Ulu öndərin zəngin irsi milli sərvətimizdir

Yasamal rayonundakı Heydər Əliyev Məktəb-Muzeyi

gənclərin azərbaycançılıq ruhunda tərbiyəsində misilsiz xidmət göstərir

Müasir Azərbaycan dövlətinin memarı və qurucusu Heydər Əliyevin siyasi və dövlətçilik irsinin, həyatı və çoxşaxəli fəaliyyətinin şagird və tələbələr tərəfindən dərindən öyrənilməsi məqsədilə Yasamal rayonundakı məktəb-muzey zəngin eksponat və ədəbiyyatla, müasir informasiya-kommunikasiya texnologiyaları ilə təmin olunmuşdur. 2008-ci ilin dekabrından fəaliyyət göstərən məktəb-muzeydə rayonun məktəbliləri, tələbələri, əmək kollektivlərinin nümayəndələri müvafiq qrafikə uyğun olaraq ayrı-ayrı bölmə və dərnəklərdə ulu öndərin keçdiyi şərəfli həyat yolu və yorulmaz fəaliyyəti ilə maraqlanır, Azərbaycana rəhbərlik etdiyi dövrlərdə, eləcə də SSRİ rəhbərliyində işlədiyi illərdə keçirdiyi tədbir və görüşlər haqqında müfəssəl məlumatlarla, fotoşəkillərlə əyani tanış olurlar.

Bu günlər rayon məktəbliləri Heydər Əliyev Məktəb-Muzeyinə daha tez-tez üz tutur, böyük şəxsiyyətin siyasi irsini, fəaliyyətini, dövlətçilik ənənələrini, azərbaycançılıq ideyasını özündə əks etdirən kitablarla, video və fotosənədlərlə tanış olur, internet vasitəsilə müvafiq saytlardan qədərincə yararlanırlar.

Heydər Əliyev Məktəb-Muzeyi zəngin bilik xəzinəsi kimi tanınır. Burada sərgi və iclas salonları, kompüter sinfi və kitabxana uğurla fəaliyyət göstərir. Məktəb-muzeyin imkanları olduqca genişdir, ümummilli liderin zəngin irsinin öyrənilməsi və təbliği məqsədilə "dəyirmi masa" və konfransların keçirilməsinə, disputların, yeni kitabların təqdimetmə mərasimlərinin keçirilməsinə, kinofilmlərin nümayişinə hərtərəfli imkan verir. Məktəb-muzey Heydər Əliyev irsinin qorunub saxlanmasında, nəsildən-nəslə ötürülməsində tarixi missiyasını şərəflə yerinə yetirir.

Azərbaycan.- 2010.- 10 dekabr.- S.3.