Fransa televiziya kanalında yayımlanmış verilişdə Azərbaycandan da bəhs edilmişdir

Avropanın bir çox ölkələrində yayımlanan ARTE televiziya kanalının fransız versiyasında aprelin 14-də "Kaşqar ekspediyası: mavi qızılın izi ilə" adlı verilişdə Azərbaycandan geniş bəhs edilmişdir.

Bir sıra ölkələrə səfərə çıxmış üç fransız jurnalistin Cənubi Qafqaz bölgəsi ilə tanışlıq üçün ilk olaraq Azərbaycanı seçməsinin heç də təsadüfü olmadığı, ölkəmizin bir tərəfdən qədim İpək Yolunun üzərində yerləşməsinin, digər tərəfdən Qərblə Şərq arasında körpü rolu oynamasının, təbii sərvətlərlə zənginliyinin, öz mühüm enerjidaşıyıcıları ilə Avropanın enerji təhlükəsizliyinin təminatında mühüm rolunun və nəhayət bu bölgədə lider dövlətə çevrilməsinin onlarda böyük maraq oyatdığı bildirilir.

Azərbaycan xalqının qonaqpərvərliyi, səmimiliyi və ürəkaçıqlığı haqqında fransız tamaşaçılarını məlumatlandıran veriliş müəllifləri Bakının Avropanın inkişaf etmiş paytaxtlarından heç də geri qalmadığı, Şərq və Qərb mədəniyyətlərini özündə əks etdirən bu şəhərin hətta bəzi məsələlərdə onları qabaqladığı, şəhərdə gedən tikinti, abadlıq və bərpa işlərinin, möhtəşəm yeni layihələrin həyata keçirilməsinin Azərbaycan iqtisadiyyatının sürətli inkişafından xəbər verdiyi xüsusi vurğulanmışdır.

Ermənistan-Azərbaycan, Dağlıq Qarabağ münaqişəsinə də toxunulmuş, Ermənistanın apardığı işğalçılıq siyasəti nəticəsində ölkəmizin ərazisinin 20 faizinin zəbt edilməsi, bir milyondan artıq qaçqın və məcburi köçkünün öz doğma yurdlarından didərgin düşməsi verilişdə öz əksini tapmışdır.

Fransız jurnalistləri Azərbaycanın qədim və zəngin mədəni irsə malik olduğunu xatırlatmış, Atəşgah, Qız qalası, Şirvanşahlar sarayı və digər abidələr barədə söhbət açmış, Bakının qədimliyindən xəbər verən İçərişəhərə heyran qaldıqlarını etiraf etmiş, bu tarixi kompleksin dövlət tərəfindən qorunduğunu qeyd etmişlər.

Verilişin müəllifləri Azərbaycanın iqtisadiyyatı, xüsusilə neft və qazla zəngin olması barədə fransız tamaşaçılarına ətraflı məlumat vermiş, ölkənin iqtisadi yüksəlişində bu sərvətlərin mühüm rol oynadığını bildirmişlər.

Xəzər dənizinin sahilində yerləşən Bakının füsunkar gözəlliyinə, onun xüsusilə dənizdən möhtəşəm görünüşünə heyranlıqlarını gizlətməyən müəlliflər azərbaycanlıların mədəniyyətinə, intellektual səviyyələrinə və dünyagörüşlərinə görə avropalılardan heç də fərqlənmədiklərini qeyd etmişlər.

Səfərlərini Bakı-Tbilisi-Ceyhan neft kəmərinin keçdiyi yerlərlə davam etdirmiş jurnalistlər Gurcüstanda olmuş, bu ölkənin geosiyasi vəziyyəti haqqında məlumat vermişlər.

Bir gürcü ailəsinin qonağı olmuş fransızlar BTC-dən söhbət salarkən ev sahibəsi bu neft kəmərinin Gürcüstan üçün xüsusi əhəmiyyəti olduğunu, əhalinin sosial vəziyyətinin yaxşılaşmasında mühüm rolunu qeyd etmiş, azərbaycanlılarla gürcülər arasında qədim dostluqdan söhbət açmışdır.

Müəlliflər Gürcüstandan sonra öz səfərlərini Türkiyədə davam etdirmiş, qardaş ölkə, onun iqtisadiyyatının müxtəlif sahələri barədə fransız tamaşaçılarına məlumat vermişlər.

Veriliş Azərbaycan haqqında fransızlarda müəyyən təsəvvür yaratmaq və ölkəmiz barədə məlumatlarını zənginləşdirmək baxımından mühüm əhəmiyyət kəsb edir.

Əsgər ƏLİYEV,

AzərTAc-ın xüsusi müxbiri

Paris

Azərbaycan.- 2010.- 17 aprel.- S. 6.