"İqlim dəyişikliklərinə dair yayım jurnalistləri üçün təlim" layihəsi çərçivəsində konfrans-seminar işinə başlayıb

Tədbir Azərbaycan Mətbuat Şurasının və YUNESKO-nun birgə təşəbbüsü ilə reallaşdırılıb

Dekabrın 17-də İctimai Televiziya və Radio Yayımları Şirkətində Azərbaycan Mətbuat Şurasının və YUNESKO-nun birgə təşəbbüsü ilə "İqlim dəyişikliklərinə dair yayım jurnalistləri üçün təlim" layihəsi çərçivəsində 3 günlük konfrans-seminar işinə başlayıb.

Bakıda və regionlarda fəaliyyət göstərən teleradio kanalları rəhbərləri və təmsilçilərinin qatıldıqları tədbiri giriş sözü ilə Azərbaycan Mətbuat Şurasının sədri Əflatun Amaşov açıb. Bildirib ki, konfrans-seminarın təşkilində məqsəd qlobal iqlim dəyişiklikləri ilə bağlı proseslərin kütləvi informasiya vasitələrində peşəkarlıqla işıqlandırılmasına, bu sahədə ixtisaslı jurnalist kadrların hazırlanmasına dəstək verməkdən, mövcud sahədə nəzərəçarpan neqativ tendensiyaların aradan qaldırılmasına effektiv təsir göstərməkdən ibarətdir. "İqlim dəyişikliyi bəşəriyyəti düşündürən qlobal hadisədir. Bu, insanların bütövlükdə yaşam tərzinə və davranışlarına təsir göstərir. Mütəxəssislərin hesablamalarına görə, mövcud prosesin mənfi təsirlərinin qarşısı alınmasa, gələcəkdə aclıq, yoxsulluq kimi problemlər xeyli artacaq. Buna görə də dünya dövlətləri, nüfuzlu beynəlxalq təşkilatlar, xüsusən də YUNESKO kimi qurumlar vəziyyətə effektiv təsir göstərmək üzərində ardıcıl iş aparırlar. Bu iş isə medianın, əsasən də teleradio kanallarının rolu olmadan mümkün deyil. Azərbaycan Mətbuat Şurası və YUNESKO mövcud reallığı nəzərə alaraq məhz televiziya və radiolarda çalışan jurnalistlər üçün iqlim dəyişiklikləri mövzusunda seminarın təşkilini həyata keçirir", - deyən Ə.Amaşov Azərbaycan KİV-lərinin ekologiyanın və ətraf mühitin mühafizəsi ilə bağlı məsələlərin işıqlandırılmasına hər zaman böyük diqqət göstərdiyini vurğulayıb, onların mövcud istiqamətdəki potensialının artırılmasının vacibliyini önə çəkib.

O həmçinin konfrans-seminarın Azərbaycanın televiziya və radio təmsilçilərinin YUNESKO-nun 2009-cu il sentyabrın 4-5-də "Teleradio mediası və iqlim dəyişikliyi" mövzusunda Parisdə keçirdiyi beynəlxalq konfransının deklarasiyasına həmrəylik nümayişi baxımından əhəmiyyətindən danışıb.

YUNESKO-nun Azərbaycan Milli Komissiyasının katibi Günay Əfəndiyeva təmsil olunduğu qurumun Azərbaycanla əlaqələrinin daim yüksələn xətlə inkişaf etdiyini bildirib. O bu əlaqələrin dərinləşməsində Heydər Əliyev Fondunun prezidenti, Azərbaycan Respublikası Milli Məclisinin deputatı, YUNESKO-nun xoşməramlı səfiri Mehriban xanım Əliyevanın böyük rolunun olduğunu vurğulayıb. Azərbaycan Mətbuat Şurası ilə birgə təşəbbüsdən geniş söhbət açan G.Əfəndiyeva qeyd edib ki, layihə çərçivəsində jurnalistlər üçün seminarla yanaşı, kitab çapının və saytın hazırlanması da nəzərdə tutulub.

YUNESKO-nun MaB (İnsan və biosfer) Milli Komitəsinin sədri, Azərbaycan Milli Elmlər Akademiyasının həqiqi üzvü Urxan Ələkbərov qlobal problem olan iqlim dəyişikliyinin fəsadlarının aradan qaldırılmasında elm, təhsil və mədəniyyət amillərinin başlıca rol oynadığını bildirərək deyib ki, hazırkı dövr ekoloji sivilizasiyalar mərhələsinin başlanması ilə xarakterizə edilir. Bu prosesdə də medianın rolu olduqca böyükdür: "Media sosial məsuliyyətli institutdur. Bu isə onun bütün digər problemlərə olduğu kimi, ekoloji tarazlığın pozulmasına, iqlim dəyişikliyinə operativ reaksiya göstərməsini zəruri edir. Əslində, medianın başlıca vəzifəsi elə bundan ibarətdir. Lakin onun fəaliyyəti daimi yeniləşmiş biliklərə əsaslanmalıdır", - deyən U.Ələkbərov konfrans-seminarın jurnalistlər üçün əhəmiyyətli olacağına əminliyini bildirib.

İctimai Televiziya və Radio Yayımları Şirkətinin baş direktoru İsmayıl Ömərov bildirib ki, Azərbaycan Mətbuat Şurasının və YUNESKO-nun birgə təşəbbüsü jurnalistləri maarifləndirməklə yanaşı, xeyirxah missiya da daşıyır. "Prezident İlham Əliyevin fərmanı ilə 2010-cu il Azərbaycanda ekologiya ili elan edilib. Ölkənin hər yerində bu istiqamətli tədbirlər təşkil olunmaqdadır. Lakin jurnalistlərin iştirakı ilə belə bir təşəbbüsün, özü də çox böyük miqyasda, gerçəkləşməsi ilk dəfədir. Cəmiyyətin həmrəyliyi jurnalistlərin həmrəyliyindən keçir", - deyən İ.Ömərov seminarın işinə uğurlar arzulayıb.

Azərbaycan Respublikası Prezident Administrasiyasının ictimai-siyasi məsələlər şöbəsinin sektor müdiri Vüqar Əliyev də diqqəti ölkə KİV-lərinin ekoloji məsələlərə daim həssas yanaşdığına çəkib. O, belə tədbirlərin mövcud tendensiyanın daha da möhkəmlənməsinə dəstək olduğunu, əlavə stimul verdiyini deyib: "Azərbaycan dövləti, şəxsən cənab Prezident İlham Əliyev ekoloji problemlərin aradan qaldırılmasına olduqca həssas münasibət göstərir. Ölkədə qəbul edilən müvafiq dövlət sənədləri, qanunlara edilən əlavə və dəyişikliklər də bunun əyani nümunəsidir. Azərbaycan cəmiyyəti də məsələyə eyni həssaslıqla yanaşmalıdır. Burada "Teleradio mediası və iqlim dəyişikliyi" barədə Paris deklarasiyasından söhbət açıldı. Hesab edirik ki, bu gün Azərbaycanın teleradio nümayəndələrinin həmin sənədə həmrəy olduqlarını göstərmələri vacib məqamdır. Bununla ölkə KİV-ləri üzərilərinə böyük məsuliyyət götürmüş olurlar".

Ekologiya və təbii sərvətlər nazirinin müavini Firdovsi Əliyev çıxışında Azərbaycanda ekologiya ili çərçivəsində reallaşdırılan tədbirlər barədə ətraflı məlumat verib. Bu tədbirlərin baş tutmasında medianın roluna toxunan nazir müavini təmsil olunduğu qurumun KİV-lərin ekoloji mövzudakı fəaliyyətinə dəstək göstərdiyini vurğulayıb. O bildirib ki, ETSN 2010-cu ilin avqustundan başlayaraq ekoloji mövzuda yazan jurnalistlər üçün kurslar həyata keçirməkdədir.

Azərbaycan Mətbuat Şurası sədrinin müavini, Beynəlxalq Avrasiya Mətbuat Fondunun rəhbəri Umud Rəhimoğlu çıxışında YUNESKO-nun 2009-cu il sentyabrın 4-5-də "Teleradio mediası və iqlim dəyişikliyi" mövzusunda Parisdə keçirdiyi beynəlxalq konfransının deklarasiyası barədə geniş məlumat verib. Azərbaycan jurnalistlərinin həmin sənədlə həmrəylik nümayişinin zəruriliyindən danışan U.Rəhimoğlu iştirakçıları bunun üçün hazırlanan bəyanatın mətni ilə tanış edib.

Televiziya və radio kanallarının təmsilçiləri "Azərbaycanın televiziya və radio qurumları rəhbərləri və nümayəndələrinin YUNESKO-nun "Teleradio mediası və iqlim dəyişikliyi" barədə Paris deklarasiyası ilə həmrəyliyinə dair bəyanatı"nı yüksək qiymətləndirmişlər. Bəyanatı paytaxtda fəaliyyət göstərən telekanalların - İTV, AzTV, ATV, "Space TV", "Lider TV", ANS TV, "Xəzər TV"nin, bölgə telekanallarından - "Kəpəz TV", "Alternativ TV" (hər ikisi Gəncə), "Aygün TV" (Zaqatala), "Dünya TV" (Sumqayıt), "Xəyal TV" (Quba), "Cənub TV" (Lənkəran), "Mingəçevir TV", "Kanal S" (Şəki), "El TV" (Yevlax), "RTV" (Xaçmaz), "Türkel TV"nin (Tovuz) rəhbərləri və məsul şəxsləri imzalayıblar.

Konfrans-seminara adları çəkilən telekanalların hər birindən təmsilçilər qatılıblar. Onlar "İqlim dəyişmələrinin qarşısının alınması və ekoloji stabilliyin təmin edilməsi sahəsində bilik və bacarığın təbliğinin rolu", "Qlobal iqlim dəyişmələri: səbəblər, gedişi, proqnozlar. Azərbaycanda iqlim dəyişmələri: onların fəsadlarının aradan qaldırılması yolları", "İqlim dəyişikliyinə dair ictimaiyyətin maarifləndirilməsində yayım mediasının rolu", "İqlim dəyişmələrinin və qlobal ekoloji fəsadların qarşısının alınmasında vahid ətraf mühit konsepsiyası", "İqlim dəyişmələrinin Xəzər ekosisteminə təsiri. İqlim dəyişmələri və Azərbaycanda səhralaşma təhlükəsi konsepsiyası", "Ekoloji sivilizasiya konsepsiyası: "yaşıl iqtisadiyyat" və "yaşıl həyat tərzi"nin formalaşmasında medianın rolu", "İqlim dəyişikliyi və ekoloji problemlərlə bağlı yayım mediası təcrübəsinin BBC modeli", "Milli və yerli biliklərin, tarixən toplanmış təcrübənin və ekoloji mədəniyyətin ətraf mühitin qorunması və optimal idarə edilməsində əhəmiyyəti. Bu irsin qorunması, istifadəsi və yayılmasında medianın rolu" mövzularında ekspert və mütəxəssislərin məruzələrini dinləyəcəklər.

Azərbaycan.- 2010.- 18 dekabr.- S. 2.