"Bakı Sağlamlıq Mərkəzi"nin yaradılması haqqında

Azərbaycan Respublikası Prezidentinin Sərəncamı

Respublika əhalisinin sağlamlığının qorunması ilə bağlı görülən tədbirlər çərçivəsində ölkəmizin şəhər və rayonlarında müasir tibbi avadanlıqlarla təchiz olunmuş yeni səhiyyə ocaqlarının yaradılmasının davam etdirilməsi məqsədilə qərara alıram:

1. Bakı şəhərində müasir çoxprofilli klinika - Azərbaycan Respublikası Səhiyyə Nazirliyinin "Bakı Sağlamlıq Mərkəzi" yaradılsın.

2. "Bakı Sağlamlıq Mərkəzi"nin tikilməsi üçün 2010-cu il dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan Azərbaycan Respublikasının Səhiyyə Nazirliyinə 5,0 (beş) milyon manat vəsait ayrılsın.

3. Azərbaycan Respublikasının Maliyyə Nazirliyi bu sərəncamın 2-ci bəndində nəzərdə tutulmuş vəsaitin maliyyələşdirilməsini müəyyən olunmuş qaydada həyata keçirsin.

İlham ƏLİYEV,

Azərbaycan Respublikasının Prezidenti

Bakı şəhəri, 6 avqust 2010-cu il

Azərbaycan.- 2010.-7 avqust.- S. 1.