Azərbaycanın “İSR” Şirkətlər qrupu Bodrumun ən böyük turizim təsislərindən birini almışdır

2010-12-20Yeni məhsul və layihələrAzərbaycanın özəl sektorunun ən iri qrumlarından biri olan “İSR” şirkətlər qrupu turizm sektoruna sərmayə yatırmaqda davam edir. Bakıda 3 hotelə malik olan şirkətlər qrupu Türkiyədə 2 hotel əldə edərək hotellərinin sayını 5-ə çatdırmışdır.

Alınmış hotellərdən biri Bodrum şəhərində yerləşən “Bodrum Princess Deluxe Resort and SPA” hotelidir. “Hilton International” ilə əldə edilmiş razılaşmaya əsasən 2011-ci ildən etibarən hotel “Hilton Bodrum Turkbuku Hotel” adı ilə fəaliyətini davam etdirəcəkdir. Bodrumun ən gözəl yerlərindən biri olaraq qəbul olunan Türkbükü ərazisində yerləşən bu hoteldə 432 Standart, 46 Junior suit, 6 Dublex suit, 2 King suit otaqlar, 11 villa və VIP villa mövcudur. Hoteldə dincəlmək və əylənmək üçün hər bir şərait var. Belə ki, hotel 3 ədəd böyük, 22 ədəd orta və kiçik üzgüçülük hovuzu, 5 restoranı, 13 barı, 9 konfrans zalı, masaj otaqları və saunaları ilə yerləşdiyi bölgənin ən böyük turizm təsislərindən biridir. Ümumi sahəsi 70 hektar olan hotel ərazisi meşəlikdən ibarət olub, təkrarolunmaz təbiət mənzərəsi ilə insanı valeh edir. Hotel hava limanından 45 km, Bodrumun mərkəzindən isə 22 km uzaqlıqda yerləşir.

Türkiyədə digər bir oteli “İSR” şirkətlər qrupu “Palmalı” şirkətlər qrupu ilə ortaq şəkildə əldə etmişlər. İstanbul şəhərində yerləşən və “İstanbul Edition Hotel” adlanan həmin hotel Türkiyənin ilk 7 ulduzlu hotelidir. Hotelin dizaynı tanınmış dizayner “İan Schrager” tərəfindən işlənilmişdir. Hoteldə dünyada tanınmış “Cipriano” restoranı, “Millioner Club”, ”Roze bar”, “S-bar” və İstanbulda ən böyük, lüks SPA mərkəzi fəaliyyət göstərir. Hotelin yuxarı son mərtəbəsində isə ümumi sahəsi 450 m2 olan Prezident suit yerləşir. Həmçinin hoteldə əlamətdar tədbirlərin keçirilməsi üçün möhtəşəm banket zalı da mövcuddur. Şəhərin tam mərkəzində yerləşən “İstanbul Edition Hotel” dünyadakı 8 Edition hoteldən biridir.

“İSR” Şirkətlər qrupunun vitse-prezidenti Zafer Tangil Türkiyənin turizm sektoruna yatırılmış sərmayələrlə bağlı olaraq bildirmişdir: “Qürur hissi keçiririk ki, dünyanın ən böyük turizim ölkəsindən biri olan Türkiyədə ilk 7 ulduzlu hoteldə “İSR” şirkətlər qrupunun da payı vardır. Həmçinin “İSR” Şirkətlər qrupu Bodrumun ən böyük turizim təsislərindən birinə sahib olmuşdur. Bu Azərbaycanın artan iqtisadi qüdrətinin göstəricisidir. “İSR” şirkətlər qrupu Türkiyənin turizim sektoruna daxil olaraq iki hotel alması bir daha sübut etdi ki, Azərbaycan iqtisadiyyatı və onun şirkətləri sürətli inkişaf yolundadır”.

Türkiyədə alınmış hotelləri “İSR” Şirkətlər qrupunun bu ilin iyul ayında həmin ölkədə yaratdığı “İSR Turizm İşletmeleri ve Ticaret Anonim Şirketi” idarə edəcəkdir.

Qeyd edək ki, “İSR” şirkətlər qrupu 1995-ci ildən fəaliyyət göstərir. Şirkət nəqliyyat, daşınmaz əmlak, ticarət və xidmət sahələrinə sərmayə yatırmışdır. “İSR” şirkətlər qrupuna “Bakı Əyləncə Mərkəzi”, “Nərgiz Ticarət Mərkəzi”, “Tayota Bakı Mərkəzi”, “İSR Residence-I” və “İSR Residence- II” elit yaşayış kompleksləri, Bakı Avtomobil Bazarı, “Azər-Yod” yod - brom zavodu, “Park İnn Azərbaycan, “ISR Plaza”, “Radisson Hotel” və 2011-ci ildə istifadəyə veriləcək “Hilton Baku Hotel”i və digər onlarla şirkətlər daxildir. Şirkətlər qrupu hazırda 1000-dən artıq insana iş imkanı yaratmışdır.

Azərbaycan.- 2010.- 22 dekabr.- S.7.