Azərbaycan Diplomatik Akademiyasının Xarici Siyasət Proqramı məzunlarının növbəti buraxılış mərasimi keçirilmişdir

Azərbaycan Diplomatik Akademiyasının (ADA) Xarici Siyasət Proqramı üzrə bu ilin ikinci semestrində 19 orta rütbəli dövlət qulluqçusu treninqdən keçmişdir.

ADA-dan AzərTAc-a bildirmişlər ki, kursların başa çatması münasibətilə keçirilən mərasimdə xarici işlər nazirinin müavini, ADA-nın rektoru, professor Hafiz Paşayev çıxış edərək bildirmişdir ki, Xarici Siyasət Proqramı yalnız dövlət məmurlarının biliklərinin artırılmasına xidmət etmir, eyni zamanda, onlar arasında peşəkar əməkdaşlığın yaranmasına da öz töhfəsini verir.

Sonra rektor Hafiz Paşayev treninq iştirakçılarına sertifikatlar və simvolik mükafatlar təqdim etmişdir.

ADA-nın Xarici Siyasət Proqramı mövcud qlobal siyasi və iqtisadi meyillər, ictimai diplomatiya, liderlik və kommunikasiya bacarıqlarının qurulması kimi sahələri əhatə etmişdir. Kurslara Prezident Administrasiyasının, Milli Məclisin, Mərkəzi Bankın, Xarici İşlər, Gənclər və İdman, Fövqəladə Hallar, İqtisadi İnkişaf, Ekologiya və Təbii Sərvətlər nazirliklərinin, Azərbaycan Televiziyası və Qlobal Fond təşkilatının əməkdaşları qatılmışlar.

Azərbaycan.- 2010.- 23 dekabr.- S. 2.