Nazirlər Kabineti daha iki qərar qəbul etmişdir

Azərbaycan Respublikasının Nazirlər Kabineti daha iki qərar qəbul etmişdir.

Nazirlər Kabinetinin mətbuat xidmətindən AzərTAc-a bildirmişlər ki, "Qanın, qan komponentlərinin donorluğu və qan xidməti haqqında" Azərbaycan Respublikası Qanununun tətbiq edilməsi barədə" Azərbaycan Respublikası Prezidentinin 2005-ci il 18 iyul tarixli Fərmanına uyğun olaraq Azərbaycan Respublikasının Nazirlər Kabineti 2010-cu il 13 dekabr tarixli qərarı ilə "2011-2015-ci illər üçün qanın, qan komponentlərinin donorluğu və qan xidmətinin inkişafına dair Tədbirlər Proqramı"nı təsdiqləmişdir.

"Veteranlar haqqında" Azərbaycan Respublikasının Qanununa əlavələr və dəyişikliklər edilməsi barədə" Azərbaycan Respublikası Qanununun tətbiq edilməsi haqqında" Azərbaycan Respublikası Prezidentinin 2006-cı il 25 aprel tarixli Fərmanına əlavə edilməsi barədə" Azərbaycan Respublikası Prezidentinin 2010-cu il 1 oktyabr tarixli Fərmanına əsasən Azərbaycan Respublikasının Nazirlər Kabineti özünün 1995-ci il 22 sentyabr tarixli qərarı ilə təsdiq edilmiş "Müharibə veteranı, silahlı qüvvələr veteranı və əmək veteranı adlarının verilməsi qaydası və şərtləri haqqında Əsasnamə"yə 2010-cu il 13 dekabr tarixli qərarı ilə əlavələr etmişdir.

Azərbaycan Respublikası Nazirlər Kabineti yuxarıda qeyd olunan qərarı ilə, eyni zamanda, 1995-ci il 22 sentyabr tarixli qərarı ilə təsdiq edilmiş "Müharibə veteranı, Silahlı Qüvvələr veteranı və əmək veteranı adlarının verilməsi və şərtləri haqqında Əsasnamə"yə əlavələr edilməsi barədə" Azərbaycan Respublikası Nazirlər Kabinetinin 2006-cı il 10 noyabr tarixli qərarına da əlavə etmişdir.

Hər iki qərar imzalandığı gündən qüvvəyə minmişdir.

Azərbaycan.-2010.-15 dekabr.-S.1.