Azərbaycan alimi Rumıniyada keçirilmiş beynəlxalq tədbirdə ölkəmizi təmsil etmişdir

Buxarest şəhərində Rumıniya Riyaziyyat Cəmiyyətinin mətbu orqanı olan "Gazeta Matematica" jurnalının 100 illiyinə həsr edilmiş yubiley tədbiri və Avropa ölkələrinin Riyaziyyat cəmiyyətləri prezidentlərinin görüşü başa çatmışdır.

Beynəlxalq tədbirdə Avropa Riyaziyyat cəmiyyətləri (ARC) arasında əlaqələrin inkişaf etdirilməsi perspektivləri, birgə elmi layihələrin işlənməsi yolları, elmi nəşrlər sahəsində əməkdaşlıq imkanları müzakirə olunmuşdur.

Ölkəmizi həmin tədbirdə Azərbaycan Riyaziyyat Cəmiyyətinin birinci vitse-prezidenti, Türk Dünyası Riyaziyyat Cəmiyyətinin (TDRC) vitse-prezidenti, akademik Fikrət Əliyev təmsil etmişdir.

Akademik F.Əliyev TDRC-nin mətbu orqanı olan "Turkic World Mathematics Society Journal of Pure and Applied Mathematics" jurnalının yenicə nəşr olunmuş birinci nömrəsinin Avropa Riyaziyyat cəmiyyətlərinə təqdim edildiyini bildirmişdir. O, eyni zamanda qeyd etmişdir ki, Avropa Riyaziyyat cəmiyyətlərinin iyulun 11-14-də Bolqarıstanın paytaxtı Sofiya şəhərində keçiriləcək növbəti iclasında ARC ilə TDRC arasında əlaqələrin yaradılması barədə qərar qəbul ediləcəyi gözlənilir.

Tədbirdə akademik F.Əliyevə xatirə medalı təqdim olunmuşdur.

AzərTAc

Azərbaycan.- 2010.- 25 aprel.- S. 7.