Kiçik kənd məktəbinin böyük uğuru

Şərur rayonunda öz müsbət ənənələri ilə öyünən təhsil ocaqlarından söhbət düşəndə Muğanlı kənd orta məktəbinin adı birincilər sırasında çəkilir, işi başqalarına nümunə göstərilir. Son beş ildə məktəbi bitirmiş 54 məzundan 33-ü ali, 6-sı isə orta ixtisas məktəblərinə qəbul olunub.Cari ildə isə səkkiz məzunun hamısı öz müəllim və valideynlərini sevindirib. Onlardan da altısı ali, ikisi isə orta ixtisas məktəbləri tələbələri sırasına daxil olub. Ölkə Prezidenti cənab İlham Əliyevin "Ən yaxşı ümumtəhsil məktəbi" müsabiqəsinin qaliblərinin mükafatlandırılması barədə imzaladığı sərəncamla təhsil ocağına on min manat məbləğində birdəfəlik pul mükafatının verilməsi ötən tədris ilinin ən böyük uğuru sayılıb.

Muğanlı məktəbi təkcə tədris keyfiyyətləri ilə rayonun digər təhsil ocaqlarından fərqlənmir. Buradakı tarix-diyarşünaslıq muzeyi zəngin eksponatları ilə seçilir. Rayonun ayrı-ayrı qədim yaşayış məskənlərindən, eləcə də kənd ərazisindəki orta əsrlərə aid nekropoldan toplanmış çoxlu sayda maddi-mədəniyyət nümunələri hamının böyük marağına səbəb olub. Qədim daş alətlər, boyalı saxsı qablar, tunc bəzək əşyaları tariximizin uzaq keçmişindən soraq verir. Eksponatlar arasında XIX-XX əsrlərə aid edilən materiallar-məişət əşyaları, əmək alətləri, numuzmatika nümunələri də az deyil. Başqa bir bölmədə isə İkinci Dünya müharibəsindən qayıtmayan 25 nəfər kənd sakinindən söhbət açılır. Kəndin ziyalı yetirmələrinə həsr olunan bölmədəki eksponatlar da tamaşaçılar tərəfindən maraqla qarşılanır.

Əmək təlimi kabineti də zəngindir. Burada müxtəlif fənlər üzrə hazırlanan elektro-test kitablar, muxtar respublikada mövcud olan tarixi abidələrin maketləri, hərəkətdə olan kənd təsərrüfatı texnikasına və radiotexnikaya aid modellər, toxuculuq və nəqqaşlıq üzrə əl işləri şagirdlərin texniki yaradıcılığından soraq verir. 2008-ci ildə respublikanın Təhsil Nazirliyinin xətti ilə keçirilən texniki yaradıcılıq üzrə uşaq və yeniyetmələrin baxış-müsabiqəsində ən yüksək mükafat da bu məktəbin kollektivinə verilib. Bu sahədə qazanılan müsbət təcrübə muxtar respublika məktəbləri arasında yayılıb. Təhsil ocağının əmək müəllimi Səfər İmanova Naxçıvan MR-in əməkdar müəllimi fəxri adı verilib.

Muğanlı kəndi heç də Şərur rayonunun iri yaşayış məskənlərindən sayılmır. Rayon mərkəzindən 4 km aralıda yerləşən kənddə hazırda min nəfərdən artıq adam yaşayır. Uzun illər boyu burada təhsil ocağının yaradılmasına da ehtiyac duyulmayıb. Sakinlər kənddən təxminən 1,5-2 kilometr aralıda yerləşən qonşu kəndlərdəki orta məktəblərin xidmətindən istifadə ediblər.

56 il bundan əvvəl kənddə ilk təhsil müəssisəsi yaradılıb. Bu, üçsinifli ibtidai məktəb olub. On iki il sonra həmin məktəblər səkkizillik təhsil ocağına çevrilib, 1975-ci ildən isə bir orta məktəb fəaliyyət göstərir. Həmin il kənd orta məktəbi üçün müasir tipli, ikimərtəbəli bina istifadəyə verilib. O vaxtdan da kənd orta məktəbi igid döyüşçü, hərbçi Mehdi Mahmudovun adını daşıyır. Böyük Vətən müharibəsində 416-cı Azərbaycan diviziyasında alay komandiri olmuş M.Mahmudov Qafqazdan Berlinədək şərəfli döyüş yolu keçib. Müharibədən sonrakı illərdə o, Moskvada M.V.Frunze adına Hərbi Akademiyanı bitirib. Döyüş şücaətlərinə görə çoxlu orden və medallarla təltif olunub. Həmyerliləri də onunla haqlı olaraq öyünüblər.

Yarandığı vaxtdan kənddəki təhsil ocağına cəmi iki nəfər rəhbərlik edib. Hər ikisi də təcrübəli müəllim və pedaqoq, məktəb təşkilatçısı olub. Onlardan biri qabaqcıl maarif xadimi Mirhüseyn Seyidov olub. İndi onun səksənə yaxın yaşı var. Sonralar rayon təhsil şöbəsinə də rəhbərlik edib. Son 27 il ərzində direktorluq sükanı arxasında ixtisasca riyaziyyat müəllimi olan İsa Hüseynovdur. Üç il bundan əvvəl ona respublikanın əməkdar müəllimi fəxri adı verilib. Son illər məktəbə başucalığı gətirən məzunlar sırasında onun övladları Xaliq, Xaqani, Kənarə də var.

Məktəbdə öz peşəsinə qəlbən bağlanan müəllimlər də çoxdur. Xəlil Hüseynov, Sitarə İsmayılova, Aybəniz Seyidova belələrindəndir. 35 yaşlı kimya-biologiya müəllimi Baba Babayev də təcrübəli müəllim kimi tanınır. Hər il onun dərs dediyi şagirdlər fənn olimpiadalarında, viktorinalarda uğurla çıxış edirlər. Son beş ildə məktəbi bitirən məzunlardan 8 nəfərinin ali tibb təhsili müəssisələrinə daxil olmasında da Baba müəllimin böyük əməyi olub. Builki məzunlardan Mehdi Həsənov və Sami Oğuzbəy də bu ənənəni davam etdiriblər. Onlar yüksək balla Azərbaycan Tibb Universitetinə daxil olublar.

Təbii ki, təhsildə qazanılan uğurlar ilk növbədə müasir təlim metodlarından istifadə sayəsində mümkün olur. Rübdə bir dəfədən az olmayaraq bütün siniflərdə keçirilən sınaq imtahanlarının nəticələrinin pedaqoji kollektivdə ciddi müzakirəsi nəticəsiz ötmür. Müəllimin əməyinə də məhz bu baxımdan qiymət verilir. Bu halda hər bir müəllim işinə məsuliyyətlə yanaşır, çalışır ki, əldə olunan nəticələr getdikcə artsın.

Kənd məktəbində şagirdlərin müasir informasiya texnologiyalarının sirlərinə layiqincə yiyələnmələri üçün yaxşı şərait yaradılıb. Altı dəst kompüter onların ixtiyarına verilib. İnformatika müəllimi Lalabəyim Seyidova bu sahədə öz biliyini şagirdlərdən əsirgəmir. Elektron lövhəli sinif otağı da tədrisdə keyfiyyət dəyişikliklərinə zəmin yaradıb.

Məktəbin direktoru İsa Hüseynov bildirir ki, burada təlim-tədrisin səviyyəsi sinifdənxaric və məktəbdənkənar tədbirlərin düzgün təşkilindən də çox asılıdır. Ona görə də dərnək və fakültativ məşğələlərə ciddi yanaşılır. Bundan əlavə, hər bir ixtisas müəllimi tərəfindən həftədə bir dəfədən az olmayaraq ictimai əsaslarla keçirilən məşğələlərdə isə təlim prosesində "axsayan" şagirdlərlə fərdi söhbətlər aparılır.

Son illər məktəbin şagirdlərinin fənn olimpiadalarında qazandığı uğurlar da çox olub. Royal və Xəyal Məmmədov qardaşları kimya fənni üzrə respublika olimpiada turunda mükafat alıblar. Həvəsləndirici yerlərə layiq görülən şagirdlər də az olmayıb. Onların bir neçəsinə Təhsil Nazirliyinin diplom və tərifnamələri verilib. Mükafatlar məktəb binasının giriş hissəsindəki dəhlizdəki guşədə nümayiş etdirilir.

Bir sözlə, Muğanlı kənd orta məktəbi şagird sayına görə kiçik olsa da o, muxtar respublikanın ən qabaqcıl təhsil ocaqlarından biridir. Burada müəllimlər öz peşəsini qəlbən sevir. Qazanılan uğurlar da birgə əməyin bəhrəsidir. Onlar çalışırlar ki, növbəti dərs ilində uğurlar daha çox olsun.

Məmməd MƏMMƏDOV

Azərbaycan.- 2010.-28 avqust.- S. 5.