AŞ PA sədri Mövlud Çavuşoğlu ümummilli lider Heydər Əliyevin məzarını və Şəhidlər xiyabanını ziyarət etmişdir

Azərbaycanda səfərdə olan Avropa Şurası Parlament Assambleyasının (AŞ PA) sədri Mövlud Çavuşoğlu aprelin 14-də Fəxri xiyabana gələrək xalqımızın ümummilli lideri, görkəmli dövlət xadimi Heydər Əliyevin xatirəsini ehtiramla yad etmiş, məzarı üzərinə gül dəstəsi qoymuşdur.

Görkəmli oftalmoloq alim, akademik Zərifə xanım Əliyevanın da xatirəsi yad olunmuş, məzarı üstünə tər çiçəklər düzülmüşdür.

Qonaq Şəhidlər xiyabanında Azərbaycanın azadlığı və suverenliyi uğrunda şəhid olmuş qəhrəman Vətən övladlarının məzarları üzərinə tər çiçəklər düzmüş, "Əbədi məşəl" abidəsi önünə gül dəstəsi qoymuşdur.

Sonra M.Çavuşoğlu şəhid türk əsgərlərinin xatirəsinə ucaldılmış memorialı ziyarət etmiş, önünə gül dəstəsi qoymuşdur.

Azərbaycan.- 2010.-15 aprel.- S. 5.