsinə,
çar hökumətinin özbaşınalığına
son qoyulmasına və sosial ədalətin bərqərar
olması istiqamətində təbliğat aparmağa
başlayır. M.Adıgözəlov öz inqilabi fəaliyyəti
dövründə N.Nərimanov, M.Ə.Rəsulzadə, İ.Stalin,
A.Caparidze, K.E.Baraşılov, Səttarxan, M.B.Qasımov, X.Səfərəliyev,
İ.Vatsek,
S.M.Əfəndiyev, M.Əzizbəyov, A.Süleymanov
(Tureçkiy), A.Tağızadə, S.Yaqubov, İ.Fioletov,
B.Sərdarov, M.Məmmədyarov və başqaları ilə əməkdaşlıq edirdi.
“Hər kəs 100 il
yaşamasa...”
1909-cu
ildən başlayan axtarış nəticəsində
“Hümmət” SDT-nı rəhbərləri nəzarətə
götürülür. Həmin vaxt Rotmisterin imzası ilə
tərtib olunan sənəddə qeyd olunurdu: “Təşkilat
böyük deyil, 100 nəfərə qədər
işçi çalışır, öz işlərini
Bakı fəhlələri arasında aparırlar, mütəmadi
olaraq müsəlman dilində vərəqələr
buraxırlar. Persiya Inqilabı dövründə ”Hümmət"
komitəsi silahları və könüllüləri Qafqazdan
Persiyaya göndərirdilər. Hazırda tamamilə müsəlman
Bakı fəhlələri arasında təbliğat və təşviğat
işləri aparır". “Hümmət” komitəsinin rəhbərlərinin
6 nəfər olduğu sadalanır.
M.Adıgözəlovun
“Qudok” və “Bakinskiy Raboçiy” qəzetlərinin nəşrində
və yayılmasında da Neft Fəhlələrin İttifaq
xəzinədarı kimi köməyi böyük olub.
1918-ci
ildə Məmmədhəsən Adıgözəlov
Xırdalan Sovetinin Xalq Deputatlarının sədri, 1920-21-ci
illərdə Xırdalan İnqilabı Sovetin sədri
olmuşdur. 1920-ci ildə Binəqədi Icra Komitəsinin sədri
vəzifəsində çalışan Məmmədhəsən
Adıgözəlov bu illərdə Nəriman Nərimanovla
dostluq etmişdir.
1928-ci
ildə ilk Azərbaycan Mərkəzi İcraiyyə Komitəsinin qərarı
ilə Məmmədhəsən Adıgözəlova “Əmək
Qəhrəmanı” fəxri adı verilir. Mir Cəfər
Bağırov Məmmədhəsən Adıgözəlovu Nərimançı,
xalq düşməni və milliyyətçi olmaqda
günahlandıraraq, onu güllələnmə ilə hədələyir.
O, Moskvada olarkən məlum “xalq düşmənləri”nin
siyahını Stalinə çatdırır və
bütün adları Stalin ilə müzakirə edir. Məmmədhəsən
Adıgözəlov adını eşidən Stalin usta Məmmədhəsən
ilə Ramanıda, Sabunçuda, Bibiheybətdə olan
görüşlərini və onun partiyaya qəbul
olunmasını xatırlayır. Sonra Micəfər
Bağırova “qocaya dəymə!” deyərək, ona
toxunmamağı tapşırır.
Azərbaycanın
məşhur buruq ustası Məmmədhəsən
Adıgözəlov 100 il ömür sürüb. O,
1960-cı ildə vəfat edib və öz vəsiyyəti ilə
Xırdalan kənd qəbrisitanlığında torpağa
tapşırılıb.
Hazırda
Xırdalan şəhərində Məmmədhəsən
Adıgözəlovun vaxtilə tikdirdiyi məktəb onun
adını daşıyır. Bundan başqa, Bakıda onun
adını daşıyan küçə var.
“Azadlıq”ın
Araşdırmaçı Jurnalistlər Qrupu KİV-ə
Dövlət Dəstəyi Fondunun maliyyə dəstəyilə
çap edilir
Azadlıq.-
2013.- 23 iyun.- S.14.