Ağdamda Qarabağ müharibəsi əlilləri üçün fərdi evlər istifadəyə verilmişdir

Əmək və Əhalinin Sosial Müdafiəsi Nazirliyinin (ƏƏSMN) vəsaiti ilə Ağdam rayonunun Çəmənli kəndində və Quzanlı qəsəbəsində Qarabağ müharibəsi əlilləri üçün tikilmiş üç fərdi ev istifadəyə verilmişdir.

Bu münasibətlə keçirilən mərasimdə Ağdam Rayon İcra Hakimiyyəti başçısının müavini Ziyafət İsmayılov və ƏƏSMN-in nümayəndəsi Hüseyn Rəhimov çıxış edərək Qarabağ müharibəsi əlilləri və şəhid ailələrinin sosial müdafiəsinin gücləndirilməsi, onların mənzil-məişət şəraitinin yaxşılaşdırılması sahəsində həyata keçirilən tədbirlər barədə danışmış, bu qəbildən olan insanlara dövlət tərəfindən daim yüksək diqqət və qayğı göstərildiyini vurğulamışlar.

Bildirilmişdir ki, ƏƏSMN tərəfindən indiyədək 3500 əlil və şəhid ailəsi mənzillə təmin olunmuş, 2876 nəfərə "Oka", 500 nəfərə "Slavuta" markalı avtomobillər verilmişdir. Cari ildə Qarabağ müharibəsi əlilləri və şəhid ailələri üçün ümumi sayı 715 mənzildən ibarət binalar, o cümlədən 200 fərdi evin tikilməsi nəzərdə tutulmuşdur.

Müharibə əlili Vahid Əliyev əlillərə göstərilən diqqət və qayğıya görə Prezident İlham Əliyevə minnətdarlığını bildirmişdir. Mərasim iştirakçıları yeni tikilən evlərdə yaradılan şəraitlə tanış olmuşlar. Hər biri iki otaq və mətbəxdən ibarət olan evlər mebel, su və istilik sistemi ilə təmin olunmuşdur.

AzərTAc

Azərbaycan.-2010.-16 dekabr.-S.1.