İstiqlal Muzeyində Rəsulzadə təntənəsi...

Yanvarın 28-də Azərbaycan İstiqlal Muzeyində Azərbaycan Xalq Cümhuriyyətinin banisi, Azərbaycan Milli Şurasının sədri Məhəmməd Əmin Rəsulzadənin 130 illik yubileyinə həsr olunmuş “Tarixin bir səhifəsi” adlı sərginin açılışı olub.

Öncə dövlət himni səslənib, sonra M.Ə.Rəsulzadəyə həsr edilən videoçarx nümayiş olunub.

Muzeyin direktoru Fəridə Şəmsi bildirib ki, sərgidə tarixçi Ədalət Tahirzadənin şəxsi arxivindən 30 ədəd fotoşəkil, muzeyin fondunda saxlanılan kitablar və sənədlər nümayiş olunur.

Dövlət İdarəçilik Akademiyasının tarix kafedrasının müdiri Firdovsiyyə Əhmədova vurğulayıb ki, bu gün M.Ə.Rəsulzadənin yubileyi ilk dəfə olaraq dövlət səviyyəsində qeyd edilir. Bunu ilk müsbət addım kimi dəyərləndirən F.Əhmədova bundan sonra AXC yaradıcısının adı ilə bağlı tədbirlərin daha yüksək səviyyədə keçirilməsini arzulayıb, eləcə də M.Ə.Rəsulzadəyə abidə qoyulması və xatirə muzeyinin açılmasının zəruri olduğunu bildirib.

Tarixçi Ədalət Tahirzadə isə bildirib ki, M.Ə.Rəsulzadənin yubileyinin dövlət səviyyəsində qeyd edilməsi onun haqqının özünə qaytarılması deməkdir. Buna çox sevindiyini söyləyən tarixçi Azərbaycan Dövlət Konservatoriyasına (indiki Bakı Musiqi Akademiyasına) Üzeyir Hacıbəyovun adının qaytarıldığı kimi, M.Ə.Rəsulzadənin də adının Bakı Dövlət Universitetinə qaytarılmasını, onun əsərlərinin dövlət səviyyəsində nəşr olunmasını arzu edib.

Sonra BDU-nun dosenti Nəsiman Yaqublu çıxış edərək vurğulayıb ki, M.Ə.Rəsulzadənin anadan olduğu gün, 130 illik yubileyi təqvimdə sıradan bir tarix deyil, bu, əsl bayramdır. Cümhuriyyətin banisinin həqiqətən böyük bir şəxs olduğunu söyləyən N.Yaqublu diqqətə çatdırıb ki, bu gün M.Ə.Rəsulzadənin irsinə maraq artmaqdadır. Öndərin həyat və yaradıcılığı artıq xarici mütəxəssislər, o cümlədən, Yaponiya, Almaniya, Fransa kimi ölkələrin alimləri tərəfindən araşdırılır. Bunun təsadüfi olmadığını bildirən N.Yaqublu onu da diqqətə çatdırıb ki, bu gün dünya kitabxanalarında Azərbaycan Xalq Cümhuriyyətinin, o cümlədən, müstəqilliyimizin tarixi məhz M.Ə.Rəsulzadənin gərgin əməyi bahasına yazılmış kitablar vasitəsilə öyrənilir. “Halbuki müasir Azərbaycanın müstəqilliyinin bərpasından ötən 22 il ərzində biz dünya kitabxanalarına Rəsulzadənin yazdıqları qədər kitab çıxara bilməmişik” - deyə N.Yaqublu sözünə əlavə edib.

M.Ə.Rəsulzadənin nəvəsi rəssam Rəis Rəsulzadə sərginin təşkilinə görə və tədbirə qatılan bütün iştirakçılara təşəkkürünü bildirib. M.Ə.Rəsulzadə irsinə marağın artmasında tarixçilərin, Cümhuriyyət tədqiqatçılarının böyük zəhməti olduğunu söyləyən rəssam bu işdə mətbuatın da rolunu qeyd edib. O, babasının yubileyinin dövlət səviyyəsində qeyd olunmasından qürur duyduğunu və yubileyin Türkiyədə də rəsmi şəkildə keçiriləcəyini diqqətə çatdırıb.

Daha sonra Milliyyətçi Gənclər Təşkilatının üzvü Elşən İsmayılov M.Ə.Rəsulzadəyə həsr etdiyi şeiri oxuyub.

Sonda isə yazıçı Teyyub Qurban çıxış edərək dövlət məmurlarını M.Ə.Rəsulzadəyə, eləcə də Cümhurriyyət ideyalarına sayğısız münasibətə görə qınayıb və bu mövzuda yazdığı şeirini təqdim edib.

Onu da qeyd edək ki, tədbirdə Azərbaycan Xalq Cümhuriyyətinin görkəmli nümayəndələrinin ailə üzvləri, tarixçilər, tələbələr, həmçinin Prezident Qvardiyasının, Daxili Qoşunların əsgərləri də iştirak ediblər. Lakin mərasimdə dövlət rəsmilərindən, millət vəkillərindən iştirak edən olmayıb.

Sərgi fevralın 5-dək davam edəcək.

Azadlıq.- 2014.- 29 yanvar.- S.14.