Bir-birindən mühüm obyektlər inşa edilir

Ağstafa ölkəmizin ən gənc rayonlarındandır. İyirmi yaşı bu yaxınlarda tamam olub. Ulu öndər Heydər Əliyevin yolunu uğurla davam etdirən Prezident İlham Əliyevin qayğısı və köməyi sayəsində rayonda kənd təsərrüfatı ilə yanaşı, sənaye sahələri də sürətlə inkişaf edir.

Regionların sosial-iqtisadi inkişafı Dövlət Proqramına uyğun olaraq rayonda altı ay ərzində tikiş fabriki inşa edildi, ən müasir avadanlıq quruldu, neçə-neçə adam işlə təmin olundu. Bu, qərb bölgəsi üçün əlamətdar hadisə sayılır. Açılışına dövlət başçısı İlham Əliyev xeyir-dua verib.

Digər mühüm obyektlərdən biri Poylu qəsəbəsində inşa olunur. Dörd hektar sahədə yerli məhsullardan yüksək vitaminli - zülallı yem və müxtəlif növ spirt istehsal ediləcək. İnşaat işlərini "Riyad" şirkəti görür. Obyekt tam işə düşəndə burada 30 min ton taxıl, 16 min ton qarğıdalı, 11 min ton günəbaxan və 2500 ton yonca emal ediləcək.

İnşasına bir neçə il bundan əvvəl başlanılıb. Göz işlədikcə nəhəng qurğular ucalır. İlkin mərhələdə yüksək keyfiyyətli spirt, "tullantılardan" isə mal-qara üçün vitaminli yem istehsal olunacaqdır.

Avadanlığın çoxu xaricdən gətirilir. Nəhəng spirtçəkmə qurğusu artıq hazırdır. Ukraynadan alınan avadanlıq kiyevli ustalar tərəfindən quraşdırılıb. İndi qazanxanada və yemdoğrama qurğusunda qızğın iş gedir. Qərb bölgəsinə səfəri zamanı ölkə başçısı İlham Əliyev zavodun inşası ilə tanış olub. Obyektdə işlərin vaxtında və yüksək keyfiyyətlə başa çatdırılması üçün konkret tövsiyə və tapşırıqlar verib.

Poyluda müxtəlif tərkibli mineral sular çoxdur. Çeşmələrdən biri haqqında söhbətgedən zavodun ərazisində çağlayır. "Həyat mənbəyi" adlanır. Deyirlər ki, bu sudan mədə-bağırsaq, öd, sidik yollarının xroniki xəstəlikləri zamanı istifadə olunur. Bu mənada mütəxəssislər Poylu suyunu Elbrus dağlarındakı "melkinskiy" suyu ilə müqayisə edirlər.

Prezident İlham Əliyev Ağstafaya səfəri zamanı zavodda olarkən həmin suyun dadına baxıb və onun genişmiqyaslı satışının təşkilinin vacibliyini vurğulayıb. Dövlət başçısının bu tövsiyəsinə əsasən, müasir quruluşlu sex tikilib, müvafiq avadanlıq quraşdırılıb. Su satışının təşkili üçün "Ford" markalı avtomobillər alınıb. Poylunun "həyat mənbəyi" hələlik Ağstafadan başqa Qazax, Tovuz və Zaqatala rayonlarında, habelə Bakıda satılır.

Burada limonad istehsalı üçün də hazırlıq işləri aparılır. Sexin binasında inşaat işləri başa çatıb. Müəyyən avadanlığın alınması üçün Tbilisi şəhərindəki firmalarla danışıqlar aparılır.

Zavodda spirt istehsalının təşkili üçün də müəyyən hazırlıq işləri görülüb. Müvafiq istehsal sahələrinin, sexlərin tikintisi başa çatıb. Bəzi avadanlıq və qurğular quraşdırılıb. Xammal və hazır məhsul üçün anbarlar tikilib. Poyluda "Lüks-ekstra" spirtinin və digər məhsulların istehsalına az qalıb.

Rayonda maldarlığın sürətli inkişafı ilə əlaqədar "Ağstafasüd" kompleksinin inşası da nəzərdə tutulub. Kompleksdə 2400 başlıq südçülük təsərrüfatı yaradılacaq, gündə 80 ton istehsal gücü olan yem emalı zavodu inşa ediləcəkdir. Yeni müəssisə üçün mütəxəssislərin hazırlanması məqsədilə peşə təhsili müəssisəsi açılıb. Burada müasir texnikaya olan ehtiyac nəzərə alınaraq güclü-qüvvətli aqrolizinq yaradılıb.

Ağstafa rayonunda bu cür diqqəti cəlb edən dəyərli işlər çoxdur. İqtisadiyyat sürətlə inkişaf edir, abadlıq və quruculuq işləri aybaay, ilbəil genişlənir. İcra hakimiyyəti başçısının müavini Ramiz Tatarlı deyir ki, cari ilin doqquz ayı ərzində ötən ilin müvafiq dövründəkinə nisbətən 3 milyon manatlıqdan çox məhsul istehsal edilib. Sahibkarlığa, özəl sektora geniş meydan açıldıqca gəlir, qazanc çoxalır. Cari ilin ötən ayları ərzində əsas kapitala yönəldilən investisiyaların həcmi təqribən 8 milyon manat olmuşdur ki, bu da ötən ilin müvafiq dövründəkinə nisbətən 1,5 milyon manat çoxdur.

Tatlıda üzlük bəzək daşları karxanası işləyir. Orada kərpic və kirəmit istehsal olunur. Poyluda qum, çınqıl zavodu fəaliyyət göstərir. Yerli xammaldan gəc istehsal edilir. Qəsəbə və kəndlərdə dəyirmanlar, çörəkbişirmə müəssisələri, yağ-pendir və süd sexləri fəaliyyət göstərir. Yerli üzüm sortlarından şərab hazırlanır. Xalq sənətinin inkişafı, xalçaçılıq, misgərlik, dulusçuluq, dəmirçilik, şəbəkə, ağac və daş üzərində oyma, habelə ipəkçilik və zərgərlik geniş miqyas alıb.

Rayonda abadlıq və quruculuq işlərinə də xüsusi diqqət yetirilir. Ağstafa vağzalı ətrafındakı park tamamilə yenidən qurulub, işıq sistemi təzələnib. Qışa hazırlıqla əlaqədar 16 ailəlik və 33 mənzilli yaşayış binalarının dam örtükləri dəyişdirilib. İmkansız ailələrə kömək məqsədilə Ağstafa şəhərində, Xətai və Köhnə Qışlaq, Həsənsu, Dağkəsəmən kəndlərində fərdi evlər tikilib, ictimai binaların da görkəmi dəyişir. Statistika idarəsinin yeni inzibati binasının, vergilər terminalının və Ağstafa aqroservisin tikintisi başa çatmaq üzrədir. Qıraq Kəsəmən kənd məktəbi yeni bina və müasir avadanlıqla təchiz olunub, Xətai kəndində təzə poçt binası istifadəyə verilib. Qəza vəziyyətində olan 8 yaşayış evinin əsaslı təmiri, Tatlı, Eynallı, Köçəsgər kəndlərində qrunt sularının qarşısının alınması üçün tədbirlər görülür.

Əhalinin fasiləsiz elektrik enerjisi və təbii qazla təmin edilməsi diqqət mərkəzindədir. Həsənsu kəndinin və Vurğun qəsəbəsinin qaz xətti istifadəyə verilib. Dağkəsəmən kəndində də paylayıcı qaz xətti istismara hazır vəziyyətdədir.

Dövlət başçısı cənab İlham Əliyev bu yerlərə səfəri zamanı Ağstafada həyata keçirilən tədbirlərə müsbət qiymət verərək demişdir: "Bilirsiniz ki, mənim siyasətimin əsas istiqamətlərindən biri də odur ki, Azərbaycanın bütün bölgələrində inkişaf olsun, yeni iş yerləri açılsın, insanlar işlə təmin olunsunlar, maaşlar qalxsın. Biz bu istiqamətdə böyük işlər görürük, böyük proqramlar həyata keçiririk. Mən çox şadam ki, Ağstafada da bu istiqamətdə işlər gedir".

Dövlət başçısının tələb və tövsiyələrini ardıcıl surətdə yerinə yetirən Ağstafa rayonu günü-gündən gözəlləşir, sənaye mərkəzinə çevrilir.

Əhməd İSAYEV,

Azərbaycan.- 2010.- 3 dekabr.- S.6.