"Erməni vandalizmi" kitabının təqdimatı olmuşdur

Aprelin 24-də R.Behbudov adına Mahnı Teatrında şair-publisist Mirkazım Seyidovun "Erməni vandalizmi" kitabının təqdimat mərasimi keçirilmişdir.

Rusiyanın Novosibirsk şəhərində fəaliyyət göstərən Heydər Əliyev adına Beynəlxalq Forumun təsisçisi və Azərbaycandakı daimi nümayəndəliyinin rəhbəri Mirkazım Seyidovun bu kitabı Azərbaycan, rus və ingilis dillərində çap olunmuşdur.

Teatrın foyesində erməni vandalizmini əks etdirən fotosərgi açılmışdır.

Tədbirdə çıxış edən M.Seyidov bildirmişdir ki, 1915-ci il 24 aprel hadisələrinin "soyqırımı" adlandırılmasının əsassız və uydurma olması bu kitabda bir daha öz əksini tapmışdır.

Kitabda zaman-zaman Azərbaycan və Türkiyə torpaqlarında qanlı terror aktları, soyqırımı cinayətləri törədən ermənilərin zalım, qaniçən, başqasının torpağında gözü olan əsl cəllad siması öz əksini tapmışdır. Bu kitab bədnam qonşularımızın Azərbaycanın tarixi torpaqlarına köçürülməsindən bəhs edir. "Böyük Ermənistan" yaratmaq xülyasına düşmüş ermənilərin illər boyu xalqımızı mənəvi və fiziki işgəncələrə məruz qoyması ilə bağlı bütün məlumatlar kitabda geniş şəkildə yer almışdır.

Müəllif demişdir ki, Rusiyanın "Printinq" nəşriyyatında 3 min tirajla çap olunmuş bu kitabın bir çox ölkələrdə təqdimat mərasiminin təşkil edilməsi planlaşdırılır. Erməni lobbisinə Azərbaycan diasporunun gücünü göstərmək məqsədi ilə belə tədbirlər il ərzində davamlı şəkildə keçiriləcəkdir. Bu günlərdə "Erməni vandalizmi" kitabının Rusiyanın Novosibirsk şəhərində də təqdimatı olmuşdur.

Bu kitabda erməni yalanlarının faktlar əsasında bir daha ifşa edildiyini söyləyən Mirkazım Seyidov vurğulamışdır ki, xalqımızın başına gətirilən faciələri bütün dünyaya çatdırmaq hər birimizin borcudur. Bu kitabı yazıb çap etdirməklə az da olsa xalqım üçün faydalı bir iş gördüyümü düşünürəm və bundan sonra da Azərbaycanın haqq səsinin dünyaya çatdırılması naminə yorulmadan fəaliyyət göstərəcəyəm.

Tədbirdə çıxış edən professor Nurəddin Kazımov demişdir ki, "Erməni vandalizmi" kitabı müəllifin, eləcə də milli təbliğatımızın uğuru kimi dəyərləndirilməlidir. Kitabın Rusiyada üç dildə çap edilməsi və orada yayılmasının böyük əhəmiyyəti vardır. Belə kitablar ermənilərin türklərə və azərbaycanlılara qarşı törətdikləri soyqırımı faktlarının dünya ictimaiyyəti tərəfindən tanınmasında təşviqat vasitəsi kimi tutarlı vəsaitdir.

Mərasimdə digər çıxış edənlər də kitabın məziyyətlərindən, tarixi əhəmiyyətindən və onun bütün dünyada geniş şəkildə təbliğ olunmasının vacibliyindən danışmışlar.

AzərTAc

Azərbaycan.- 2010.- 25 aprel.- S. 6.