Bir vaxtlar dəmiryolçular qəsəbəsi kimi tanınan Hacıqabul indi abad şəhərə çevrilir

Ələt-Qazax magistral şose yolunun 52-ci kilometrliyindəki kiçik yüksəklikdən bir şəhər görünür. Bu, Hacıqabul rayonunun mərkəzidir. Qeyd edək ki, Hacıqabul Azərbaycanın inzibati coğrafiyasına daxil edilən yeni rayonlardandır. Qədim karvan yolunun üstündə yerləşən bu yer uzun illər Şirvan şəhərinin (keçmiş Əli Bayramlı) tərkibində olub. Ancaq onun inkişafı son 5-6 ildən bəri başlayıb.

Regionların sosial-iqtisadi inkişafı dövlət proqramlarının icrası çərçivəsində burada çox işlər görülüb. Bir-birindən yaraşıqlı inzibati binalar, yaşayış evləri tikilib, parklar, xiyabanlar salınıb, küçələr asfaltlaşdırılıb. Yaşı minilliklərin o tayından boy verən qədim Şirvan torpağındakı bu gənc şəhərin gecələri gur işıq selində daha cazibədar görünür. Müstəqil Azərbaycanın memarı, xalqımızın böyük oğlu Heydər Əliyevin adını daşıyan park şəhərə xüsusi gözəllik verir. Şəhər əhalisinin ən çox xoşladığı istirahət yeri olan bu parkın ərazisində ulu öndərin qranitdən yonulmuş heykəli ucalır. Ümummilli liderin həyat və fəaliyyətini əks etdirən mərkəz də burada yerləşir.

İki ildir hacıqabullular təbii fəlakətlərlə üzləşməli olurlar. 2009-cu il sentyabrın 20-də yağan leysan yağışlar rayonun iqtisadiyyatına, infrastrukturuna, əhaliyə ciddi ziyan vurdu. Yağış suları Hacıqabul şəhərində küçələri, həyət-bacaları basdı, kommunikasiya xətlərinin çox hissəsi sıradan çıxdı, bəzi evlər uçdu. Nəvahı zonasında isə evlərlə yanaşı, əkin sahələri, bağ-bağatlar, ot tayaları, taxıl su altında qaldı.

2010-cu il də rayon əhalisi üçün asan il olmadı. Kür çayında daşqının qarşısının alınması üçün görülən tədbirlərə baxmayaraq, may ayının 23-də səhərə yaxın Meyniman kəndində su bəndi yardı. Amma kənd camaatı tək deyildi. Fövqəladə Hallar Nazirliyinin, bir sıra təşkilatların, Azərbaycan Ordusunun o zaman Şirvan şəhərindəki qərargahda yerləşdirilən çoxlu sayda texnikası operativ olaraq təbii fəlakətin törətdiyi hadisə yerinə gətirildi. "Meliorasiya və Su Təsərrüfatı" ASC-nin, habelə rayondakı digər təşkilatlar da əllərindən gələni əsirgəmədilər. Ağırtonlu yük maşınları fasiləsiz olaraq daş parçaları, torpaq daşıdılar. Əsgərlər, kənd əhalisi gecəli-gündüzlü bəndbərkitmə işləri apardılar. Tezliklə yarılan bənd bərpa olundu. Amma işlər bununla bitmədi. Lazımi yerlərdə körpülər, su keçidləri tikildi, ev-eşiyi uçulmuş adamlar üçün evlər tikilməyə başladı. Verilən tapşırığa əsasən evlər payıza qədər tikilməli idi. Belə də oldu. Prezident sentyabr ayının 7-də Hacıqabul rayonuna səfəri zamanı Meyniman kəndində təzə evlərin açarlarını daşqından ziyan çəkmiş ailələrə təqdim etdi.

Mirzəli Cəfərov:

- May ayının 23-dən başlayaraq kəndimizin müəyyən ərazisi Kürün daşması nəticəsində su altında qalmışdı. Ev-eşikləri, həyət-bacaları, əmlakları su altında qalmış digər sakinlər kimi mən də sanki əlimi həyatdan üzmüşdüm. Amma bir təsəlli, ümid yerimiz vardı. Bilirdik ki, dövlətimiz, onun rəhbəri bizi heç vaxt darda qoymaz. Yanılmamışdıq. Prezidentin tapşırığı ilə əlaqədar nazirliklər və baş idarələr bu işə cəlb edildi, rayon icra hakimiyyəti əlindən gələni əsirgəmədi. Atam Həsən Cəfərov Böyük Vətən müharibəsi veteranıdır. 87 yaşı var. Onun da evi su altında qalmışdı. Atam və mənim üçün daşdan, hər cür şəraiti olan ev tikdilər. 2010-cu il sentyabrın 7-də dövlət başçısı kəndimizin sakinləri ilə bərabər bizə də təzə evlərin açarlarını təqdim edəndə necə sevindiyimizi sözlə ifadə etmək çətindir. Həmin gün kənd camaatı üçün əsl toy-bayram idi.

Mərhəmət Yaqubov:

- Daşqın suları ildırım sürəti ilə kəndimizin ərazisinə dolduğundan evlərimiz, əkin sahələrimiz bir göz qırpımında tamamilə su altında qaldı. Bir müddət qohum-qardaşın evində yaşamalı olduq. Dövlətin bizə qayğısını elə ilk gündən hiss etdik. Bizə hər cür xidmət göstərilirdi. Həkimlər hər gün bizi müayinə edirdilər. Tezliklə ziyançəkənlərə kompensasiyalar ödənildi. Qarşıda isə bizi xoşmüjdəli gün gözləyirdi. Həmin günü bütün meynimanlılar heç vaxt unutmayacaqlar. Prezidentin əlimizi sıxması və təzə evlərin açarlarını bizə verməsini necə yaddan çıxarmaq olar? Xüsusilə də Prezident mənim ailəmin qonağı olubsa. Bu xoşbəxtliyi heç bir sözlə ifadə edə bilmərəm.

Hacıqabul bu çətinliklərə baxmayaraq, 2010-cu ili yaxşı nəticələrlə başa vurur. Təkcə yanvar-noyabr aylarında məhsul istehsalının həcmi ötən ilin eyni dövrü ilə müqayisədə 38,6 faiz artmışdır. Havalar qeyri-sabit keçsə də, rayonun kənd təsərrüfatında taxıl istisna olmaqla, yüksək göstəricilər əldə olunmuşdur. Ötən ilin müvafiq dövrü ilə müqayisədə mal-qaranın, quşların sayı xeyli artmışdır ki, bu da heyvandarlıq məhsulları istehsalının artımına şərait yaratmışdır.

Rayonda tikinti-quruculuq işləri də uğurla davam edir. Hazırda Hacıqabulda 8 tikinti təşkilatı fəaliyyət göstərir. Onların hesabına bu il Rəncbər, Birinci Udullu, Meyniman, Qarasu, Abdulabad, Qızılburun, Ələtli, Atbulaq kəndlərində, Navahı, Padar qəsəbələrində yollara çınqıl döşənmiş, asfalt basılmışdır. Eyni zamanda, Hacıqabul şəhərinin dağüstü massivində 820 metr suötürücü boru çəkilmiş, həmin əraziyə 78 kran, 42 suçiləyici, 2 nasos quraşdırılmışdır.

Yaşıllıqdan korluq çəkən rayon "Ekologiya ili"ndə öz yaşıl libasını xeyli yaxşılaşdırmışdır. Rayonun ərazisində bu il 20 minə yaxın müxtəlif növ ağac, 8 min gül kolu əkilmişdir. Ağac əkini hazırda da davam edir.

Bu gün Hacıqabulun təbii qaz sistemi yenidən qurulur. Bu işi "NZ İnşaat", "İnterqazservis", "Bərpa-TT-2009", "Elnur-2", "AzSan.Tex.Plast" MMC-lər və digər təşkilatlar həyata keçirirlər. Artıq rayon mərkəzinin bir çox küçələrində qaz çəkilişi başa çatmışdır. Ümumilikdə 170 min pm boru çəkilmiş, 500-ə yaxın evə çıxış dayağı qoyulmuş, 68 siyirtmə, 2 kollektor quraşdırılmışdır. Həmçinin kəndlərə də qaz çəkilişinə başlanmışdır.

Seyran CAVADOV,

Azərbaycan.-2010.-17 dekabr.-S.6.