"Əsrin müqaviləsi"ndən başlanan yol uğurla davam edir

Azərbaycan və Türkiyə jurnalistləri ölkəmizdə həyata keçirilən iri neft-qaz və ixrac layihələrinin builki uğurları ilə birlikdə tanış oldular. Bu barədə onlara bp şirkətinin regional prezidenti Rəşid Cavanşir məlumat verdi.

Tədbirdə ayrı-ayrı layihələr üzrə menecerlər və məsul şəxslər də iştirak edirdilər. Odur ki, istər dənizdəki əməliyyatlar, istərsə də ixrac və qurudakı tikinti işləri barədə ətraflı söhbət getdi.

İlk növbədə cari ilin üç rübü ərzində görülmüş işlər haqqında məlumat verildi. Bu barədə danışarkən R.Cavanşir qeyd etdi ki, 2010-cu ildə "Azəri-Çıraq-Günəşli" yataqlarından 42,1 milyon ton neftin çıxarılması nəzərdə tutulub. 9 ay ərzində 30,8 milyon ton neft hasil edilib. Həmin yataqlardakı platformalardan ümumilikdə gündə orta hesabla 835,1 min barel neft alınıb. Natiq onu da dedi ki, AÇG-nin əməliyyatçısı olan bp həmin layihədə "Devon" şirkətinin payını əldə edib. Bu da bp-nin Azərbaycanda öz fəaliyyətini genişləndirdiyini göstərir.

Bu ilin mühüm hadisələrindən biri Çıraq Neft Layihəsinin (ÇNL) işlənməsinə qərar verilməsidir. Mart ayında bu münasibətlə ARDNŞ ilə bp birgə tədbir keçirdilər. Həmin vaxtdan işlər qrafik üzrə davam edir. Layihənin 10 əsas müqaviləsindən 8-i artıq verilib. Dəniz işləri ilə bağlı qalan iki müqavilə də ilin sonunadək tamamlanaraq təqdim ediləcək.

Hazırda Heydər Əliyev adına Bakı Dərin Özüllər Zavodunda və Bibiheybətdəki ATA tikinti-quraşdırma sahəsində "Qərbi Çıraq" platformasının ayrı-ayrı hissələrinin inşası davam edir. Ümumilikdə AÇG-nin tikinti işlərinə podratçı şirkətlər vasitəsilə 1400 nəfərdən çox adam cəlb olunub. Onların 95 faizdən çoxu Azərbaycan vətəndaşıdır.

Aprel ayından isə öncəqazma proqramına başlanıb. Hazırda bu proqram çərçivəsində ikinci quyu qazılır.

Tədbirdə həmçinin qeyd edildi ki, Heydər Əliyev adına Bakı-Tbilisi-Ceyhan kəməri ilə üç rüb ərzində 28,6 miylon ton neft ixrac olunub. Hazırda kəmərə AÇG nefti və "Şahdəniz" kondensatı vurulur. İyul ayında yeni nəql sazişi imzalandıqdan sonra BTC-yə Türkmənistan nefti də qoşulur. BTC-nin həmçinin Qazaxıstanın "Tengiz" yatağının neftini daşımaq haqqında sazişləri var.

Ötən aylarda Cənubi Qafqaz Boru Kəmərinin gündəlik orta ötürücülük gücü 15,3 milyon kubmetr qaz olub.

Tədbirdə "Şahdəniz" qazı ilə bağlı da geniş söhbət getdi. Belə ki, "Şahdəniz"in birinci mərhələsi çərçivəsində hasilat barədə məlumatdan sonra əsas mövzu yatağın tammiqyaslı işlənməsi layihəsi oldu.

"Şahdəniz"in tammiqyaslı işlənməsi Azərbaycana dünyanın yeni qaz bazarlarının əsas təchizatçılarından biri olmaq imkanı yaradacaq. Bu layihə üzrə ilk qazın 2017-ci ildə əldə ediləcəyi planlaşdırılır.

F.SADIQLI

Azərbaycan.- 2010.- 2 dekabr.-S.7.