“Rəsmi statistika haqqında” Azərbaycan Respublikasının Qanununa əlavələr edilməsi barədə” Azərbaycan Respublikasının Qanununun tətbiqi ilə əlaqədar Azərbaycan Respublikası Prezidentinin bəzi fərmanlarına əlavələr və dəyişikliklər edilməsi haqqında

Azərbaycan Respublikası Prezidentinin Fərmanı

“Rəsmi statistika haqqında” Azərbaycan Respublikasının Qanununa əlavələr edilməsi barədə” Azərbaycan Respublikasının Qanununa uyğun olaraq qərara alıram:

1. “Statistika haqqında” Azərbaycan Respublikasının Qanununa dəyişikliklər və əlavələr edilməsi barədə” Azərbaycan Respublikası Qanununun tətbiq edilməsi haqqında” Azərbaycan Respublikası Prezidentinin 2006-cı il 2 fevral tarixli 360 nömrəli Fərmanının (Azərbaycan Respublikasının Qanunvericilik Toplusu, 2006-cı il, №2, maddə 77) 2.1-ci bəndində “11-ci maddəsinin üçüncü hissəsinin 2-ci cümləsində və” sözlərindən sonra “yeddinci hissəsində,” sözləri əlavə edilsin.

2. Azərbaycan Respublikası Prezidentinin 2009-cu il 24 iyun tarixli 115 nömrəli Fərmanı (Azərbaycan Respublikasının Qanunvericilik Toplusu, 2009-cu il, №6, maddə 427) ilə təsdiq edilmiş “Azərbaycan Respublikasının Dövlət Statistika Komitəsi haqqında Əsasnamə”yə aşağıdakı əlavələr və dəyişikliklər edilsin:

2.1. 8.7-ci bənddə “əldə edilməsini” sözlərindən sonra “, habelə dövlət (region) müşahidələrinin aparılması üçün Azərbaycan Respublikasının ərazisində yerləşən bütün hüquqi şəxslər (onların nümayəndəlik və filialları) və fiziki şəxslər tərəfindən lazım olan məlumatların elektron sənəd formasında dövlət statistika orqanlarına təqdim edilməsini” sözləri əlavə edilsin;

2.2. 8.17-ci və 9.5-ci bəndlərdə “hüquqi” sözü ismin müvafiq hallarında “hüquqi şəxslər (onların nümayəndəlik və filialları)” sözləri ilə əvəz edilsin;

2.3. 9.2-ci bənddə “təşkilati-hüquqi formasından asılı olmayaraq, hüquqi şəxslərdən” sözlərindən sonra “(onların nümayəndəlik və filiallarından)” sözləri əlavə edilsin.

İlham Əliyev,

Azərbaycan Respublikasının Prezidenti

Bakı şəhəri, 13 aprel 2010-cu il.

Azərbaycan.- 2010.- 15 aprel.- S. 4.