AMEA-da görkəmli alim, akademik Şəfaət Mehdiyevin 100 illik yubileyinə həsr olunmuş tədbir keçirilmişdir

Dekabrın 22-də Azərbaycan Milli Elmlər Akademiyasının (AMEA) Rəyasət Heyətində geologiya-mineralogiya elmləri doktoru, professor, Dövlət mükafatı laureatı, əməkdar elm xadimi, akademik Şəfaət Mehdiyevin 100 illiyinə həsr olunmuş yubiley tədbiri keçirilmişdir.

Tədbirdə görkəmli alimin əsərləri və fotoşəkillərindən ibarət sərgi açılmışdır.

Mərasimdə dövlət və hökumət nümayəndələri, Milli Məclisin deputatları, ali təhsil müəssisələrinin rəhbərləri, tanınmış elm adamları iştirak etmişlər.

Yubiley tədbirini AMEA-nın prezidenti, akademik Mahmud Kərimov açaraq görkəmli alimin həyat və fəaliyyətindən danışmışdır.

Azərbaycan Prezidentinin böyük alimin 100 illik yubileyinin keçirilməsi haqqında sərəncamının əhəmiyyətini vurğulayan akademik bildirmişdir ki, dövlətimizin başçısının müvafiq sərəncamı bütövlükdə Azərbaycan elminə, elm xadimlərinə göstərilən qayğının bariz nümunəsidir.

Diqqətə çatdırılmışdır ki, Şəfaət Mehdiyev ensiklopedik biliyə və geniş erudisiyaya malik alim, görkəmli neftçi-geoloq olmaqla yanaşı, eyni zamanda, peşəkar jurnalist, yazıçı və ictimai-siyasi xadim idi.

Şəfaət Mehdiyevin Azərbaycan elminə verdiyi əvəzsiz elmi töhfələrdən, alimin AMEA-nın Geologiya İnstitutunun formalaşması və inkişafındakı xidmətlərindən, BDU-nun rektoru olarkən gənc kadrların yetişməsi istiqamətində gördüyü əvəzsiz işlərdən danışan M.Kərimov vurğulamışdır ki, o, öz işləri ilə mənsub olduğu xalqın tarixində qalmaq şansı qazanmışdır.

Görkəmli alimin xatirəsi bir dəqiqəlik sükutla yad edilmişdir.

AMEA-nın Geologiya İnstitutunun direktoru, akademik Akif Əlizadənin "Görkəmli alimin şərəfli həyat yolu" mövzusunda məruzəsi dinlənilmişdir.

Bildirilmişdir ki, Şəfaət Mehdiyevin mənalı və şərəfli ömür yoluna, elmi fəaliyyətinə nəzər saldıqda onun milli ideallara bağlı nəcib şəxsiyyət olduğu bir daha aydın görünür. Əsl alim kimi, onun üçün elmdə heç zaman son zirvə və hədd anlayışı olmamışdır. Şəfaət Mehdiyev elmi axtarışları ilə daim öyrənməyə, həqiqəti üzə çıxarıb təsdiqləməyə, əldə etdiyi faydalı nəticələri praktiki şəkildə gerçəkləşdirməyə çalışmışdır.

Şəfaət Mehdiyev tərəfindən Abşeron yarımadasının neft yataqlarının istilik rejimi məsələləri dəqiq surətdə tədqiq olunmuş və qiymətli əsər hazırlanmışdır. Bu əsərin böyük əhəmiyyəti ondan ibarət idi ki, dərinlikdən, tektonikadan və digər amillərdən asılı olaraq, geotermik pillənin dəyişmə qanunauyğunluqları ilk dəfə aşkara çıxarılmışdı.

Şəfaət Mehdiyevin bu sahədə çoxillik tədqiqatlarının nəticələri "Neftin mənşəyi məsələləri və Azərbaycanın neft yataqlarının formalaşması", "Azərbaycanın çökmə süxurlarının üzvi komponentləri", "Neftin mənşəyi problemləri və neft-qaz yataqlarının formalaşması" və digər əsərlərində öz əksini tapmışdır.

Neftin mənşəyi problemi ilə dərindən məşğul olan Şəfaət Mehdiyev hələ 1966-cı ildə neftin dərinlik-biogen genezisi hipotezini irəli sürmüş, sonrakı tədqiqatları ilə onu nəzəriyyə səviyyəsinə çatdırmışdır. Sonralar bu fikir dünyanın bir çox alimləri tərəfindən qəbul edilmişdir.

Vurğulanmışdır ki, akademik Şəfaət Mehdiyev bir çox geoloji xəritələrin tərtibçisi və redaktoru olmuşdur. Bu cəhətdən onun elmi redaktoru və həmmüəllifi olduğu və Dövlət mükafatına layiq görülmüş "Azərbaycanın neft və qaz yataqları və perspektiv strukturları" xəritəsi xüsusilə diqqəti cəlb edir.

Bildirilmişdir ki, Ş.Mehdiyev 400-ə qədər elmi əsərin, 20-dən artıq monoqrafiyanın, Azərbaycanın geoloji və tektonik xəritələrinin, neft və qaz yataqları xəritələrinin redaktoru və tərtibçisi olmuşdur. O, "Azərbaycanın geologiyası" çoxcildli nəşrində ayrı-ayrı fəsillərin və bölmələrin tərtibində və redaktə işində böyük əmək sərf etmişdir.

Tədbirdə Azərbaycan Respublikası Dövlət Neft Şirkətinin birinci vitse-prezidenti, akademik Xoşbəxt Yusifzadə, akademiklər Budaq Budaqov, Cəlal Allahverdiyev, professorlar Adil Əliyev, Hikmət Mahmudov və başqaları çıxış edərək ölkəmizdə geologiya elminin formalaşması və inkişafında misilsiz xidmətləri olmuş Şəfaət Mehdiyevlə bağlı xatirələrini söyləmişlər.

Diqqətə çatdırılmışdır ki, ciddi elmi işlə məşğul olan alimin pyesləri, hekayələri, şeirləri bu gün də aktuallığını itirməmiş və geniş oxucu kütləsi tərəfindən sevilə-sevilə oxunur.

Belə mötəbər tədbirdə çıxış etməyi özünə şərəf hesab edən Azərbaycanın BMT-dəki daimi nümayəndəsi səfir Aqşin Mehdiyev atasının xatirəsinə göstərilən hörmət və ehtirama görə Prezident İlham Əliyevə, tədbirin təşkilatçılarına və iştirakçılarına ailələri adından minnətdarlığını bildirmişdir. Vurğulanmışdır ki, Şəfaət Mehdiyevin 100 illik yubileyi münasibətilə təşkil edilmiş silsilə tədbirlər Azərbaycanda elm adamlarına, ziyalılara verilən yüksək qiymətin göstəricisidir.

Azərbaycan.- 2010.- 23 dekabr.- S. 2.