Pakistan Azərbaycanla digər sahələrdə olduğu kimi, müdafiə sənayesi istiqamətində də əməkdaşlığı genişləndirməkdə maraqlıdır

Aprelin 23-də Azərbaycanın müdafiə sənayesi naziri Yavər Camalov ölkəmizdə səfərdə olan Pakistanın müdafiə katibi Səyid Əthar Əlinin başçılıq etdiyi nümayəndə heyəti ilə görüşmüşdür.

Müdafiə Sənayesi Nazirliyinin mətbuat xidmətindən bildirmişlər ki, görüş nazirliyin "Şərq" İstehsalat Birliyinin Elektron Hesablayıcı Maşınlar zavodunda keçirilmişdir.

Yavər Camalov Azərbaycan ilə Pakistan arasında müdafiə sənayesi sahəsində də əməkdaşlıq münasibətlərinin qurulmasının əhəmiyyətindən danışmışdır. Nazir hər iki ölkənin bu sahədə geniş potensiala malik olduğunu vurğulamışdır.

Nümayəndə heyətinin başçısı Səyid Əthar Əli ölkəsinin Azərbaycanla, digər sahələrdə olduğu kimi, müdafiə sənayesi sahəsində də əməkdaşlığı genişləndirməkdə maraqlı olduğunu bildirmişdir.

Görüşdə əməkdaşlığın inkişaf perspektivlərinə dair geniş fikir mübadiləsi aparılmış və ümumi razılıq əldə olunmuşdur.

Səmimi dostluq və mehribançılıq şəraitində keçən görüşün sonunda nümayəndə heyəti zavodun istehsal sexlərində olmuş və nazirliyin müəssisələrində istehsal olunan müdafiə təyinatlı məmulatların sərgisinə baxmışlar.

Görüşdə Azərbaycanın Pakistandakı səfiri Eynulla Mədətli və Pakistanın ölkəmizdəki səfiri Əbdul Həmid də iştirak etmişlər.

AzərTAc

Azərbaycan.- 2010.- 24 aprel.- S. 2.