Qaçqın və məcburi
köçkünlərə davamlı dövlət
qayğısı prioritet vəzifələrdəndir
Milyondan artıq
soydaşımız tezliklə öz əzəli yurdlarına
qayıdacaqlarına əmindirlər
Gərgin iş
rejiminə və dövlət idarəçiliyi
sahəsində nəhəng fəaliyyət sferasına
baxmayaraq, Ermənistan silahlı qüvvələrinin
Azərbaycan torpaqlarına hərbi təcavüzü
nəticəsində doğma yurdlarından didərgin
düşmüş bir milyonadək soydaşımızın
qayğıları, sosial problemləri,
münaqişənin siyasi yolla həlli məsələsi
müasir Azərbaycan dövlətinin qurucusu və
xalqımızın ümummilli lideri Heydər Əliyevin
gündəlik qayğısına çevrilmişdi. Ulu öndərimiz dünyanın müxtəlif
dövlət başçıları ilə keçirdiyi
çoxsaylı görüşlərdə, beynəlxalq
və yerli qurumların tədbirlərində mütləq
şəkildə məhz bu problemə toxunaraq onu
ölkəmizin bir nömrəli problemi adlandırırdı.
Təsadüfi deyil ki, bu problem ümummilli lider Heydər Əliyev siyasi kursunun layiqli
davamçısı, Azərbaycan Respublikasının Prezidenti
cənab İlham Əliyevin də daim diqqət
mərkəzində olmuş, son 7 ildə qarşıda duran
prioritet məsələlərdən biri kimi bu
istiqamətdə ardıcıl, məqsədyönlü
tədbirlər həyata keçirilmişdir.
Bu gün xatırlatmaq yerinə düşər ki,
qaçqınların və məcburi köçkünlərin
sosial müdafiəsi ilə bağlı son 7 ildə
Azərbaycan Respublikasının Prezidenti 26 fərman və
sərəncam imzalamış, I Dövlət Proqramı
və ona Əlavələr təsdiq edilmiş, bu sənədlərin icrası ilə əlaqədar Nazirlər
Kabinetinin 87 qərar və sərəncamı verilmiş, Milli
Məclisdə 1 qanun qəbul olunmuş, Azərbaycan
Respublikasının Prezidenti cənab İlham Əliyevin
iştirakı ilə qaçqın və məcburi
köçkün probleminə həsr olunan beynəlxalq
konfrans və iki geniş müşavirə keçirilmişdir.
O cümlədən 2010-cu ilin on bir ayında Azərbaycan
Respublikasının Prezidenti 1 fərman, 2 sərəncam
imzalamış, Nazirlər Kabineti 8 qərar və
sərəncam qəbul etmişdir.
Ulu
öndərin siyasi kursunu ardıcıl davam etdirən Prezident
İlham Əliyev son 7 ildə 17 dəfə, o
cümlədən 2010-cu ildə 4 dəfə məcburi
köçkünlərlə şəxsən
görüşmüşdür. Hələ
2003-cü il oktyabrın 1-də prezident seçkiləri
ərəfəsində ilk görüşünü
Biləsuvar rayonu ərazisində məcburi
köçkünlər üçün salınmış
yeni qəsəbələrdə keçirən cənab
İlham Əliyev "ölkədə bir dənə də
çadır düşərgəsi qalmayacaq", - deyə
bəyan etmişdi. Ölkə
başçısının bu vədi vaxtından bir il
əvvəl yerinə yetirilmiş və çox
acınacaqlı şəraitdə yaşayan məcburi
köçkünlərin çadır həyatına son
qoyulmuş, onlar müasir standartlara uyğun, tam infrastruktura
malik yeni qəsəbələrə
köçürülmüşlər.
Azərbaycan Respublikası Prezidentinin 2004-cü il 1
iyul tarixli 298 nömrəli sərəncamı ilə
təsdiq edilmiş "Qaçqınların və
məcburi köçkünlərin yaşayış
şəraitinin yaxşılaşdırılması və
məşğulluğunun artırılması üzrə
Dövlət Proqramı"nın, 2007-ci il 31 oktyabr tarixli
sərəncamla həmin Dövlət
Proqramına edilmiş Əlavələrin icrası,
həmçinin 2007-ci il sentyabrın 4-də Prezidentin
yanında qaçqınların və məcburi köçkünlərin
problemlərinin həlli ilə bağlı keçirilmiş
müşavirədə ölkə başçısı
tərəfindən qarşıya qoyulmuş vəzifələrin,
habelə bu sahədə mövcud olan normativ hüquqi
sənədlərin yerinə yetirilməsi 2010-cu ildə
Qaçqınların və Məcburi
Köçkünlərin İşləri üzrə
Dövlət Komitəsinin fəaliyyətinin əsas
istiqamətlərindən olmuşdur.
2010-cu
ildə qaçqınların və məcburi
köçkünlərin sosial problemlərinin yüksək
səviyyədə həllini statistik rəqəmlər
əyani təsdiqləyir. Başa vurmaqda olduğumuz ildə
bu istiqamətdə 336,9 milyon manat vəsait sərf
edilmişdir (204,9 milyon manat büdcə, 105 milyon manatı
Dövlət Neft Fondunun, 27 milyon manatı isə beynəlxalq
humanitar və inkişaf təşkilatlarının
vəsaiti). Büdcədə nəzərdə tutulmuş
vəsaitdən 186,0 milyon manat cari ilin 11 ayı ərzində
artıq təyinatı üzrə xərclənmişdir.
Ölkə
başçısının yeni tikilən
şəhərciklərə vaxtaşırı baş
çəkməsi, yaradılan şəraitlə ciddi
maraqlanması məcburi köçkünlərin
ürəyindən olmuşdur. Cənab İlham Əliyevin
2010-cu il fevralın 27-də Qəbələ rayonu ərazisində
155 məcburi köçkün ailəsi üçün
tikilmiş iki beşmərtəbəli binanın
açılış mərasimində iştirakı əsl
bayram ovqatı yaratmışdı.
Azərbaycan Respublikasının
Prezidenti İlham Əliyev və xanımı Mehriban
Əliyeva 2010-cu il noyabrın 10-da Yevlax
şəhərində məcburi köçkünlər
üçün inşa edilmiş yaşayış
binaları kompleksinin açılış mərasimində
də iştirak etmişlər. Xatırladaq ki,
"Qaçqınların və məcburi
köçkünlərin yaşayış şəraitinin
yaxşılaşdırılması və
məşğulluğunun artırılması üzrə
Dövlət Proqramı"na əsasən,
yaradılmış kompleksin tikintisinə 2010-cu ilin
aprelində başlanmışdı. Binaların
yerləşdiyi ümumi ərazi 10 hektardır.
Beşmərtəbəli 10 binada bir, iki, üç və
dördotaqlı 615 mənzil vardır. Bu mənzillərdə
şəraiti dözülməz olan ictimai obyektlərdə,
yarımçıq tikililərdə müvəqqəti
məskunlaşan məcburi köçkünlər
yerləşdirilmişdir. Mənzillərdə normal kommunal
şərait yaradılmış, ərazidə klub-icma
mərkəzi, inzibati bina inşa edilmişdir. Məcburi
Köçkünlərin Sosial İnkişaf Fondunun
sifarişi ilə yaradılan məhəllədə geniş
abadlıq və yaşıllaşdırma işləri
görülmüşdür. Burada 50 yerlik uşaq
bağçası, 440 yerlik məktəb binası, qazanxana,
nasosxana, transformator yarımstansiyası tikilmiş,
mənzillərə telefon, su və qaz xətləri
çəkilmişdir. Məhəllədə dörd
subartezian quyusu qazılmış, iki su anbarı tikilmiş,
ümumi uzunluğu 2 kilometrdən çox olan asfalt-beton yol
salınmışdır.
Ölkə
başçısı cənab İlham Əliyevin və
xanımı Mehriban Əliyevanın 2010-cu il noyabrın
11-də Füzuli rayonuna səfər
çərçivəsində Horadiz Olimpiya İdman
Kompleksinin açılış mərasimində
iştirakı ilin yaddaqalan hadisələrindəndir.
Tikintisinə 2009-cu ilin fevralında başlanmış kompleks
5 hektar sahəni əhatə edir. Burada 30 yerlik mehmanxana,
basketbol meydançası, 500 yerlik əl oyunları zalı,
tennis kortu, avtomobil dayanacağı vardır. Olimpiya İdman
Kompleksinə həmçinin soyunub-geyinmə otaqları,
duşxana, sauna və masaj otaqları, tibb məntəqəsi,
bufet, inzibati otaqlar və yataq otaqları daxildir. Kompleksin
ərazisində su anbarı, su çəni qülləsi,
elektrik yarımstansiyası da inşa olunmuşdur.
Kompleksdə həmçinin 1860 tamaşaçı yeri olan
futbol meydançası gənclərin ixtiyarına
verilmişdir.
2010-cu il noyabrın
11-də Prezident İlham Əliyev və xanımı Mehriban
Əliyeva Ağdam rayonunda 689 məcburi köçkün
ailəsi üçün salınmış yeni
qəsəbənin açılış mərasimində
iştirak etmişlər. Qəsəbədəki evlərin
ümumi sahəsi 37 min 187 kvadratmetrdir. Hər bir evin 6 sot
torpaq sahəsi vardır. Qəsəbədə 1000
kilovatlıq transformator quraşdırılmış, elektrik
hava xətləri çəkilmişdir.
Qəsəbəyə 20 kilometr içməli su xətti, 34
kilometrə yaxın qaz xətti çəkilmiş, 4
qaztənzimləyici məntəqə
quraşdırılmışdır. Burada müasir standartlara cavab
verən yol infrastrukturu, sahəsi 1,7 hektar
olan park yaradılmışdır. Qəsəbənin
ərazisində həmçinin 50 yerlik uşaq
bağçası, ayrıca inzibati bina və müxtəlif
yığıncaqların keçirilməsi üçün
152 yerlik iclas zalı olan klub-icma mərkəzi də inşa
edilmişdir.
Oxucuların
diqqətinə daha bir neçə önəmli faktı
çatdırmaq istərdim. 2010-cu ildə
Biləsuvar rayonu ərazisində Cəbrayıl Rayon İcra
Hakimiyyətinin inzibati binasının tikintisi başa
çatdırılmışdır. Hazırda
binanın otaqlarının mebel və avadanlıqlarla
təchizatına başlanmışdır. Bakı şəhərində təcili
yerləşdirilməsinə zərurət yaranmış 70
ailə üçün 2010-cu ildə Abşeron rayonunun Ramana
qəsəbəsində beşmərtəbəli
yaşayış binasının tikintisi başa
çatdırılmış və məcburi
köçkünlərə təhvil verilmişdir. Həmçinin
Naftalan şəhərinin sosial-iqtisadi inkişafının
sürətləndirilməsi ilə əlaqədar Goranboy
rayonu ərazisində 164 məcburi köçkün
ailəsi üçün 60 və 45 mənzilli 3
beşmərtəbəli yaşayış binasının
tikintisi başa çatmış, hazırda Dövlət
Qəbul Komissiyasının Aktı rəsmiləşdirilir. Məktəb, uşaq bağçası və
mühəndis kommunikasiyalarında işlər davam edir.
Son vaxtların
ürəkaçan statistikası məcburi
köçkünlərin sosial şəraitinin
yaxşılaşdırılması ilə bağlı
həyata keçirilən tədbirləri bütün
təfərrüatı ilə əhatə edir. İmişli rayonunun inzibati
ərazisində 500 məcburi köçkün ailəsi
üçün qəsəbə salınması
məqsədilə 100 hektar torpaq sahəsi
ayrılmasını, Mingəçevir
şəhərində (502 ailə üçün 8,0 ha)
ayrılmış torpaq sahəsinə texniki
şərtlərin alınmasını və layihə-smeta
sənədlərinin hazırlanmasını, Şəki
şəhərində (423 ailə üçün 84,0 ha)
ayrılmış torpaq sahəsində mühəndis-axtarış
işlərinin başa çatmasını, Ağcabədi
rayonunda (rayondakı fin qəsəbələrində
məskunlaşmış 994 və məktəb binalarında
məskunlaşmış 114 məcburi köçkün
ailələri üçün cəmi - 1108 ailə): bundan
Laçın rayonundan olan 552 ailə üçün yeni
qəsəbənin salınması, digər rayonlardan olan 556
ailə üçün çoxmərtəbəli evlərin
tikintisi) ayrılmış torpaq sahəsinə texniki
şərtlər alınmasını, "Azərdövləttikintilayihə"
DLİ ilə hər iki obyekt üzrə müqavilələr
bağlanmasını yada salmaq yerinə düşərdi.
Azərbaycan Respublikası
Müdafiə Nazirliyinin hərbi hissələrinə
məxsus binalarda müvəqqəti məskunlaşmış
və köçürülməyə ehtiyacı olan 1410
ailə üçün zəruri sosial-texniki infrastrukturu olan
yeni mikrorayonun layihələndirilməsi və tikintisi ilə
bağlı Bakı şəhəri Qaradağ rayonunun inzibati
ərazisindəki 14 nömrəli qış yatağından
22,0 hektar torpaq sahəsi ayrılmışdır. "Azərsu"
ASC, "Azəriqaz" İB və "Azərenerji"
ASC-dən texniki şərtlər alınmış və
Bakı Şəhər İcra Hakimiyyətinə inşaat
pasportunun hazırlanması üçün müraciət
edilmişdir.
Balakən rayonundakı
məktəb binalarında müvəqqəti
məskunlaşmış 43 məcburi köçkün
ailəsi üçün beşmərtəbəli evin
tikintisi məqsədilə torpaq sahəsi ayrılmış,
Ağdam rayonunun "Dördyol"adlanan ərazisində
yeraltı qazmalarda, qamış və çiy kərpic
daxmalarda ağır şəraitdə yaşayan 932 məcburi
köçkün ailəsinə həmin rayonun
Bənövşələr (30 hektar) və İmamqulubəyli
(70 hektar) qəsəbələri ərazisində torpaq sahələri
ayrılmışdır.
Qəbələ rayonunun
Zarağan kəndində kimyəvi maddələr
tullantısı olan ərazidə yerləşən
keçmiş sovet ordusunun hospitalında müvəqqəti
məskunlaşmış 40 ailənin
köçürülməsi ilə əlaqədar kənd
bələdiyyəsi tərəfindən ayrılmış ərazidə
155 məcburi köçkün ailəsi üçün iki
beşmərtəbəli binanın tikintisi nəzərdə
tutulurdu. Bir beşmərtəbəli, 40
mənzilli binanın inşası artıq başa
çatdırılmışdır. Beyləqan
rayonu ərazisində Xocavənd Rayon İcra Hakimiyyətinin
inzibati binasının tikintisi üçün torpaq sahəsi
ayrılmış, layihə-smeta sənədlərinin
tərtibatı başa çatdırılmış,
Dövlət Baş Ekspertiza İdarəsinə təqdim
edilmişdir. Bakı Dövlət
Universitetinin 7 yataqxanasında məskunlaşmış 758
məcburi köçkün ailəsi tezliklə Abşeron
rayonunun Masazır qəsəbəsi ərazisində
tikiləcək çoxmərtəbəli yaşayış
evlərinə köçürüləcək.
Azərbaycan
dövləti qaçqın və məcburi
köçkünlərin mənzil-məişət
şəraitini yaxşılaşdırmaqla bərabər
onların işlə təmin olunmasına da xüsusi
qayğı göstərir. 2010-cu ildə 1935 nəfər, o
cümlədən məcburi köçkünlərin sıx
müvəqqəti məskunlaşdıqları
ərazilərdə 735 nəfər, Əmək və Əhalinin
Sosial Müdafiəsi Nazirliyi və onun struktur bölmələri
ilə qarşılıqlı fəaliyyət
nəticəsində isə 1200 nəfər daimi işlə,
4458 nəfər isə mövsümi işlə təmin
olunmuşdur. Bundan əlavə, 107
nəfərə işsiz statusu verilmiş, 125
nəfərə işsizlik müavinəti təyin
edilmişdir. 320 nəfər əmək
bazarının müasir tələbləri əsasında
peşə hazırlığı kurslarına, 360
nəfər isə haqqı ödənilən ictimai
işlərə cəlb olunmuşdur.
Əvvəllər
büdcədən maliyyələşdirilən
müəssisələrdə çalışmış
və işlə təmin olunmamış 14 min
nəfərdən çox məcburi köçkünə
orta aylıq əməkhaqqının ödənilməsi davam
etdirilmişdir.
Azərbaycan Respublikası
Prezidentinin 2004-cü il 1 iyul tarixli 298 nömrəli
sərəncamının 2-ci bəndi üzrə
komitəyə 544 müraciət (393 müraciət
qaçqın və məcburi
köçkünlərdən, 151 müraciət isə
vətəndaşlardan) daxil olmuş, məcburi
köçkünlərin məskunlaşdıqları
yerlərdən çıxarılmalarına dair 105
məhkəmə prosesində komitənin
nümayəndəsi iştirak etmişdir.
Dövlət
investisiya xərcləri hesabına Sabirabad, Saatlı və
Ağcabədi rayonlarında məskunlaşmış
məshəti türkləri üçün tikintisi
yarımçıq qalmış 54 evdə inşaat
işləri başa çatdırılmışdır. Məcburi
köçkünlərin müvəqqəti
məskunlaşdıqları 41 obyektdə cari təmir
işləri aparılmışdır.
Məcburi
köçkünlərin istifadə etdikləri kommunal
xərclər üçün 2010-cu ildə
təsdiqlənmiş 80,3 milyon manat vəsaitdən cari ilin 11
ayı ərzində 69,0 milyon manatı müəyyən
edilmiş normativlər üzrə birbaşa
xəzinədarlıq vasitəsilə xidmət
təşkilatlarına ödənilmişdir.
2010-cu ildə
"Bakıelektrikşəbəkə",
"Sumqayıtelektrikşəbəkə" ASC
tərəfindən fərdi evlərdə və yığcam
yaşayış yerlərində elektrik
sayğaclarının quraşdırılması tam başa
çatdırılmışdır. "Azəriqaz"
İB üzrə Bakı şəhərində və
respublikanın digər rayon və
şəhərlərində fərdi və yığcam
məskunlaşma obyektlərində nəzərdə tutulan
sayğacların quraşdırılması tam başa
çatmışdır. Müxtəlif rayonlar
üzrə məskunlaşma obyektlərinə 29
müxtəlif markalı güc transformatoru, 20 ədəd
şkaf KTP, 35 ədəd su nasosu, 1750 metr kabel, 46400 metr
elektrik naqili verilmişdir.
Dövlət
büdcəsindən 2010-cu il üçün yemək
xərci müavinətinin ödənilməsi
məqsədilə təsdiqlənmiş 88,8
milyon manat vəsaitdən 66,4 milyon manatı məcburi
köçkünlərə bankomatlar vasitəsilə
verilmişdir. 80 min məcburi köçkün ailəsinin
hər birinə payız-qış mövsümündə
(yanvar-fevral aylarında) 40 litr ağ neft
paylanmışdır. Nazirlik, komitə, şirkət, konsern
və səhmdar cəmiyyətləri tərəfindən
bayramlar ərəfəsində məcburi
köçkünlərə 2,1 milyon manat
həcmində müxtəlif yardımlar
göstərilmişdir.
Dünya Bankı və
Azərbaycan Hökuməti arasında bağlanmış
Kredit Sazişi üzrə 2010-cu il ərzində MKSİF
tərəfindən 101 müxtəlif növ icma
mikrolayihəsi (mikrolayihələrin ümumi dəyəri
6,731 milyon ABŞ dolları təşkil etmişdir) başa
çatdırılmış və bu mikrolayihələrdən
53730 nəfər əhali, o cümlədən 37,8 min
nəfər məcburi köçkün
faydalanmışdır. Daha 11 mikrolayihənin
icrasına başlanmışdır. Hazırda
47 mikrolayihə (mikrolayihələrin ümumi dəyəri
6,494 milyon ABŞ dolları təşkil edir) üzrə
satınalma prosedurları aparılır.
Dünya Bankı və
Azərbaycan Hökumətinin maliyyə vəsaiti hesabına
Azərbaycanın müxtəlif rayon və
şəhərlərində 328 nəfər məcburi
köçkünə ümumi məbləği 434 min manat
təşkil edən mikrokredit verilmişdir. Bu mikrokredit
proqramlarından 2,4 min nəfər əhali
faydalanmışdır ki, onların 80 faizi, yəni 1900
nəfəri məcburi köçkündür.
Ermənistan-Azərbaycan,
Dağlıq Qarabağ münaqişəsi haqqında
həqiqətlərin dünya içtimaiyyətinin
diqqətinə müntəzəm çatdırılması
ilə bağlı müvafiq tədbirlərin həyata
keçirilməsi gündəlik fəaliyyətimizdə
mühüm yer tutur. 2010-cu il yanvarın 19-da "Euronews"
telekanalının müxbirinə Ermənistan-Azərbaycan,
Dağlıq Qarabağ münaqişəsinin tarixi
kökləri, 1 milyonadək qaçqın və məcburi
köçkünün üzləşdiyi
çətinliklər, dövlət tərəfindən sosial
problemlərin həlli istiqamətində həyata
keçirilən tədbirlər barədə ətraflı
məlumat verilmişdir.
2010-cu il yanvarın 20-21-də
"Euronews" telekanalının müxbiri Füzuli,
Ağdam, Beyləqan və Goranboy rayonlarının
ərazisində məcburi köçkünlər
üçün salınmış yeni
qəsəbələrlə tanış olmuş, məcburi
köçkünlərlə görüşüb
söhbət etmiş, həmçinin Tərtər və
Ağdam rayonlarının təmas xəttindəki hərbi
hissələrə baş çəkərək vaxtilə
ermənilər tərəfindən işğal olunmuş,
sonradan azad edilmiş Şıxarx qəsəbəsində
olmuş, dağıdılmış evləri,
ermənilərin törətdikləri vəhşilikləri
öz gözləri ilə görüb lentə almış,
"Dağlıq Qarabağ: Azərbaycandakı
qaçqınlar düşərgəsində" adlı
reportaj hazırlamışdır. Bu material
"Euronews" telekanalında bir neçə gün
yayımlanmışdır.
Ölkəmizdə
səfərdə olan BMT Baş katibinin məcburi
köçkünlərin insan hüquqları üzrə
nümayəndəsi cənab Valter Kalin mayın 21-də
məcburi köçkünlərin müvəqqəti
məskunlaşdıqları bölgələrə
səfər etmiş, Füzuli rayonunda salınmış
Zobucuq qəsəbələrinə havadan baxış
keçirmiş, Beyləqan rayonu ərazisində
"Xocavənd-500" qəsəbəsində
sakinlərlə görüşmüş, Laçın
rayonundan olan məcburi köçkünlərin müvəqqəti
məskunlaşdıqları "Taxtakörpü"
ərazisindəki Vağazin obasında yaşayanların
həyat şəraiti ilə yaxından tanış
olmuşdur.
BMT Baş katibinin müavini
xanım Aşa Rouz Migiro Binəqədi rayonunda
İdarəetmə və Texnologiya Kollecinin 1 nömrəli
yataqxanasında məskunlaşmış məcburi
köçkünlərlə görüşmüş, 2
nömrəli Evtikmə Kombinatının ərazisində yeni
salınmış yaşayış kompleksində olmuşdur.
Fransa Senatının üzvü xanım Natali
Quli də bu yataqxanada yaşayanlarla
görüşmüş, Xocavənd rayonunun sakinləri
üçün Beyləqan rayonu ərazisində salınmış
yeni qəsəbəyə baş çəkmişdir. Almaniya
KİV-nin təmsilçilərinin məcburi
köçkünlərin vəziyyəti ilə yerində
Komitə üzrə 20 rayon
(şəhər) icra hakimiyyətlərinə 522,3 min manat,
qaçqın və məcburi köçkünlərdən
daxil olmuş müraciətlər əsasında isə 198
ailəyə 15,2 min manat, cəmi 337,5 min manat məbləğində
humanitar yardım ayrılmışdır. Qurban bayramı
münasibətilə 18650 ailəyə İslam İnkişaf
Bankının xətti ilə 186,5 ton
ət payı verilmişdir.
Komitənin
nəzdində olan aqrar sənaye və aqrar fermer
təsərrüfatları tərəfindən 2010-cu ilin
məhsulu üçün əkilmiş 166 hektar
sahədən 168 ton taxıl məhsulu
yığılmışdır. 2010-cu ilin payız səpini və
2011-ci ilin məhsulu üçün 136 hektar sahədə
şum işləri aparılmış, həmçinin 717,8
min manatlıq sənaye məhsulu istehsal edilmişdir.
Qaçqın
və məcburi köçkünlərin ərizə və
şikayətlərinə vaxtında baxılması,
onların arzu və təkliflərinin nəzərə
alınması daim diqqət mərkəzindədir. Dövlət Komitəsinin
Mərkəzi Aparatında 5353 nəfər vətəndaş
qəbul olunmuş, qaçqın və məcburi
köçkünlərdən, müxtəlif
təşkilatlardan daxil olmuş 28137 yazılı və
şifahi müraciətə baxılmış,
müraciətlərin 98 faizi icra olunmuş, 69 faizi
müsbət həll edilmişdir.
Prezident İlham Əliyev
çıxışlarında ölkəmizin ərazi
bütövlüyü ilə bağlı
dəfələrlə vurğulayıb:
"Azərbaycanın işğal olunmuş torpaqları
işğalçı qüvvələrdən azad
olunmalıdır. Azərbaycanın məcburi
köçkünləri öz doğma torpaqlarına
qayıtmalıdırlar, o cümlədən Dağlıq
Qarabağa qayıtmalıdırlar. Təbii
ki, torpaqlarımız sülh yolu ilə azad edilməsə,
istənilən vasitə ilə azad ediləcəkdir".
Bu sözlər,
həmçinin dövlət başçısının
beynəlxalq tədbirlərdəki qətiyyətli
bəyanatları öz ata-baba yurdlarından didərgin
salınmış insanlarda sabaha ümidi artırır və
məcburi köçkünlər inanırlar ki, problemin
siyasi həlli sahəsində ölkə Prezidenti, Ali Baş
Komandan İlham Əliyevin siyasi səyləri, həyata
keçirdiyi qlobal tədbirlər müsbət
nəticəsini verəcək və onlar tezliklə öz
doğma ata-baba yurdlarına qayıdacaqlar.
Əli HƏSƏNOV,
Azərbaycan Respublikası Baş nazirinin müavini,
Qaçqınların və Məcburi Köçkünlərin
İşləri üzrə
Dövlət Komitəsinin
sədri
Azərbaycan.- 2010.- 23 dekabr.- S. 3.