Türkiyənin Qartəpə şəhərində Heydər Əliyev parkı istifadəyə verilmişdir

Türkiyənin Kocaeli vilayətindəki Qartəpə şəhərində Azərbaycan xalqının ümummilli lideri, türk dünyasının dahi şəxsiyyəti Heydər Əliyevin adını daşıyan park istifadəyə verilmişdir.

Bu park Azərbaycan Respublikası Diasporla İş üzrə Dövlət Komitəsi və Qartəpə Bələdiyyəsi arasında imzalanmış protokola əsasən salınmışdır.

Azərbaycanın İstanbuldakı baş konsulu Həsən Zeynalov, Diasporla İş üzrə Dövlət Komitəsinin əməkdaşı Elnar Məmmədov, Kocaeli valisinin müavini Mustafa Ünlüsoy, bələdiyyə sədri İbrahim Karaosmanoğlu, Qartəpə bələdiyyəsinin sədri Şükrü Karabalık, Türkiyə-Azərbaycan Dərnəkləri Federasiyasının sədri Bilal Dündar və digər rəsmi şəxslər, ictimaiyyətin nümayəndələri, qardaş ölkədə yaşayan həmvətənlərimiz parkın açılışı münasibətilə keçirilən mərasimdə iştirak etmişlər.

Türkiyənin mühüm turizm şəhərlərindən olan Qartəpədə 5 min kvadratmetr ərazidə salınmış parkda idman meydançaları, uşaqların istirahəti üçün guşələr xüsusi zövqlə inşa olunmuşdur.

Qartəpə bələdiyyəsinin sədri Şükrü Karabalık çıxışında demişdir ki, parka ulu öndər Heydər Əliyevin adının verilməsinin əsas məqsədi şəhərimizdə də türk dünyasının bu dahi oğlunun əziz xatirəsini yaşatmaq və Türkiyə-Azərbaycan qardaşlığına daha bir töhfə verməkdir.

Diasporla İş üzrə Dövlət Komitəsinin əməkdaşı Elnar Məmmədov tədbirin Dünya Azərbaycanlılarının Həmrəylik Günü ərəfəsinə təsadüf etdiyindən DİDK rəhbərliyinin soydaşlarımıza təbrikini çatdırmışdır. O, həmçinin parkın yüksək səviyyədə salınmasına görə Kocaeli Böyükşəhər Bələdiyyəsinə və Qartəpə bələdiyyəsinə DİDK rəhbərliyi adından təşəkkür etmişdir. E.Məmmədov ulu öndər Heydər Əliyevin həyat yolu və fəaliyyəti haqqında məlumat vermiş, bu dahi şəxsiyyətin türk dünyası qarşısında, türk xalqlarının birliyi istiqamətində göstərdiyi xidmətlərdən danışmışdır. DİDK təmsilçisi ümummilli liderin siyasi kursunu Prezident İlham Əliyevin uğurla davam etdirdiyini vurğulamış və əlavə etmişdir ki, Azərbaycan dövlətinin başçısının Türkiyə dövlətinin rəhbərləri ilə sıx dostluq münasibətləri xalqlarımız arasındakı qardaşlıq münasibətlərinin də daim möhkəmlənməsinə müsbət təsir göstərir. E.Məmmədov qeyd etmişdir ki, parkın yerləşdiyi ərazidə məskunlaşan əhalinin əksəriyyəti Azərbaycan əsillidir və burada Heydər Əliyev parkının salınması həm Azərbaycan, həm də Türkiyə dövlətlərinin soydaşlarımıza hədiyyəsidir. Diasporla İş üzrə Dövlət Komitəsinin nümayəndəsi Türkiyədə Azərbaycan diasporunun fəaliyyətinin çoxşaxəli olması üçün səylərin davam etdiriləcəyini də bildirmiş və bu işdə TADEF-in xüsusi rolunu vurğulamışdır.

Həsən Zeynalov Azərbaycanın bu gün qüdrətli və dünyada nüfuzu olan bir dövlətə çevrilməsində ulu öndər Heydər Əliyevin misilsiz xidmətlərindən bəhs etmişdir. Türkiyənin bir çox şəhər və qəsəbələrində ümummilli liderimizin adını daşıyan parkların salınması, abidələrinin ucaldılması dahi liderin "bir millət, iki dövlət" adlandırdığı qardaş ölkələrimiz arasındakı möhkəm əlaqələrin təzahürüdür.

Bilal Dündar bu gözəl parkın Türkiyə ilə Azərbaycanın tərəqqisinə misilsiz töhfələr vermiş Heydər Əliyevin adını daşımasını yüksək qiymətləndirmiş, buna görə Kocaeli vilayəti və Qartəpə şəhərinin rəhbərliyinə təşəkkürünü bildirmişdir.

Oqtay BAYRAMOV,

AzərTAc-ın xüsusi müxbiri

Ankara

Azərbaycan.- 2010.- 28 dekabr.- S. 2.