"Dağlıq Qarabağ münaqişəsi nəticəsində zərər çəkən rayonların diyarşünaslıq muzeylərinin virtual pilot şəbəkəsinin yaradılması" layihəsi həyata keçirilir

AzərTAc xəbər verir ki, "Söz azadlığı müdafiə fondun"da işğal altında olan rayonların tarix-diyarşünaslıq muzeylərinin direktorları ilə görüş keçirilmişdir.

Fondun sədri, şair Musa Yaqub fondun Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə həyata keçirdiyi "Dağlıq Qarabağ münaqişəsi nəticəsində zərər çəkən rayonların diyarşünaslıq muzeylərinin virtual pilot şəbəkəsinin yaradılması" layihəsi barədə tədbir iştirakçılarına məlumat vermiş və layihə iştirakçılarının gördüyü işlərdən danışmışdır.

Fondun icraçı direktoru Vüqar Tofiqli layihənin məqsədinin respublika üzrə virtual diyarşünaslıq muzeyləri şəbəkəsini yaratmaq olduğunu bildirmişdir. Bildirilmişdir ki, yaradılan resurs vasitəsi ilə ilk olaraq Azərbaycanın işğal altında olan maddi-mədəni irsi haqqında məlumatlar geniş ictimaiyyətə çatdırılacaqdır. Layihə çərçivəsində rayonların mədəniyyət şöbələrinin müdirləri və muzey direktorları ilə görüşlərdən sonra 300-dən artıq eksponatın fotosurətləri fonda təqdim olunmuşdur. Əldə olan məlumatlar artıq fondun imkanları hesabına istifadəyə verilmiş www.diyarshunasliq.az saytında yerləşdirilmişdir. 2011-ci ilin yanvarında təqdimatı keçiriləcək saytın üzərində işlər hələ davam etdirilir.

Görüşdə Cəbrayıl Tarix-Diyarşünaslıq Muzeyinin direktoru Tariyel Abbaslı fondun həyata keçirdiyi layihəni yüksək qiymətləndirmiş, muzeylərin bugünkü fəaliyyətinin qənaətbəxş olmadığını, habelə muzey əməkdaşlarının sosial müdafiəsinin yaxşılaşdırılması ilə baglı addımların atılmasının vacibliyini vurğulamışdır.

Görüşün sonunda www.diyarshunasliq.az saytına baxış keçirilmiş, təklif və tövsiyələr bildirilmişdir.

Azərbaycan.- 2010.- 21 dekabr.- S.3.