Azərbaycan Diplomatik Akademiyasında "Azərbaycan müstəqillikdən sonra" kitabının təqdimat mərasimi olmuşdur

Azərbaycan Diplomatik Akademiyasında (ADA) ABŞ-ın tanınmış Con Hopkins Universitetinin professoru, Orta Asiya və Qafqaz üzrə ekspert Svante Kornelin "Azərbaycan müstəqillikdən sonra" kitabının təqdimat mərasimi keçirilmişdir.

Tədbiri giriş sözü ilə açan xarici işlər nazirinin müavini, ADA-nın rektoru Hafiz Paşayev qeyd etmişdir ki, Svante Kornel uzun müddətdir bizim region ilə bağlı araşdırmalar aparır. Onun ilk kitabı bütün Qafqazı əhatə etsə də, son tədqiqat işi sırf Azərbaycana həsr olunmuşdur.

Rektor Hafiz Paşayev bildirmişdir ki, ölkəmiz haqqında yazılan yeni kitab ABŞ-da Azərbaycanla maraqlanan siyasətçilər, tədqiqatçılar və geniş oxucu kütləsi üçün maraqlı mənbə olacaqdır.

Mərasimdə "Azərbaycan müstəqillikdən sonra" kitabının müəllifi Svante Kornel çıxış edərək bildirmişdir ki, ümumiyyətlə, bugünkü tədbir onun kitabının ilk təqdimat mərasimidir. Müəllif tədbirin ADA-da keçirilməsinin onun üçün xüsusi önəm daşıdığını vurğulamışdır. O, Azərbaycanın müstəqillik yollarında inamla irəliləməsindən məmnun olduğunu bildirmişdir.

"Azərbaycan müstəqillikdən sonra" kitabında Dağlıq Qarabağ münaqişəsi, Azərbaycan cəmiyyəti, ölkəmizin iqtisadiyyatı, daxili siyasi prosesləri, xarici siyasəti barədə məlumatlar yer almışdır.

Azərbaycan.-2010.-15 dekabr.-S.8.