Böyük mesenat haqqında yeni kitab-albom

Bu nəşri tarixçilərlə neftçilər birlikdə ərsəyə gətiriblər

Milli Azərbaycan Tarixi Muzeyinin buraxdığı yeni "Hacı Zeynalabdin Tağıyev" kitab-albomu bp Azərbaycan şirkətinin sponsorluğu ilə işıq üzü görüb. Bu şirkət nəşrin çapdan çıxması münasibətilə təqdimat mərasimi də keçirdi.

XIX əsrin sonu - XX əsrin əvvəllərində yaşamış məşhur sahibkar, mesenat Hacı Zeynalabdin Tağıyevin həyatı və fəaliyyəti insana xas olan ən yaxşı keyfiyyətləri - vətənpərvərliyi, alicənablığı, səxavəti, xalqına sevgi və sədaqəti özündə ehtiva edir. İbtidai təhsilini belə tam başa vura bilməyən Hacı Zeynalabdin Tağıyev fitri istedad, iş qabiliyyəti nümayiş etdirərək öz müəssisələrini qurmuş, onları zamanın tələbləri səviyyəsində təchiz edə bilmişdi. Hacı fəaliyyətinin böyük bir hissəsini xalqının mədəni, təhsil səviyyəsinin yüksəlməsinə, milli şüurun oyanmasına yönəltmişdi. Odur ki, təkcə böyük sərvət sahibi kimi deyil, daha çox özünün maarifçilik, xeyriyyəçilik fəaliyyəti ilə tarixdə qalmışdır.

Bütün bunlara görə sağlığında Hacıya "el atası" adını vermişdilər. Sovet rejimi dövründə H.Z.Tağıyevin fəaliyyətini saxtalaşdırmağa nə qədər cəhd göstərsələr də, buna nail ola bilməmişlər. Belə ki, tarixi hadisələrin qarşısıalınmaz axarı əsl həqiqətləri yenidən üzə çıxarmışdır. Elə tarixçilərlə neftçilərin əl-ələ verib buraxdığı bu yeni, dəyərli kitab-albom da Hacının öz xalqı qarşısında misilsiz xidmətlərinin unudulmamasının bariz nümunələrindən biridir.

Kitab-albomdakı materiallar iki dildə - Azərbaycan və ingilis dillərində verilib. O, əsasən dörd bölmədən - "Sahibkarlıq", "Xeyriyyəçilik", "Ailə", "Saray və ev-muzey" bölmələrindən ibarətdir. Maraqlıdır ki, kitab-albomdakı bütün materiallar şəkillərlə müşayiət olunur. Dərc olunmuş ayrı-ayrı şəkillərə isə geniş şərh verilir. Kitab-albomda Hacı Zeynalabdin Tağıyevin ailə üzvlərinin təqdim etdiyi və indiyə qədər heç bir yerdə çap olunmamış şəkillər də yerləşdirilib.

"Hacı Zeynalabdin Tağıyev" kitab-albomunun təqdimat mərasimində çıxış edən bp şirkətinin regional prezidenti Rəşid Cavanşir, Milli Azərbaycan Tarixi Muzeyinin direktoru Nailə Vəlixanlı, bp Azərbaycan şirkətinin əlaqələr üzrə meneceri Tamam Bayatlı, Tağıyevin ailə üzvlərindən Səidə Mirizadə və başqaları həm böyük mesenatın həyat yolu, həm də bunu əks etdirən yeni nəşr haqqında ətraflı söhbət açdılar.

Vaxtilə H.Z.Tağıyev öz həyat amalını sözlərlə belə ifadə etmişdir: "Ən çox sevdiyim, ən qiymətli sandığım vaxtlarımda məni sənaye işlərim qədər, mən deyərdim, hətta onlardan daha artıq mənim xalqım, onun gələcək xoşbəxtliyi və necə yaşayacağı məsələləri məşğul edir. Bu məqsədə çatmaq üçün mənim vacib bildiyim birinci şey xalqımın tərbiyəsi, təhsili məsələsidir". Sözügedən kitab-albom da məhz bu amallarını həyata keçirərək əbədiyaşarlıq qazanmış böyük xeyriyyəçi Hacı Zeynalabdin Tağıyevin xatirəsinə layiqli bir tövfədir.

F.SADIQLI,

Azərbaycan.- 2010.- 25 dekabr.- S. 7.