Pakistanla yaxın əməkdaşlıq əlaqələri bir çox sahələrdə olduğu kimi, hərbi sahədə də uğurlu nəticələri ilə nəzərə çarpır

Bakıda rəsmi səfərdə olan Pakistan İslam Respublikasının müdafiə katibi Səyid Əthar Əli aprelin 22-də Azərbaycanın müdafiə naziri general-polkovnik Səfər Əbiyevlə görüşmüşdür.

Fəxri xiyabanda xalqımızın ümummilli lideri, müstəqil Azərbaycan dövlətinin memarı və qurucusu Heydər Əliyevin məzarını və Şəhidlər xiyabanını ziyarət etdikdən sonra pakistanlı qonağın Müdafiə Nazirliyində təntənəli qarşılanma mərasimi keçirilmiş, hər iki ölkənin dövlət himnləri səslənmişdir.

Geniştərkibli görüşdə ölkələrimizin müdafiə nazirlikləri arasında hərbi əməkdaşlıq məsələlərinin inkişaf dinamikası müzakirə edilmişdir.

Nazir Səfər Əbiyev bildirmişdir ki, Pakistanla yaxın əməkdaşlıq əlaqələri bir çox sahələrdə olduğu kimi, hərbi sahədə də uğurlu nəticələri ilə nəzərə çarpır.

Görüşdə regionda hərbi-siyasi vəziyyət və işğalçı Ermənistanın Dağlıq Qarabağ münaqişəsinin dinc yolla həll edilməsinə maneçilik törətməsi məsələlərinə də toxunulmuşdur. Görüşdə Azərbaycanın Pakistandakı səfiri Eynulla Mədətli iştirak etmişdir.

AzərTAc

Azərbaycan.- 2010.- 23 aprel. - S.1.