Xırdalanda istehlakçı hüquqlarının qorunması ilə bağlı konfrans keçirilib

İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin təşkilatçılığı ilə Xırdalan şəhərində "İstehlakçı hüquqlarının qorunmasında sahibkarların vəzifələri" mövzusunda keçirilən konfransda dövlət qurumları və ictimai təşkilatların nümayəndələri, eləcə də Abşeron iqtisadi rayonunda fəaliyyət göstərən 150-yə yaxın sahibkar iştirak edib.

İİN mətbuat xidmətinin tədbirlə bağlı yaydığı məlumatda bildirilir ki, son vaxtlar keyfiyyətsiz məhsulların satışının qarşısının alınması, istehlakçıların və sahibkarların maarifləndirilməsi istiqamətində bir sıra tədbirlərin görülməsinə baxmayaraq, istehlak bazarında hələ də neqativ hallara rast gəlmək mümkündür. Təkcə bu ilin 10 ayı ərzində Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən həyata keçirilən nəzarət tədbirləri zamanı müxtəlif səbəblərə görə 1292,5 ton ərzaq məhsulları satışdan çıxarılmışdır. Həmin məhsulların 284,8 tonu məhv edilmiş, 30,3 tonu təkrar emala göndərilmiş, 614,9 tonu normativ sənədlərin tələblərinə uyğun etiketlənəndən sonra satışa qaytarılmış, 359,5 tonunun istifadəsi qadağan olunmuşdur. 3 tonu barəsində isə araşdırmalar davam edir. Bu dövrdə, həmçinin, 376,5 ton qeyri-ərzaq malları satışdan çıxarılmışdır. Onların 142,8 tonu istifadəyə yararsız olduğundan məhv edilmişdir.

Konfransda belə bir fakt da açıqlanıb ki, cari ilin yanvar-oktyabr aylarında qanunu pozan sahibkarlıq subyektləri barədə Dövlət Xidməti tərəfindən İnzibati Xətalar Məcəlləsinə uyğun ümumilikdə 1436 qərar qəbul edilmiş və inzibati xətaya yol verən şəxslər 2 milyon manatdan artıq cərimə olunmuşlar.

Konfransda çıxış edən digər qurumların - Səhiyyə Nazirliyinin, Standartlaşdırma, Metrologiya və Patent üzrə Dövlət Komitəsinin, Abşeron Rayon İcra Hakimiyyətinin nümayəndələri istehlakçı hüquqlarının qorunması ilə bağlı görülən tədbirlərin gücləndirilməsinin zəruriliyini, bununla bağlı sahibkarların üzərinə düşən məsuliyyətin artırılmasını, istehlak bazarında mövcud olan nöqsanların aradan qaldırılmasında əlaqədar təşkilatların birgə fəaliyyətinin əhəmiyyətini qeyd etmişlər.

Azərbaycan.-2010.- 2 dekabr.- S. 8.