2011-ci il MDB-də Birlik Ölkələrinin Mədəni İrsi İli elan olunmuşdur

2011-ci il MDB-də Birlik Ölkələrinin Mədəni İrsi İli elan olunmuşdur. Bunu MDB Dövlətlərarası Humanitar Əməkdaşlıq Fondunun (DHƏF) rəhbərliyi fondun İdarə Heyətinin iclasının yekunlarına dair Kiyevdə keçirilmiş mətbuat konfransında bildirmişdir.

MDB və Baltikyanı ölkələr jurnalistlərinin Mətbuat Klubunun rəhbəri Roman Ağayev AzərTAc-a bildirmişdir ki, mətbuat konfransında DHƏF-in təşəbbüsü və dəstəyi ilə nəşr edilmiş "MDB ölkələri üçün Ukrayna dili dərsliyi" kitabının təqdimatı da olmuşdur. Kitab Rusiya Dövlət Humanitar Universitetinin mütəxəssisləri tərəfindən hazırlanmışdır. Qeyd edək ki, Azərbaycan, tacik, türkmən dillərində dərsliklər artıq buraxılmışdır.

Rusiya Prezidentinin beynəlxalq mədəni əməkdaşlıq üzrə xüsusi nümayəndəsi, DHƏF-in həmsədri Mixail Şvıdkoy mətbuat konfransında bildirmişdir ki, SSRİ dağılandan sonra bütün dillər, o cümlədən rus dili üzrə dərslikləri yenidən yazmaq lazım gəlmişdir. O demişdir: "Biz hesab edirik ki, Azərbaycan dili Ukraynada, türkmən dili Qazaxıstanda öyrənilməlidir. Biz MDB ölkələri dillərinin xarici dil kimi dərsliklər seriyası modelini hazırlamağa başladıq. Postsovet məkanında millətlərarası dil rus dili olduğundan, bu dərsliklər rus dili bazasında hazırlanır".

Fondun idarə heyətinin sədri, Azərbaycanın Rusiyadakı səfiri Polad Bülbüloğlu bu yaxınlarda nəşr edilmiş "Azərbaycan dili" dərsliyindən razı qaldığını bildirmişdir. O demişdir: "Rusiyanın Azərbaycan diasporu da dərslikdən razıdır, çünki gənc nəslin Azərbaycan dilini öyrənmək üçün dərsliyə ehtiyacı vardır. Əlbəttə, bu, bütün dərdlərin dərmanı deyildir. Başqa dərsliklər və lüğətlər də olmalıdır. MDB-də Birlik ölkələrinin dillərinin öyrənilməsinə böyük ehtiyac vardır".

Fondun bu günlərdə Kiyevdə keçirilən tədbirləri və İdarə Heyətinin iclasının yekunları barədə suala cavab verən Polad Bülbüloğlu fondun nüfuzunun getdikcə artdığını, buraya çoxlu müraciətlər daxil olduğunu söyləmişdir. O demişdir: "Həm ekspert səviyyəsində, həm də İdarə Heyətinin Kiyevdə keçirilən iclasında MDB məkanında inteqrasiya proseslərinin inkişaf etdirilməsi, gənclərin problemlərinə dair proqramlara xüsusi diqqət yetirilməsi ilə bağlı konsepsiya qəbul edilmişdir. Biz hər il bir neçə iri layihə həyata keçiririk. Onların arasında yaradıcı və elmi ziyalılar forumu, MDB gənclər simfonik orkestrinin konserti, "Debütlər Birliyi" mükafatının laureatlarının elan olunması və s. vardır. 2011-ci il Mədəni İrs İli elan olunmuşdur və bu il bərpa işləri, mədəni irsimizin qorunub saxlanması ilə məşğul olan adamlara xüsusi diqqət ayrılacaqdır. Fondun planlarına televiziya layihələrinin, telekörpülərin dəstəklənməsi də daxildir. MDB xalqları arasında istənilən inteqrasiya layihələri fondumuz tərəfindən dəstəklənir və alqışlanır".

Roman Ağayev, həmçinin bildirmişdir ki, Polad Bülbüloğlu və tədbirin digər iştirakçıları fondun "MDB, Baltikyanı ölkələr və Gürcüstan jurnalistlərinin DHƏF yanında mətbuat klubu" layihəsini dəstəkləmişlər. Onların fikrincə, əsl peşəkarları birləşdirən mətbuat klubu fəal işləyir və fond bu qurumu daim dəstəkləyir. DHƏF-in idarə heyətinin sədri əlavə etmişdir ki, xalqlarımızın nümayəndələrinin ünsiyyəti üçün məkan da lazımdır. Polad Bülbüloğlu demişdir: "Fondumuz məhz buna görə yaradılmışdır, ziyalılarımız burada ünsiyyət bağlayır, gənclərimiz isə birgə layihələr həyata keçirirlər".

Asya HACIZADƏ,

AzərTAc-ın xüsusi müxbiri

Moskva

Azərbaycan.- 2010.- 22 dekabr.- S. 5.